Ermənistanın hərbiləşmə siyasəti üzərində beynəlxalq "verifikasiya mexanizmi" - Azərbaycandan yeni təşəbbüs...
Mübariz Göyüşlü: “Azərbaycana qarşı olan ölkələr bu siyasətlərindən əl çəkməlidir”
"Regionda yenə militarizasiya siyasəti və gərginlik ocaqlarının yaradılması istiqamətində addımlar atılmaqdadır". Bu fikirləri Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Kəlbəcərdə jurnalistlərə açıqlamasında deyib.
O qeyd edib ki, Azərbaycan hər vəchlə regiondakı sülh gündəliyini dəstəkləməyə davam edir: “Biz o mövqeyimizdə qalırıq ki, Ermənistan işğalçı, təcavüzkar dövlət olub. Regionda etimad mühitinin tam şəkildə yaranması üçün Ermənistanın militarizasiya siyasəti üzərində müəyyən bir verifikasiya mexanizm olmalıdır. Ermənistanın militarizasiya prosesində iştirak edən dövlətlər məsuliyyətlərini anlamalıdırlar".
“Cənubi Qafqazda gərginliyin artmasında maraqlı olan qüvvələr var, xüsusən Qərb ölkələri və onların təşkilatları bu siyahıda liderlik edir”
Ermənistanın militarizasiya siyasəti üzərində müəyyən bir verifikasiya mexanizminin olması barədə fikir bildirən siyasi şərhçi Mübariz Göyüşlü “Bakı-Xəbər”ə açıqlamasında bildirdi ki, Cənubi Qafqazda gərginliyin artmasında maraqlı olan qüvvələr var. Xüsusən Qərb ölkələri və onların təşkilatları bu siyahıda liderlik edir: “Onlar bu işi Ermənistanın əli ilə etmək istəyirlər. Həmin qüvvələr Ermənistanı növbəti dəfə silahlandırmaqla gərginliyə əlavə rəng qatmağa çalışırlar. Bu gərginliyi yaratmaqla onlar öz maraqlarını həyata keçirməyi, diqtə etməyə çalışırlar. Ancaq həmin qüvvələr unudur ki, Ermənistan 44 günlük müharibəyə qədər Rusiyadan çoxlu sayda silah almışdı. O zamanda Ermənistan bu məsələləri aqresiv şəkildə Azərbaycana qarşı işğalçı siyasəti aparmaq istəyirdi. Lakin Azərbaycan bunlara imkan vermədi. Məlumdur ki, həmin silahların bir qismi Hərbi Qənimətlər Parkındadır. Qalan silahlar isə məhv edilməmiş şəkildə bizim istifadəmizdədir. Bu faktı Ermənistanı silahlandırmaq istəyən dövlətlər bilməlidir. Hesab edirəm ki, Azərbaycana qarşı olan ölkələr bu siyasətlərindən əl çəkməlidir”.
Günel CƏLİLOVA
