Frankofoniya sammitində Azərbaycana qarşı bəyanat qəbul olunacaq - Parislə İrəvan hazırlaşır...
Hüseyn İbrahimov: “Biz istənilən təxribata qarşı hazırlıqlı olmalıyıq”
Fransa hökuməti Ermənistanın baş naziri Nikol Paşinyanı 19-cu Frankofoniya sammitində iştiraka dəvət edib. Bu barədə Fransanın Ermənistandakı səfiri Olivye Dikotini jurnalistlərə bildirib.
“Təxminən 10 gündən sonra Villers-Kotteretsdə Frankofoniya sammiti keçiriləcək və orada Ermənistanın baş naziri Nikol Paşinyan da iştirak edəcək. Frankofoniya mövzusu Fransanın xarici işlər naziri Stefan Sejurnenin Ermənistanın xarici işlər naziri Ararat Mirzoyan və baş nazir Nikol Paşinyanla görüşləri zamanı müzakirə olunub”, - Dekotini qeyd edib.
Onun sözlərinə görə, Frankofoniya sammiti iki ölkə arasında xüsusi bağ yaradır. Fransa səfiri bunun Ermənistan üçün də strateji əhəmiyyət kəsb etdiyini, siyasi, hərbi, mədəni və digər sahələrdə çoxşaxəli əməkdaşlığın gözlənildiyini vurğulayıb.
Qeyd edək ki, oktyabrın 4-ü və 5-də Fransanın Viller-Kotterets və Paris şəhərlərində 19-cu Frankofoniya sammiti keçiriləcək. Frankofoniya sammiti 1986-cı ildən keçirilir. Sammit zamanı qətnamələr qəbul edilir, baş katib seçilir və bir sıra digər qərarlar qəbul edilir.
Bu arada diplomatik mənbələrdə dolaşan söhbətlərə görə, Frankofoniya sammitində Azərbaycana qarşı Ermənistanın dostlarının təşəbbüsü ilə yeni bir qətnamənin qəbul olunması gözlənilir. 2022-ci ilin noyabrında Tunisdə keçirilən Frankofoniya sammitində Azərbaycan əleyhinə qətnamə qəbul etməyə cəhd olub, amma Rumıniya, Albaniya və Moldova buna imkan verməyib. Üstəlik, Qoşulmama Hərəkatında təmsil olunan və Azərbaycana dost olan ölkələr buna imkan verməyib. Məlumata görə, budəfəki sammitdə Azərbaycan əleyhinə qərəzli bir qətnamənin qəbul edilməsi planlaşdırılır. O baxımdan bunun qarşısını necə almaq olar?
“Azərbaycana dost ölkələr dərhal belə təşəbbüsləri bloklamalıdır”
Sözügedən məsələyə aydınlıq gətirən İdarəçilik Akademiyasının müəllimi, sosioloq Hüseyn İbrahimov “Bakı-Xəbər”ə açıqlamasında bununla bağlı bir sıra məqamlara toxundu: “Bəli, Fransada keçiriləcək Frankofoniya sammitində belə bir cəhdin olacağı ehtimalı böyükdür. Çünki son bir ildə Fransanın Azərbaycana qarşı qərəzli münasibəti daha da kəskinləşib. Əsasən də Qarabağda aparılan antiterror əməliyyatlarından sonra Paris ölkəmizə qarşı daha aqressiv mövqedən çıxış edir. Hətta Fransa çox çalışdı ki, BMT Təhlükəsizlik Şurası Qarabağla bağlı qətnamə qəbul etsin. Azərbaycanın dostları buna imkan vermədilər. Bu zaman Fransa daha aqressiv mövqe tutaraq Ermənistanın silahlandırılmasına qərar verdi. Məhz Qarabağda suverenliyimiz tam təmin ediləndən sonra Fransa Ermənistana ağır hücum silahlarının verilməsini sürətləndirdi. Ona görə də biz istənilən təxribata qarşı hazırlıqlı olmalıyıq. Öyrənməliyik ki, həmin tədbirə hansı ölkələr dəvət edilib. Bundan çıxış edərək Azərbaycana dost olan ölkələr indidən məlumatlandırılmalıdır. O məqsədlə ki, Azərbaycana dost ölan ölkələr dərhal belə təşəbbüsləri bloklamalıdılar. Ancaq bu yolla bunun qarşısını almaq olar. Azərbaycan diplomatiyasının bu yöndə qabaqlayıcı addımlar atacağını istisna etmirəm”.
Vidadi ORDAHALLI
