Azad rayonların 1 illik bərpa xərci açıqlandı...
Aydın Hüseynov: “Ölkəmizdə sosial müdafiə tədbirlərinə də böyük həcmdə vəsait ayrılacaq ki, həmin maliyyələşmənin məbləğinin 5 milyard manat olması proqnozlaşdırılıb”
2024-cü ildə Azərbaycanda dövlət büdcəsi xərclərinin 3 milyard 825 milyon manatı və yaxud 10,4 %-i işğaldan azad olunmuş ərazilərin yenidən qurulması və bərpası ilə bağlı xərclərin payına düşəcək. Bu barədə Maliyyə Nazirliyinin yaydığı məlumatda deyilir.
Qeyd edək ki, bu, 2023-cü ilin təsdiq olunmuş proqnozu ilə müqayisədə 20,3 % azdır. Məlumat üçün bildirək ki, Qarabağ və Şərqi Zəngəzura xərcləmələr iqtisadi fəaliyyət xərclərinin 49,1 %-ni təşkil edəcək.
Xatırladaq ki, gələn il büdcə gəlirlərinin 34 milyard 173 milyon manat, büdcə xərclərinin isə 36 milyard 763 milyon manat olacağı gözlənilir.
“Büdcənin xərclərinin əsas istiqamətləri Qarabağ və Şərqi Zəngəzurda başlanmış böyük miqyaslı abadlıq və quruculuq işlərinin genişlənməsinə, Böyük Qayıdışın təmin edilməsinə öz töhfələrini verməkdədir”
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov mövzunu “Bakı-Xəbər”ə şərh edərkən bildirdi ki, Prezident İlham Əliyevin rəhbərliyi ilə həyata keçirilən uğurlu inkişaf strategiyası makroiqtisadi sabitliyi və maliyyə dayanıqlığını daha da möhkəmləndirməyə, iqtisadi inkişaf sahəsində dövlət siyasətinin prioritetlərini və məqsədlərini əldə etməyə imkan verib. Son illərdə ölkəmizin sürətli inkişafı maliyyə imkanlarının artmasına, büdcə gəlirlərinin yüksəlməsinə səbəb olmaqdadır: “Bu baxımdan 2025-cü ilin dövlət büdcəsi layihəsi də ölkəmizdə nəzərdə tutulan bütün hədəflərə nail olunması, o cümlədən işğaldan azad edilmiş bölgələrdə bərpa-quruculuq işlərinin sürətləndirilməsi, müdafiə və təhlükəsizlik vəzifələrinin yerinə yetirilməsinə imkan verir. Gələn ilin büdcə layihəsinin ilkin göstəriciləri ortamüddətli dövr üzrə makroiqtisadi proqnozlara əsaslanır və yeni ölkə rəhbərliyi tərəfindən müəyyən edilmiş prioritetlərə və makro-fiskal çərçivəyə uyğun olaraq hazırlanıb”.
Millət vəkilinin sözlərinə görə, 2025-ci ilin dövlət büdcəsinin gəlirləri 36 milyard 616 milyon manat proqnozlaşdırılır ki, bu da 2024-cü ilin təsdiq olunmuş göstəricisi ilə müqayisədə 228 milyon manat və ya 0,6 faiz çoxdur. Gəlirlərin 46,6 faizi və ya 17 milyard 73 milyon manatı neft-qaz sektorunun payına düşür: “Əsas gəlirlər isə qeyri-neft sütunlarıdır ki, büdcədə həmin gəlirlərin həcmi 53,4 faiz və ya 19 milyard 543 milyon manatı nəzərdə tutulub. Bu o deməkdir ki, büdcədə yenə də əsas gəlir mənbəyi qeyri-neft resursları üzərində qurulacaq. 2025-ci ilin dövlət büdcəsinin xərcləri 39 milyard 667,6 milyon manat proqnozlaşdırılır. Büdcə kəsiri 2024-cü ilin dürüstləşdirilmiş proqnozu ilə müqayisədə 302,7 milyon manat və ya 9 faiz az olmaqla 3 milyard 51,6 milyon manat nəzərdə tutulub”.
A.Hüseynov bildirdi ki, büdcənin xərclərinin əsas istiqamətləri Qarabağ və Şərqi Zəngəzurda başlanmış böyük miqyaslı abadlıq və quruculuq işlərinin genişlənməsinə, Böyük Qayıdışın təmin edilməsinə öz töhfələrini verməkdədir. Bütün bunlarla bərabər, ölkəmizin qarşısında meydana çıxan yeni çağırışlar, ələxsus da, işğaldan azad olunmuş ərazilərdə bərpa və yenidənqurma işlərinin sürətləndirilməsi, müasir zəruri infrastrukturların, o cümlədən Ermənistanla dövlət sərhədində yeni sərhəd infrastrukturlarının və Zəngəzur dəhlizinin yaradılması istiqamətində işlərin miqyasının artması, eyni zamanda, ölkəmizin müdafiə qabiliyyətinin gücləndirilməsinə yönəldiləcək. Ümumilikdə, bu tədbirlər üçün nəzərdə tutulan məbləğ 4 milyard manatdan çoxdur: “Digər prioritet istiqamət ölkənin müdafiə qabiliyyətinin və milli təhlükəsizliyin daha da artırılmasıdır ki, bu sahəyə 6,5 milyard manat vəsait ayrılması nəzərdə tutulur. Ölkəmizdə sosial müdafiə tədbirlərinə də böyük həcmdə vəsait ayrılacaq ki, həmin maliyyələşmənin məbləğinin 5 milyard manat olması proqnozlaşdırılıb”.
Günel CƏLİLOVA
