AŞPA Azərbaycanla münasibətləri daha da gərginləşdirdi...
Elşad Həsənov: “Bizə sırımaq istədiyi demokratiya onların başına dəysin”
Avropa Şurası Parlament Assambleyasının prezidenti Teodoros Rusopulos Azərbaycan XİN-in AŞPA-nın müəyyən üzvlərinin Azərbaycanda arzuolunmaz şəxs hesab ediləcəyinə dair bəyanatına reaksiya verib:
“Bu, Azərbaycanın Avropa Şurasındakı mövqeyini yalnız çətinləşdirəcək təəssüf doğuran siqnaldır. Üzv ölkələr demokratiya standartlarına hörmət edəcəklərinə dair öhdəlik götürüblər. Öz vicdanına uyğun səs verənlərin “qara siyahı”ya salınması yalnız əks nəticə verə bilər”.
Bundan artıq çətinləşdirmə nə ola bilər ki? Azərbaycan nümayəndə heyətinin AŞPA-da fəaliyyəti ədalətsizcəsinə dondurulub. Verilən siyasi səviyyədə vədlərə baxmayaraq, nümayəndə heyətinin mandatı indiyə qədər bərpa edilməyib. Btün bunlar azmış kimi, yenə də obyektivlikdən uzaq və hədə ritorikası ilə danışırlar. Necə deyərlər, AŞPA Azərbaycanla münasibətləri yenidən gərginləşdirməyə çalışır.
“Əgər AŞPA-ya biz lazım deyiliksə, onlar heç dünəndən bizə lazım deyil və buna görə kiməsə yalvarası deyilik”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənov hesab edir ki, bununla AŞPA Azərbaycana qarşı növbəti anti-Azərbaycan ritorikası ilə çıxış edir: “Təkcə AŞPA-nın prezidenti yox, eyni zamanda qurumun üzvləri də ölkəmizə qarşı qərəzli mövqedən çıxış edirlər. Bunun nəticəsidir ki, bu ilin yanvarında AŞPA-da Azərbaycan nümayəndə heyətinin fəaliyyəti donduruldu. Ölkəmizə yönəlik olmazın yalanlar deyilir, ittihamlar səsləndirilir. Bütün bunlar azmış kimi, Azərbaycanı Rusiya ilə yaxınlıq etməkdə qınayırlar. Əvvəla onu qeyd etmək lazımdır ki, hər bir ölkə öz siyasətini öz dövlət və xalqının maraqlarına uyğun qurur. O cümlədən, bunu həyata keçirir. Belə bir qarışıq dönəmdə Azərbaycan ərazilərini işğaldan azad etdi, ərazi bütövlüyünü təmin etdi. Necə deyərlər, geosiyasətdə daşları yerindən oynatdı. Bu da Avropa İttifaqı təsisatlarında təmsil olunan bir sıra qüvvələri narahat edir. Çünki onlar ərazilərimizin işğaldan azad edilməsini istəmirdilər. Bax, bütün bu oyunların kökündə dayanan başlıca faktor bununla əlaqədardır. Bu ölkələrin də başında Fransa dayanır. O Fransa ki, bütün vasitələrlə işğal prosesini uzatmağa və Azərbaycanı bununla barışmağa sövq edirdi. Bütün bu oyunlar pozulduğu üçün belə aqressiv mövqe sərgiləyirlər. Onsuz da onlar hər zaman ölkəmizə qarşı ikili standartlardan çıxış ediblər. Hər vasitə ilə çalışırlar Azərbaycanı gözdən salsınlar. Ona görə də biz AŞPA prezidenti Teodoros Rusopulos və onun kimi digərlərinin dediyi ilə oturub-durası deyilik. Əgər AŞPA-ya biz lazım deyiliksə, onlar heç dünəndən bizə lazım deyil. Biz buna görə kiməsə yalvarası deyilik. Ona görə də kimsə Azərbaycana nəyisə diqtə edə bilməyəcək. O cümlədən, AŞPA. Bizim öz siyasətimiz var və işləri də buna uyğun olaraq qururuq. Azərbaycan Türk Dövlətləri Təşkilatının üzvləri ilə müttəfiqlik sazişləri imzalayır. 2021-ci ildə Türkiyə ilə Şuşa Bəyyannaməsi imzalanıb. Bu günlərdə Azərbaycanla Özbəkistan arasında müttəfiqlik müqaviləsi imzalanıb. Növbəti illərdə digər türk dövlətləri ilə bənzər müqavilələr imzalanacaq. Ona görə də AŞPA-nın bizə sırımaq istədiyi demokratiya onların başına dəysin. Görürük onlarda hansı demokratiya var. Demokratiya deyə-deyə Ukraynanı xarabazarlığa çevirdilər”.
Vidadi ORDAHALLI
