Antiterror əməliyyatı olmasaydı, Qarabağda bu gün vəziyyət necə olardı?
Mətin Məmmədli: "Azərbaycanın antiterror tədbirlərindən sonra erməni klanları arasında mübarizə bu gün yalnız Ermənistan daxilində baş verir"
Məlum olduğu kimi, Ermənistan Prokurorluğu ölkənin sabiq prezidenti Robert Köçəryana, sabiq müdafiə naziri Seyran Ohanyana və digərlərinə qarşı yeni cinayət təqibinə başlayıb.
Ermənistan mediası yazır ki, sentyabrın 12-də Kassasiya Məhkəməsinin Korrupsiyaya Qarşı Mübarizə Palatası təqsirləndirilən Robert Köçəryan, Seyran Ohanyan və başqaları ilə bağlı İrəvan Şəhər Məhkəməsinin qərarını ləğv edib. Qeyd edək ki, Konstitusiya Məhkəməsi prokurora təqsirləndirilən şəxslərin əməlinə hüquqi qiymət vermək səlahiyyəti verib.
Bu faktlar göstərir ki, 2023-cu ildə baş tutan antiterror əməliyyatı qaçılmaz idi. Görəsən, antiterror keçirilməsəydi, indi Qarabağda hansı vəziyyət var idi?
"Qeyri-qanuni silahlı birləşmələr tərksilah edilməsəydi, qondarma rejim ləğv olunmasaydı Ermənistan daxilindəki siyasi böhran bu gün Qarabağda da baş verəcəkdi"
Siyasi şərhçi Mətin Məmmədli "Bakı-Xəbər"ə şərhində bunları bildirdi: "Bu hadisələr onu göstərir ki, Nikol Paşinyan hökuməti ilə keçmiş hakimiyyət arasında çox ciddi ixtilaflar, münaqişələr mövcuddur. Zaman-zaman bu münasibətlər özünü göstərir. Bu addım da ondan xəbər verir ki, Paşinyan hakimiyyəti Qarabağ klanına qarşı məhdudlaşdırıcı addımlarını, təzyiqlərini davam etdirəcək. Əsas hədəflərdən biri də Robert Köçəryandır. Xatırladım ki, Paşinyan hakimiyyətə gəldikdən sonra Robert Köçəryan həbs belə olunmuşdu. Bu hal nəinki Ermənistan daxilində, hətta Ermənistanla Rusiya arasında müəyyən böhrana səbəb oldu. Görünən odur ki, Paşinyan indiki zamanı münasib bilib yenidən Qarabağ klanına təzyiqləri artırır. Bu fakt onu da təsdir edir ki, 2023-cu il sentyabr ayında antiterror əməliyyatı keçirilməsəydi, qeyri-qanuni silahlı birləşmələr tərksilah edilməsəydi, qondarma rejim ləğv olunmasaydı Ermənistan daxilindəki siyasi böhran bu gün Qarabağda da baş verəcəkdi. Onu da deyim ki, həmin böhranın elementləri son illər Qarabağda qondarma rejim daxilində özünü göstərirdi. Azərbaycanın antiterror tədbirlərindən sonra erməni klanları arasındakı mübarizə bu gün yalnız Ermənistan daxilində baş verir".
Günel CƏLİLOVA
