Rusiyadan Azərbaycana pul axını dayanmaq üzrədir - fiziki şəxslər böhrandadır...
2024-cü ilin altı ayı ərzində fiziki şəxslər tərəfindən Rusiyadan Azərbaycana pul köçürmələrinin həcmi yarıdan çox azalıb. Məlumata görə, transfertlərin həcmi ötən illə müqayisədə 608 milyon dollardan 287,1 milyon dollara düşüb.
Qeyd edək ki, Azərbaycana xaricdən pul köçürmələrdə ən böyük pay, bir qayda olaraq, Rusiyaya məxsus olur. Bu ölkədə yaşayıb-işləyən soydaşlarımızın sayı digər bütün ölkələrdəkilərin birgə sayından daha çoxdur. Buna görə də adətən Rusiyadan köçürülən pullar ümumi köçürmələrin yarıdan çoxunu təşkil edir.
Maraqlıdır, Rusiyadan Azərbaycana pul köçürmələri niyə azalıb?
Xalid Kərimli: “Crocus City Hall"da baş verən terror hadisəsindən sonra Rusiyada sənədləri qaydasında olmayan şəxslər iş məsələsində əziyyət çəkməyə başladılar”
İqtisadçı Xalid Kərimli “Bakı-Xəbər”ə şərhində bildirdi ki, Azərbaycana gələn pul vəsaitlərini ənənəvi olaraq yarısından çoxu, bəzən 60-70 faizə qədəri Rusiyada yaşayan azərbaycanlıların payına düşür: “Rusiya iqtisadiyyatının 2023-2024-cü ilinə baxsaq görərik ki, 2022-ci illə müqayisədə həm 2023-cü, həm 2024-cü ildə Rusiya iqtisadiyyatı artır. Maraqlıdır ki, burada hətta əməkhaqları da artım sürətinə görə Qərbi üstələyir. Yəni Rusiya iqtisadiyyatında heç bir geriləmə yoxdur. Xatırladım ki, Rusiyada "Crocus City Hall" da baş verən hadisədən sonra həm bu ölkədə işləyən azərbaycanlıların, həm də Mərkəzi Asiya - Tacikistan, Özbəkistan kimi ölkələrin vətəndaşlarının rahat işləməsinə qarşı problemlər çıxmağa başladı və bu da ciddi şəkildə onların işləməsinə və pul göndərməsinə problem yaratdı. "Crocus City Hall"da baş verən terror hadisəsindən sonra Rusiyada sənədləri qaydasında olmayan şəxslər iş məsələsində əziyyət çəkməyə başladılar. Tutaq ki, əvvəl ailəsini də yanlarına aparmışdılar, kimsə nəsə demirdi, indi problem yaradırlar ki, işləyirsən, buna görə sənə iş icazəsi verilir, yanındakıları geri qaytar. Təkcə Azərbaycanda yox, Mərkəzi Asiyada da, Tacikistanda da, Özbəkistanda da bunun təsirləri hiss olunur. Terrordan sonra qanunsuz, iş icazəsi olmayan miqrantlara qarşı qaydaları sərt tətbiq edirlər. Qaydalar həmişə var idi, amma tətbiq etmirdilər, amma indi sərt şəkildə tətbiq edirlər və bunun da təsiri bu statistikada özünü göstərir"
Kamran Məmmədli: “Rusiya iqtisadiyyatında başlanan böhran bu ölkədən xaricə pul köçürmələrinə də sirayət edir”
Iqtisadçı Kamran Məmmədli “Bakı-Xəbər”ə şərhində bildirdi ki, Rusiyadan Azərbaycana pul köçürmələrinin həcminin azalması təbii haldır: “Rusiya artıq neçə ildir ki, müharibə aparır, bu müharibəyə görə də dünya ölkələri tərəfindən Rusiyaya ciddi sanksiyalar tətbiq olunur. Digər tərəfdən, müharibə xərcləri artır və bu səbəbdən ölkə iqtisadiyyatı kiçilir. Rusiya iqtisadiyyatında başlanan böhran bu ölkədən xaricə pul köçürmələrinə də sirayət edir, nəticədə pul göndərmələrinin həcmi azalır. Bu səbəbdən Rusiyadan Azərbaycana pul göndərən insanların qazancları da azalır, bu amil də göndərilən pulun həcminə təsir edir, azalma baş verir. Getdikcə bu proses daha da dərinləşəcək, vəziyyət kəskinləşəcək. Növbəti ildə daha az həcmdə pul göndəriləcək”.
Günel CƏLİLOVA
