Bu ideya da Azərbaycanındır - İqlimlə Beynəlxalq Mübarizə Fondu növbəti addımı atdı...
Bakıda iqlim dəyişikliyinin mənfi təsirlərinə xüsusi həssas olan inkişaf etməkdə olan ölkələrə yardım məqsədilə yaradılmış İtki və Zərərə Cavab Fondunun İdarə Heyətinin növbəti iclası keçirilib.
Tədbirdə inkişaf etmiş və inkişaf etməkdə olan ölkələr, BMT və digər beynəlxalq təşkilatlar, Dünya Bankı, beynəlxalq qeyri-hökumət təşkilatlarının və həmfikir qruplardan ümumilikdə 200-ə yaxın nümayəndə iştirak edib.
Qeyd edək ki, iki aydan sonra Bakıda möhtəşəm COP-29-a ev sahibliyi edəcək. Bəllidir ki, Azərbaycan uzun illərdir iqlim dəyişikliklərinin fəsadlarının aradan qaldırılması, ətraf mühitin qorunması, şirin su ehtiyatlarının öyrənilməsi və inkişaf etdirilməsi, eyni zamanda nəsli kəsilməkdə olan heyvanların qorunması ilə yanaşı meşə massivinin yenidən salınması işlərində aktivlik göstərir.
Rövşən Abbasov: “Bu tip tədbirlər vasitəsilə dünyaya çağırış edilir ki, alternativ enerji, təmiz yaşıl iqtisadiyyata keçid edilməlidir”
Mövzu ilə bağlı fikir bildirən Ekologiya və Təbii Sərvətlər Nazirliyi yanında İctimai Şuranın üzvü, ətraf mühit məsələləri üzrə ekspert Rövşən Abbasov “Bakı-Xəbər”ə şərhində bildirdi ki, İtki və Zərərə Cavab Fondu Azərbaycanın neft istehsal edən ölkə kimi qlobal iqlim dəyişiklikləri ilə mübarizəyə ilk töhfəsidir: “Bu cür tədbirlərin ölkəmizdə keçirilməsi müsbət haldır. Bu tip tədbirlər vasitəsilə dünyaya çağırış edilir ki, alternativ enerji, təmiz yaşıl iqtisadiyyata keçid edilməlidir. İnkişaf etmiş və inkişaf etməkdə olan ölkələr yaşıl iqtisadiyyata tədricə keçməlidir”.
Flora Hacıyeva: “İqlim dəyişikliyindən zərər çəkən ölkələrə yardım göstərilməsi təqdir olunmalıdır”
Ekoloq Flora Hacıyeva “Bakı-Xəbər”ə açıqlamasında bildirdi ki, Azərbaycan qlobal iqlim dəyişikliyi ilə mübarizəyə çox böyük məsuliyyətlə yanaşır. Beynəlxalq ictimaiyyət Azərbaycanın bu sahədə həyata keçirdiyi tədbirləri, ümumilikdə iqlim dəyişikliyi ilə qlobal mübarizədə fəal iştirakını yüksək qiymətləndirir: “Məlumdur ki, iqlim dəyişikliyi ilə mübarizə çoxşaxəli prosesdir və yalnız ölkə daxilində deyil, beynəlxalq platformalarda da fəal olmağı tələb edir. Azərbaycan ötən dövrdə bu sahədə bir çox təşəbbüslə çıxış edib.COP29-a ev sahibliyi hüququnun Azərbaycana verilməsi də məhz bu etimadın nəticəsidir”.
Həmsöhbətimiz onu da əlavə etdi ki, iqlim dəyişikliyi təbiətə dəyən ziyan və insan itkiləri ilə müşahidə olunur. Bir sıra xarici ölkələrdə müşahidə olunan təbii fəlakətlər bunun bariz nümunəsidir: “Bu səbəbdən də təbii fəlakət, iqlim dəyişikliyindən zərər çəkən ölkələrə yardım göstərilməsi təqdir olunmalıdır. Bu istiqamətdə İtki və Zərərə Cavab Fondunun fəaliyyəti təqdir olunmalıdır”.
Günel CƏLİLOVA
