Aqşin Yenisey Səfəvi tarixçiləri ilə çətin müharibə açdı...
Səfəvilər dövləti tarixdə özünəməxsus iz buraxıb və bu nəhəng imperiyanın bayrağı altında böyük Azərbaycan dövləti mövcud olub. Bütün hallarda Qızılbaşlar dövləti xalqımızın qürur mənbəyidir. Ancaq təəssüf ki, müəyyən adamlar çıxıb Səfəvilərə qarşı müəyyən iddialar səsləndirir.
Məsələn, yazıçı Aqşin Yenisey iddia edib ki, Səfəvilər imperiyasının dağılmasına Səfəvi elitasının seksual pozğunluğu səbəb olub: "Səfəvilər haqqında yazılan bütün mənbələrdə bu səbəb ən başda qeyd olunur.
Səfəvi şahları, şahzadələri aylarla hərəmxanalardan çıxmırdılar. Nəticədə Lut qövmünün başına gələnlər Səfəvi dövlətinin başına gəldi: İfrat seksual həzz düşkünlüyü dövlət əxlaqını çürütdü və bu dəfə tanrı deyil, tarix vaxtilə Sodom şəhərinin başına yağan daşları Təbrizin başına yağdırdı.
Səfəvilər dağıldı..."
Faiq Ələkbərli:"Səfəvilər dövlətinin süqut etməsinin səbəbi kimi bu iftira dolu uydurmanın ortaya atılması yaxşı niyyətlərdən xəbər vermir"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru Faiq Ələkbərli "Bakı-Xəbər"ə şərhində bildirdi ki, indiki dövrdə birdən-birə Səfəvilər dövlətinin bu şəkildə hədəfə alınması suallar doğurur. F.Ələkbərlinin sözlərinə görə, bir qrup şəxs var ki, onlar Azərbaycan tarixini ləkələməklə məşğuldurlar. Səfəvilərlə bağlı səsləndirilən iddialara gəlincə, F.Ələkbərli qeyd etdi ki, A.Yeniseyin hansı "mənbələrə" istinad etdiyini bilmir, amma o "mənbələr" Səfəvi tarixini ləkələməyə yönəlib.
"Görəsən, indiki dövrdə Səfəvilər dövlətini qaralamaq, ləkələmək cəhdi kimin maraqlarına xidmət edir? Azərbaycan öz ərazi bütövlüyünü təmin edib və tarixdə ilk dəfə bütün suveren ərazilərində növbədənkənar Prezident seçkiləri keçirməyə hazırlaşır. Belə bir vaxtda yenə də hansısa qara niyyətli adamlar peyda olub yalan, iftira yayırlar, tariximizlə bağlı iftiralar danışırlar.
Qeyd edək ki, Səfəvi İmperiyasına-Qızılbaşlar dövlətinə bu cür çirkin iftiranın atılması, əsassız iddiaların səsləndirilməsi qəbuledilməzdir. Səfəvilər bir türk imperiyası, Qızılbaşlar dövləti bir türk dövləti idi. Bu dövlət də, təbii ki, türk boylarını təmsil edən türk bəylərinin və onların arxasındakı bilgələrin tövsiyəsi ilə yaranmışdı. 1501-ci ildən 1736-cı ilə qədər, yəni 200 il müddətində bu İmperiya mövcud olub. Oğuz boylarından olanlar və qismən də qıpçaq boyuna mənsub tayfalar bu dövlətin varlığının əsasında dayanıblar. Əlbəttə, burda Bayandurluların da müəyyən rolu vardı. Eyni zamanda Qacarlar, Əfşarlar, Ustaclılar, Şamlılar, Təkəlilər və başqa digər mühüm türk tayfaları bu dövlətin inkişafında mühüm rol oynayıblar. Bu dövrlərdə, əlbəttə, hökmdarların bir deyil, bir neçə xanımla evləndiyi haqda məlumatlar var. Hətta Səfəvi hökmdarlarının vəzirlərinin, vəkillərinin, hətta bəylərin bir neçə xanımı ola bilərdi, ancaq bütövlükdə Səfəvi elitasını "seksual pozğunluqda" ittiham etmək qəbuledilməzdir. Onda gərək biz eyni ittihamları Roma İmperiyasına, Bizansa, Makedoniyalı İsgəndərə, Çin dövlətlərinə, Ərəb xəlifələrinə, İngiltərəyə və sair dövlətlərə, onların hökmdarlarına, şahzadələrinə də yönəldək. Biz əgər bu məsələyə Aqşin bəyin prizmasından yanaşsaq, onda təkcə Səfəvilərdə deyil, bütün İmperiyalarda "seksual pozğunluq" olmuşdur.
Səfəvilərə yönəlik bu kimi ittihamlar, iddialar yersiz və əsassızdır. Əgər o "seksual pozğunluğu" Roma, Ərəb xilafəti, fars şahlarına yönəltsəydi bu daha uyğun və müəyyən qədər inandırıcı olardı. Amma nədən Səfəvilər dövləti, hökmdarları və şahzadələri belə iyrənc şəkildə hədəfə alınıb? Səfəvilər dövlətinin süqut etməsinin səbəbi kimi bu iftira dolu uydurmanın ortaya atılması yaxşı niyyətlərdən xəbər vermir. Bu türkə, Azərbaycan xalqına qarşı aparılan zərərli, təhlükəli kampaniyanın tərkib hissəsidir".
F.Ələkbərli ümid edir ki, A.Yenisey bunu bilərəkdən etməyib. O hesab edir ki, əgər yazıçı bilərəkdən belə İftira yayıbsa, mənəvi məsuliyyət daşıyır. "Ümid edirəm ki, Yenisey bunu bilərəkdən etməyib, əgər bilərəkdən edibsə, yaxud bunu kimlərinsə sifarişi ilə gündəmə gətiribsə bu təəssüf doğurur, bunun mənəvi məsuliyyəti böyükdür. Bu gün də fransız, rus, fars, ingilis qüvvələri antiazərbaycan mövqeyindən çəkilməyiblər və əksinə, ortalığa tariximizi qaralayan "mənbələr", nəşrlər atırlar. Bizimlə düşmən olan qüvvələr hər zaman meydana saxta mənbələr çıxarırlar. Heç bir qüvvə Səfəvilər elitasını belə çirkin işdə ittiham edə bilməz. Hər imperiyanın doğuluşu olduğu kimi çöküşü də var və bunu hansısa çirkinliyə bağlamaq düzgün deyil.
Səfəvilər imperiyası bir türk imperiyasıdır. Məhəmməd Əmin Rəsulzadənin də ifadə etdiyi kimi, Cumhuriyyət özünü Səfəvilər dövlətinin və digər türk imperiyalarının davamçısı sayıb"- deyə F.Ələkbərli qeyd etdi.
Zaur Əliyev:"Şah İsmayılın özü sarayında göbək rəqslərinə qadağa qoyub və bunu bütün qaynaqlar yazırsa, o zaman bu saxta ittihamlar nəyə lazımdır?!"
Dosent Zaur Əliyev də hesab edir ki, iddialar tamamilə əsassızdır və o, bu saxtakarlığı irəli sürənlərə müraciət edib:“O dövrə aid tikili, yaxud məkan göstərin ki, həmin yerdə hansısa bir seksual xidmət göstərilib. Əgər olubsa, demək, hansısa bir məkanı qalmalıdır da. Ən azından xarabalığı ola bilər. Göstərə bilərsiniz? YOX! Göstərə bilməzlər. Çünki olmayıb elə bir şey. Şah İsmayılın özü sarayında göbək rəqslərinə qadağa qoyub və bunu bütün qaynaqlar yazırsa, o zaman bu saxta ittihamlar nəyə lazımdır?!
Səfəvi ruhanilərinin ilahiyyatçılarla, həm də öz aralarında çox müxtəlif məsələlərlə bağlı apardıqları diskussiyalar, onların etikası, davranış tərzi, tətbiq etdikləri ayin və mərasimlər və s. barədə yüzlərlə qaynaq var. Bu cür müzakirələr aparılan bir sarayda hansı seksual pozğunluqdan danışmaq olar? Dövlətin süqut səbəbi isə Osmanlıların hücumları və buna qarşı duracaq kifayət qədər güclü ordunun olmaması idi. Sadəcə bir fakt deyim, Təbriz hamamlarının birində türk zabiti qətlə yetirildi deyə Osman paşa şəhər əhalisini bir nəfər kimi məhv etməyi əmr etdi. Gün ərzində 15-20 min nəfər öldürüldü, Təbriz ölü şəhərə çevrildi. Bu cür qəddarlıq və qırğınlar baş verən ölkədə orduya yeni qüvvə toplamaq çox çətin idi... "
Gördüyünüz kimi, tarixçilər iddiaları rədd edir və bu iddianın məqsədli şəkildə ortaya atıldığını deyirlər. Bütün hallarda, Səfəvilər dövlətinin bu cür qaralanması yolverilməzdir.
Əli TURABOV
