Populyar tiktokerlər kimlərinsə mənəvi terror alətinə çevrilir - həbslər başlayır...
Elçin Bayramlı: “Tiktok” platformasında söyüş söyən, insanları təhqir edənlər qanun qarşısında cavab verməlidir”
2018-ci ilin yanvar ayında Çində virtual dünyaya “Tik-tok” adında yeni bir sosial şəbəkə göz açdı. Dodaqla səsin sinxron hərəkəti, duet, canlı yayım və asanlıqla pul qazanmaq kimi xüsusiyyətləri olan bu körpə platforma çox keçmədən sarmaşıq kimi bütün dünyanı, o cümlədən ölkəmizi ağuşuna alaraq nəhəng bir populyarlıq qazandı.
Bu populyarlıq nəinki “Tik-tok” istifadəçilərinə, həmçinin “Tik-tok” istifadə etməyənlərə də yeni insanlar tanıtdı. Təəssüf ki, Azərbaycanda bəzi blogerlər “Tik-tok” platformasından xaricilər kimi normal qaydada deyil, kimisə söyərək, təhqir edərək populyarlıq qazanır. Bu gün bu yolu seçən tiktokerlər az deyil. Ləman adlı tiktoker bu günlərdə sosial şəbəkədə söyüş söydüyü üçün həbs edildi.
İddialar var ki, kim kimi söydürmək istəyirsə, həmin blogerlərə, tik tokerlərə pul verib söydürür. Onların çoxu da pul müqabilində tərbiyəsizlik edir, bu platforma sayəsində sərbəst şəkildə söyüş söyərək insanları təhqir edir.
“… xoşagəlməyən hərəkətləri ilə adıçəkilən platformadan qazanc əldə edirlər”
Mövzu ilə bağlı fikir bildirən sosioloq Elçin Bayramlı “Bakı-Xəbər”ə açıqlamasında qeyd etdi ki, sosial şəbəkələrin inkişafı cəmiyyətdəki bütün neqativləri üzə çıxarıb: “Artıq hər yoldan keçən insan əlinə bir telefon alıb, nə gəldi çəkir və ağzına nə gəlirsə danışır. Bu kimi şəxslər onu-bunu təhqir edərək, zərərli təbliğatlarla məşğul olurlar. Təəssüf ki, sosial şəbəkədə faydalı paylaşımlara baxış, reaksiya zəifdir. Izləyicilər elmi, faydalı məlumatlara deyil, cəmiyyət üçün zərərli olan postlara maraq göstərir. Bəzi tiktokerlər kütlənin bu şüursuzluğundan istifadə edir. Onlar kimlərisə təhqir etməklə, söyüş söyməklə və digər xoşagəlməyən hərəkətləri ilə adıçəkən platformadan qazanc əldə edir.
Onu da deyim ki, “Tik-tok” platformasında təxribat xarekterli məlumatlar, yanlış xəbərlər, zərərli təbliğatlar baş alıb gedir. Təəssüf ki, bunun qarşısını almaq olmur. Çünki kütlə həmin tiktokerlərə, blogerlərə dəstək olur”.
Həmsöhbətimiz hesab edir ki, sosial şəbəkəyə dövlət tərəfindən xüsusi diqqət edilməlidir: “Bir sıra ölkələrdə sosial şəbəkə platformalarına məhdudlaşdırıcı filtrlər qoyulub. Zərərli təbliğat aparan, kütləni pis yola çəkən səhfələr bloklanır. Əksər xarici ölkələrdə həmin adamlar dövlər tərəfindən müxtəlif formada cəzalandırılır. Qanunvericilikdə qeyd edilir ki, sosial şəbəkədə böhtan, şər, dezinformasiya, açıq söyüş, təhqir, narkotik, əxlaqsızlıq qadağandır. Qanunvericilikdə bu kimi məsələlərə yer ayrılsa da, tək-tük adamlar cəzalanır. Yaxşı olar ki, Azərbaycanın sosial şəbəkələrində zərərli təbliğatla məşğul olan tiktoker və ya blogerlər nəzarətə götürülsün. Onu da deyim ki, Çində kütləyə, izləyiciyə yalnız faydalı məlumatlar verilir. Belə ki, bu ölkədə “Tiktok” platforması ilə bağlı xüsusi filtr tətbiq edilib. Izləyicilər yalnız mədəni, elmi, maraqlı paylaşımları görə bilir. Digər paylaşımlar göstərilmir. Həmin zərərli paylaşımlar xarici ölkələrdə yayılır. Yəni Çin öz ölkəsinə yalnız faydalı ola biləcək postları göstərir. Eyni zamanda, bu ölkədə gündəlik limit 40 dəqiqə qoyulub. Bu müddət ərzində insanlar həmin platformadan faydalı şəkildə istifadə etməyə çalışır”.
Həmsöhbətimiz hesab edir ki, “Tiktok” platformasında söyüş söyən, insanları təhqir edənlər qanun qarşısında cavab verməlidir. Həmin şəxslər sərt şəkildə cəzalandırılarsa digərləri buna həvəs etməz. Ümumiyyətlə, əxlaqsızlığın yayılmasında rolu olanlarin səhifəsi bağlanmalı və qanun çərçivəsində cəzalandırılmalıdır. Yoxsa bu cür biabırçılığın qarşısı alınmaz.
Günel CƏLİLOVA
