ABŞ təcavüzkar Ermənistana “hərbi atomun” qapılarını açdı
Fikrət Yusifov: “Düşünmürəm ki, İsrailə verilən şans Ermənistana da tanınacaq”
Xəbər verildiyi kimi, yanvarın 14-də Vaşinqtonda ABŞ Dövlət Departamentində ABŞ və Ermənistan arasında strateji tərəfdaşlıq haqqında xartiya imzalanıb. İki ölkə arasında imzalanan strateji sənədin II bölməsində deyilir:
“Həyata davamlı, dayanıqlı, təhlükəsiz, bazar yönümlü enerji sektorunun əhəmiyyətini nəzərə alaraq, Ermənistan və ABŞ Ermənistanın enerji istehsalı və təchizatını diversifikasiya etmək və artırmaq imkanlarını araşdırmaq niyyətindədir. Buraya ən yüksək nüvə təhlükəsizliyi və silahların yayılmaması standartlarına uyğun mülki nüvə enerjisi proqramının hazırlanması, enerji təhlükəsizliyi və səmərəliliyinin təmin edilməsi istiqamətində səylər, o cümlədən Ermənistanın enerji balansında bərpa olunan enerji mənbələrinin payının əhəmiyyətli dərəcədə artırılması və Ermənistanın regional və Avropa bazarları ilə əlaqəsinə yönəlmiş tədbirlər daxildir”.
Bu halda, Ermənistana nüvə enerjisinin dinc məqsədlərlə istifadəsi adı altında hərbi xarakterli nüvə texnologiyaları yerləşdirə bilərlərmi? Vaxtilə İkinci Dünya müharibəsindən sonra İsrailə də bənzər formada yardım edildi və illər sonra bu ölkə nüvə dövləti oldu. Yeri gəlmişkən, ötən ay Rusiya mediası Prezident İlham Əliyevdən müsahibə götürəndə Azərbaycanın atom enerjisinə sahib olmaq istəyi ilə bağlı sual verdilər. Ölkə başçısı dedi ki, hələlik bizim buna ehtiyacımız yoxdur. Əgər Rusiya tərəfi istəsə buna baxa bilərik. Bütün bunları hamı izləyir. O baxımdan kim bilir ki, onlar qarşıdakı 50 ildə Ermənistanla bağlı nə plan cızıblar?
Sözügedən məsələni “Bakı-Xəbər”ə şərh edən sabiq maliyyə naziri, professor Fikrət Yusifov buna bir neçə prizmadan yanaşdı: “ABŞ-la Ermənistan arasında strateji tərəfdaşlığa dair bağlanan müqavilə sadəcə olaraq müəyyən məqsədlərə hesablanıb. Əsas məqsəd Ermənistanı Rusiyadan qoparmaqdır. Paşinyan hakimiyyəti Bayden administrasiyasının onlara verdiyi dəstəkdən istifadə edib çalışırdı ki, yeni hakimiyyət gələnə qədər hansısa müqavilə imzalasınlar. Nə mümkündürsə, maksimum iki ölkə arasında rəsmiləşdirsinlər. Bu sənəd də o sıradandır. Çünki Paşinyan yaxşı bilir ki, Trampın sadəcə olaraq ondan zəhləsi gedir. O bilir ki, Paşinyan Corc Sorosun yetirməsidir. Trampın da Sorosa böyük nifrəti var. Ona görə də Tramp Paşinyanı bir rəhbər kimi həzm etmir. Təbii ki, həmin sazişdə çox şeylər nəzərdə tutulub. Ancaq bu o demək deyil ki, orada nəzərdə tutulanların hamısı işləyəcək. Əsas saziş deyil. Əsas olan o sazişin necə işləməsidir. Düşünmürəm ki, İsrailə verilən şans Ermənistana da tanınacaq. Çünki indi dünya başqadır və Ermənistan elə bir önəmli geosiyasi əhəmiyyətə malik ölkə deyil. Ən azından, Rusiya Ermənistanın nüvədən hərbi məqsədlər üçün istifadə etməsinə imkan verməz. Türkiyə isə buna heç imkan verməz. O baxımdan hesab etmirəm ki, bu baş versin. Ermənistan elə bir coğrafi mövqedə yerləşir ki, belə bir addım bu ölkə üçün fəlakətli olacaq. Düzdür, Ermənistan nüvə silahına sahib olmaq istəyər. Bunu populist erməni siyasiləri də bəyan edir, amma reallıqda onlara belə bir imkan verilməz”.
Vidadi ORDAHALLI
