Qəzza zolağında atəşkəs razılaşması əldə olundu... - Tramp elan etdi...
Qəzza zolağında atəşkəs razılaşması əldə olunub. Bu barədə sosial mediada paylaşım edən ABŞ-ın yeni seçilmiş prezidenti Tramp İsrail və HƏMAS arasında razılığa gəldiyini açıqlayıb.
"Yaxın Şərqdə məhbuslarla bağlı (Qəzzada atəşkəs) razılıq əldə olunub. Qısa zamanda azad olunacaqlar. Təşəkkür edirəm" deyə Tramp bildirib.
Tramp sonrakı açıqlamasında isə atəşkəs razılaşmasını 5 noyabr 2024-cü il prezident seçkilərində qalib gəlməsi ilə əlaqələndirib. "Bu atəşkəs razılaşması yalnız noyabrda əldə etdiyimiz tarixi qələbə nəticəsində baş verə bilərdi" deyən Tramp onun administrasiyasının “sülh axtarışında” olduğunu və bunu bütün dünyaya göstərəcəklərini bildirib.
Tramp Yaxın Şərq üzrə xüsusi nümayəndə Stava Vitkoffa da təşəkkür edib və "Qəzzanın bir daha terrorçular üçün təhlükəsiz sığınacağına çevrilməyəcəyinə əmin olmaq" üçün İsrail və digər müttəfiqlərlə yaxından işləməyə davam edəcəklərini vurğulayıb.
Razılaşmaları daha da genişləndirməyə davam edəcəklərini deyən Tramp bildirib ki, bu, Amerika və dünya üçün gözlənilən böyük işlərin yalnız başlanğıcıdır.
Bu arada, “Reuters” xəbər agentliyi razılaşmanın təfərrüatlarını paylaşıb.
- Buna görə atəşkəsin davam etdiyi hər gün 50-si yanacaq daşıyan 600 yardım maşını Qəzzaya daxil olacaq. Yük maşınlarından 300-ü zolağın şimalına göndəriləcək.
- İsrail 2023-cü il oktyabrın 7-dən bəri həbsdə olan 19 yaşından kiçik bütün fələstinli qadın və uşaqları birinci mərhələnin sonuna qədər azadlığa buraxacaq.
- HƏMAS razılaşmanın ilk günündə üç israillini azad edəcək. Bundan əlavə, birinci mərhələdə 33 israillini sərbəst buraxacaq.
- İsrail hər mülki şəxsə görə 30, hər israilli qadın əsgərə qarşılıq 50 fələstinli məhbusu azad edəcək. Bu, da həbsdə olan 1000-dən çox fələstinlinin azadlığa çıxması deməkdir.
- Razılaşmanın birinci mərhələsində İsrail qüvvələri tədricən Qəzzadan çəkiləcək və köçkün fələstinlilər öz evlərinə qayıdacaq.
- Atəşkəsin 16-cı günündə bütün israillilərin azad edilməsi və İsrail ordusunun tamamilə geri çəkilməsi məqsədi ilə razılaşmanın növbəti mərhələləri üzrə danışıqlar başlayacaq.
O da bildirilir ki, İsrailin təhlükəsizlik kabineti Qəzzada atəşkəs və məhbus mübadiləsi razılaşmasını təsdiqləmək üçün sabah səhər toplanacaq. Bildirilir ki, atəşkəs və məhbus mübadiləsinə dair saziş təhlükəsizlik kabinetinin iclasından sonra təsdiq olunmaq üçün hökumətə təqdim olunacaq.
İsrailin “Maariv” qəzeti İsrail rəsmisinə istinadən yazıb ki, atəşkəs razılaşması təhlükəsizlik kabinetində, nazirlər kabinetində və hökumətdə çoxluq tərəfindən dəstəklənir.
TAHİR
