Türk dövlətlərinə təhlükə - Əliyevin çağırışı hələ çox müzakirə olunacaq...
Azər Həsrət: “Dünyada bir sıra təhlükə və təhdidlərin artdığı bir dövrdə hərbi sahədə birgə əməkdaşlıq vacibdir”
Əfsuslar olsun ki, bu gün dünyanın müxtəlif bölgələrində beynəlxalq hüquq normaları kobudcasına pozulur. Bu fikri Azərbaycan Prezidenti İlham Əliyev Türk Dövlətləri Təşkilatının “Türk Əsri” çağırışı altında noyabrın 3-də Astanada keçirilən 10-cu yubiley Zirvə görüşündə çıxışında deyib.
Müharibələrin, qanlı münaqişələrin alovlandığını qeyd edən Prezident İlham Əliyev bildirib: “Belə olan halda, ilk növbədə, ölkələrin müdafiə potensialı təhlükəsizliyin əsas zəmanətinə çevrilir. Hesab edirəm ki, üzv ölkələr arasında təhlükəsizlik, müdafiə, müdafiə sənayesi kimi sahələrdə əməkdaşlıq daha da artmalıdır”.
Ümumilikdə, türk dövlətləri arasında hərbi müdafiə sahəsində əməkdaşlığın gücləndirilməsini zəruri edən amillər hansılardır?
“Digər məsələlər qədər, ortaq təhlükəsizlik də önəmli məsələdir”
Sözügedən məsələni “Bakı-Xəbər”ə şərh edən siyasi şərhçi Azər Həsrət hesab edir ki, Prezident İlham Əliyevin bununla bağlı fikirləri təsadüfi deyil: “Bunlar gələcək üçün yol xəritəsidir və işartılarıdır. Türk Dövlətləri Təşkilatı qurulduğu və fəaliyyət göstərdiyi bu illər ərzində dünya türklüyünün müdafiəsini əsas məsələ kimi seçib. Yəni türk dövlətləri onun üçün bir araya gəlirlər ki, birincisi, bizim ortaq maraqlarımızı müdafiə etmək daha asan olsun. İkincisi, dünyaya türk kimliyimizi daha rahat və uyğun şəkildə təqdim edək. Üçüncü bir tərəfdən də, tarixin bu və ya digər mərhələlərində qopmuş bağlarımızı bərpa edək. Çünki biz, bütövlükdə eyni millətik. Dünyanın o başından bu başına, böyük bir coğrafiyada yaşayan türk xalqları eyni millətin parçalarıdır. Bu parçaları bizi istəməyənlər mərhələ-mərhələ paramparça ediblər. Nəticədə bizi ayrı salıblar. İndi artıq biz TDT-də birləşməklə bütövlüyümüzü təmin edirik. Belə olan halda, əlbəttə ki, güvənlik məsələləri prioritet olmalıdır. Xüsusən də hərbi sahədə birgə əməkdaşlıq vacibdir və gərəklidir. Çünki dünya düzəni yenidən şəkillənir. Bir sıra təhlükələr və təhdidlər artır. Necə ki, bir sıra beynəlxalq dövlətlərarası qurumlar özlərinin ortaq təhlükəsizlik məsələlərini birlikdə həll edirlər, biz də türk dövlətləri olaraq bunu etməliyik. Başqa çıxış yolumuz yoxdur. Təsəvvür edin ki, TDT-nin ən ucqar dövləti olan qardaş Qırğızıstanın elə də böyük potensialı yoxdur. Əsasən də ordu potensialı. Qırğızıstan təkbaşına qalarsa, onun üzərinə gələn yad qüvvələr həvəslənə bilər. Ancaq Qırğızıstan TDT-nin vahid təhlükəsizlik sistemində yer alarsa, o zaman potensial təhdidlər önlənəcək. Bu baxımdan Prezident İlham Əliyevin qaldırdığı məsələ vacib əhəmiyyət kəsb edir. Burada sadəcə Azərbaycanın təhlükəsizliyi məsələsi deyil, digər qardaş türk dövlətlərinin təhlükəsizliyinin də ortaq şəkildə həll edilməsi üçün yol xəritəsinin işartılarını verməkdədir. Naxçıvanda 2009-cu ildə TDT-nin təməlləri atılanda o vaxt biz deyirdik ki, yolumuz ortaq məsələlərin birlikdə həllinə doğru gedir. Yəni sohbət təkcə siyasi-iqtisadi əməkdaşlıqdan getmir. Burada söhbət həm də hərbi sahədə əməkdaşlıqdan gedir. Çünki bu da digər məsələlər qədər vacib əhəmiyyət kəsb edir. Ortaq təhlükəsizlik önəmli məsələdir. Prezident İlham Əliyev zamanı qabaqlayan lider olaraq bu məsələləri dilə gətirdi. Ona görə də sözümüz imzamızdır deyən bir liderin ideyaları havada qalan deyil. Necə ki, onun bütün ideyaları gerçəkləşib, bu sözləri də həyata keçəcək”.
Vidadi ORDAHALLI
