Şəhid əmisi Milli Qəhrəman idi, özü kəşfiyyatçı kimi şəhid oldu - Anası Aynur xanım...
Aynur Rzayeva: “Əmisinin şəhid olduğu Füzuli bölgəsində 26 il sonra Məhəmməd-Nadir də şəhid oldu”
Sən gedəli dörd il oldu, ay oğul! Bir ananın dörd il bu ayrılığa, hicrana dözməsinin nə demək olduğunu bu ağrını çəkənlər bilər.
Oğul, oğul, deyib gözlərəm hər gün
Gəlməzsən, yolların bağlıdır balam!
Dörd bahar, dörd yay, dörd payız, dörd qış ötür bu hicranın düşdüyü gündən. Amma Aynur xanım hələ də inana bilmir ki, oğlu bir daha evinə, ocağına qayıtmayacaq. Hər gün gözləri yol çəkir. Ana ümidi heç zaman ölmür axı.
Bu dəfə Azərbaycan Ordusunun Xüsusi Təyinatlı Qüvvələrinin kəşfiyyatçısı, 44 günlük Vətən müharibəsində şəhid olmuş Məhəmməd-Nadir İlqar oğlu Rzayevin qısa, amma zəngin mübarizə örnəkləri ilə dolu ömürlüyünə yol salacağıq.
O, 18 noyabr 1994-cü ildə Sumqayıt şəhərində anadan olub. 2001-2012-ci illərdə Sumqayıt şəhər 17 saylı tam orta məktəbdə təhsil alıb.
Məhəmməd-Nadir Rzayev 2012-ci ildə Azərbaycan Silahlı Qüvvələrinin sıralarında hərbi xidmətə yollanıb. O, 2014-cü ildən artıq Xüsusi Təyinatlı Dəstələrin tərkibində müddətdən artıq həqiqi hərbi xidmət qulluqçusu idi.
Azərbaycan Ordusunun əsgəri olan Məhəmməd-Nadir Rzayev 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Füzulinin və Cəbrayılın azadlığı uğrunda gedən döyüşlərdə mərdliklə vuruşaraq şücaətlər göstərib.
Məhəmməd-Nadir Rzayev 15 oktyabr 2020-ci ildə Füzuli rayonu istiqamətində gedən qanlı döyüşlərdə qəhrəmancasına şəhadətə ucalıb.
Azərbaycan Prezidenti İlham Əliyevin müvafiq sərəncamlarına əsasən Məhəmməd-Nadir Rzayev ölümündən sonra "Vətən uğrunda", "Füzulinin azad olunmasına görə" medalları ilə təltif edilib.
“Mən də bir şəhid anası kimi oğlumun qəhrəmanlığı ilə fəxr edirəm”
Əvvəlcədən deyək ki, Məhəmməd-Nadirin anası Aynur xanımla Xatirə Kitabı Redaksiyasının hazırladığı “44 gün – Tarixi zəfər” adlı kitabın III cildinin Müharibə, Əmək və Silahlı Qüvvələr Veteranları Təşkilatında keçirilən təqdimat mərasimində həmsöhbət olduq.
Məhəmməd-Nadir əmisi, Milli Qəhrəman Nadir Rzayevin adını daşıyıb. Nadir Birinci Qarabağ müharibəsində şəhid olduqdan sonra Rzayevlər ailəsində bir oğul da dünyaya gəlib, ailə deyib ki, Tanrı bir oğulu bizdən aldı, amma əvəzinə başqa bir oğul verdi. Körpəyə igid əmisinin adı verilir. Amma onlar nə biləydilər ki, Uca Tanrı Nadir əmisinin taleyini də bu körpəyə yazıb. “Oğlum 44 günlük Vətən müharibəsində şəhid olub. Məhəmməd-Nadir 18 noyabr 1994-cü ildə doğulub. 1994-cü ilin yanvarında da qaynım şəhid olub. Oğlum şəhid əmisi Nadir Rzayevin adını daşıyrdı. Yəni oğlum əmisi şəhid olandan sonra dünyaya gəlib. Şəhid əmisinin adını qoyduq, onunla eyni taleyi də yaşadı. Əmisinin şəhid olduğu Füzuli bölgəsində 26 il sonra Məhəmməd-Nadir də şəhid oldu. Yəni əmisinin taleyini yaşayıb, hər iki qəhrəman eyni amal uğrunda eyni bölgədə şəhidlik zirvəsinə yüksəlib”.
Oğlunun Xüsusi Təyinatlı Qüvvələrin kəşfiyyatçısı olduğunu deyən Aynur Rzayeva onun necə şəhid olmasından danışarkən bildirdi ki, Məhəmməd-Nadir şəhid olan döyüşçü yoldaşının nəşini götürmək üçün irəli gedib. “İlk dördlükdə onlar postun alınmasında iştirak ediblər. Yoldaşlarından biri orda şəhid olub, o, döyüş yoldaşının nəşini çıxarmaq üçün irəli gedib. Həmin vaxt da “geri çəkil” komandası verilib, o, neytral zonada sağ olaraq qalıb, geri qayıda bilməyib.
17 gündən sonra bildik ki, oğlumuz qəhmancasına şəhid olub. Orada şəhadətə ucalan dörd oğuldan biri mənim oğlum olub. Onu axtarmaq üçün Füzuli bölgəsinə yollandım, orda nəməlum şəhidlərin içində oğlum tanındı. Mənim oğlumun kürəyində bayraq simgəsi olub, ondan tanındı. Onun necə qəhrəman olduğu bundan da bilinir, bu onların qəhrəmanlığını sübut edir. Mən də bir şəhid anası kimi oğlumun qəhrəmanlığı ilə fəxr edirəm. Qürur duyuram ki, oğlum 44 günlük müharibədə canını Vətən uğrunda fəda edib və Azərbaycanı qalib ölkə olaraq tanıdıb. Ona görə də, bir ana kimi onunla qürur duyuram və onun qəhrəmanlığı ilə təsəlli tapıram”.
Oğlunun adının əbədiləşdirildiyini deyən ana qeyd etdi ki, yaşadıqları Corat bağlarında oğulunun adı əbədiləşdirilib, ona abidə qoyulub. “Mənə elə gəlir ki, şəhidlərimiz əbədi olaraq yaşayır. Özümüz də, xalqımız da, dövlətimiz də onların əbədi yaşaması üçün əlimizdən gələni edəcəyik”.
Məhəmməd-Nadir şəhid olsa da, onun adı ilə anası əbədi olaraq qürir duyur. Oğlunun 7 il idi ki, hərbidə xidmət etdiyini deyən ana bildirdi ki, o, peşəkar hərbiçi kimi qar-yağış demədən ucqar ərazilərimizdə Vətəni qoruyub. “Oğlum kəşfiyyatçı, rabitəçi və Xüsusi Təyinatlı idi”-deyə ana bildirdi.
İllər keçəcək, amma Məhəmməd-Nadir kimi oğullar unudulmayacaq, bu xalqın yaddasında əbədiyyən yaşayacaq. Vətən o oğulları heç vədə unutmur!
İradə SARIYEVA
