Sifarişli taksilər mübahisəli "qiymət taktikasına" başlayıblar... - mənzil başında fərqli qiymət...
Son zamanlar taksi sifariş verənlər qiymətin bahalaşmasından giley edir. Sərnişinlər qeyd edir ki, taksi sifariş verən zaman bir qiymət təyin olunur, ünvana çatanda isə qiymət dəyişir. Bu isə müştəri və sürücü arasında mübahisəyə səbəb olur.
Maraqlıdır, taksi sifarişi verərkən əvvəlcədən göstərilən məbləğ niyə artır?
Aslan Əsədov: “Taksi şirkətləri, aqreqatorlar, sürücülər daim diqqətdə saxlanılmalıdır, nəzarət olmazsa məlum hadisələrin sayı daha da artacaq”
Nəqliyyat eksperti Aslan Asədov “Bakı-Xəbər”ə şərhində bildirdi ki, bu kimi hallar insanları narahat edir: “Belə halların baş verməsi insanlarda və cəmiyyətdə qəzəbə səbəb olur. Bu kimi hadisələrin baş verməməsi üçün aidiyyəti qurumlar daha sərt münasibət sərgiləməlidir və ciddi nəzarət etməlidir. Taksi şirkətləri, aqreqatorlar, sürücülər daim diqqətdə saxlanılmalıdır. Nəzarət olmazsa məlum hadisələrin sayı daha da artacaq”.
Fərid Həşimov: “Süni qiymət artımının olması düzgün deyil”
Nəqliyyat eksperti Fərid Həşimov “Bakı-Xəbər”ə təsdiqlədi ki, taksi sifarişi verərkən əvvəlcədən göstərilən məbləğ bəzən artır: “Sosial şəbəkədə yayılan məlumatlara əsasən, sərnişin taksi sifariş verərkən bir qiymət yazılır, ünvana çatanda isə ondan başqa qiymət tələb olunur. Sərnişinlər qiymətin nə səbəbdən artdığını soruşanda sürücülər bunu yolda işıqfor və ya tıxacda gözləməklə izah edir. Bəllidir ki, Bakı tıxac şəhəridir. Bu kimi məlumatlar öncədən sərnişinə verilərsə hər iki tərəf arasında narazılıq yaşanmaz. Yaxşı olar ki, aidiyyətiı qurumlar məlum məsələni diqqətə alsın. Belə davam edərsə insanların taksiyə inamı qalmaz”.
Ekspert onu da əlavə etdi ki, öncədən taksi şirkəti ilə müştəri arasında razılaşmış müqavilə olmalıdır. Süni qiymət artımının olması düzgün deyil. Bu zaman sürücü öncədən müştərini xəbərdar edir: “Yaxşı olar ki, bu kimi halla qarşılaşan sərnişinlər AYNA-nın "141" Çağrı Mərkəzinə müraciət etsin. Ümumiyyətlə, istənilən haqsızlıqla üzləşən şəxs haqqını tələb etməlidir. Aidiyyəti qurumla əlaqə yarada bilməyən vətəndaş dərdini sosial şəbəkə vasitəsilə ictimailləşdirə bilər”.
Günel CƏLİLOVA
