"Nüvə energetikası enerji müstəqilliyinin açarıdır" - Konqresmen
Nüvə Yanacağı Təhlükəsizliyi Qanunu vasitəsilə nüvə energetikasının potensialının möhkəmləndirilməsi xüsusi önəm daşıyır. Trend xəbər verir ki, bunu ABŞ konqresmeni Avqust Flüger COP29 çərçivəsində keçirilən mətbuat konfransı zamanı deyib.
"Keçən həftə amerikalıların böyük əksəriyyəti Prezident Donald Trampın enerji dominantlığını bərpa etmək vədini dəstəklədi", - deyən Flüger energetikanın genişlənməsinin yeni dövrünə inamını qeyd edib.
O əlavə edib ki, qlobal enerji ehtiyacları artmaqda davam edəcək və Birləşmiş Ştatlar emissiyaları azaltmaqla və iqtisadi artımı təşviq etməklə yanaşı, onları qarşılamağa hazırdır.
Konqresmen ABŞ-nin ekoloji sahədə mühüm nailiyyətlərini qeyd edib.
Onun sözlərinə görə, ölkənin enerji sektorundan karbon qazı emissiyaları 2007-ci ildən 14,5 faiz, elektrik enerjisi sektorundan isə 28 faizdən çox azalıb. Üstəlik, 1970-ci ildən bəri havadakı zərərli çirkləndiricilərin miqdarı, demək olar ki, 80 faiz azalıb.
“Bu nailiyyətlər onu göstərir ki, ətraf mühitin mühafizəsi iqtisadi tərəqqi ilə paralel gedə bilər", - o bildirib.
Flüger xüsusi olaraq Nüvə Yanacağı Təhlükəsizliyi Qanununa diqqət yetirib.
Onun sözlərinə görə, bu qanun ölkə daxilində uran istehsalını gücləndirəcək, xarici təchizatçılardan asılılığı azaldacaq və ölkənin karbon emissiyasız elektrik enerjisi tələbatının əhəmiyyətli bir hissəsini təmin edəcək.
"Bu iki partiyanın birgə səyləri bizim enerji müstəqilliyimiz üçün həlledici əhəmiyyət daşıyır", — deyə o vurğulayıb.
