Belarus "Sloboda"dan imtina etdi - bizim bazarda isə bu yağlar hələ də qalır...
Ərzaq məhsullarının keyfiyyəti əhalini daha çox narahat edir. Ölkənin ticarət mərkəzlərində satılan ərzaqların çoxunun mənşəyi, tərkibi, istifadə müddəti vətəndaşları təşvişə salır. Belə məhsullardan biri də əksər yeməklərin hazırlanmasında və insan orqanizmində əvəzedilməz nemət olan yağdır.
Ekspertlərin fikrincə, hər bir insan gün ərzində ən azı 100 qram yağ qəbul etməlidir. Bu şərtlə ki, həmin yağ keyfiyyətli olsun. Bu gün market və dükanlarda müxtəlif adda kərə və duru yağ satılır. Həmin yağların nə dərəcədə keyfiyyətli olub-olmaması isə sual doğurur.
Bu günlərdə Rusiyanın Belqorod vilayətində istehsal olunan təmizlənməmiş günəbaxan yağı “Sloboda” barədə narahatedici məlumatlar yayılıb. Belarus Respublikasına idxal edilən “Sloboda” əmtəə nişanlı günəbaxan yağı partiyalarının Belarus Respublikasının dövlət standartının tələblərinə uyğun olmaması səbəbindən bu ölkədə satışının qadağan edilməsi barədə qərar verilib. Məlumatda yağların Gömrük İttifaqının “Qida məhsullarının təhlükəsizliyi haqqında”, “Yağ və yağ məhsulları üçün texniki reqlamentlər”, GOST 1129-2013 “Günəbaxan yağı” texniki reqlamentinin tələblərinə cavab vermədiyi göstərilib.
Qeyd edək ki, hazırda Azərbaycan bazarında kifayət qədər “Sloboda” yağları var. Hətta ölkənin ən böyük ticarət şəbəkələrində bu yağa rast gəlmək mümkündür.
Eyyub Hüseynov: “Digər ölkələrdə istehlakı qadağan edilən “Sloboda” yağlarına qarşı ölkəmizdə də həssaslıq göstərilməlidir”
Azad İstehlakçılar İctimai Birliyinin sədri Eyyub Hüseynov “Bakı-Xəbər”ə açıqlamasında bildidi ki, “Sloboda” haqqında verilən qərar məntiqlidir. Çünki az təmizlənmiş yağ uzun müddət saxlanıla bilməz: “Təhlükəli və keyfiyyətsiz mal anlayışı müəyyən partiyalara aiddir. Çox təəssüf ki, Belarus tərəfi qərarın məhsulun hansı partiyalarına aid olduğunu açıqlamır. Buna görə də istehlakı qadağan edilən yağ partiyalarının Azərbaycana da daxil olması istisna olunmur. Digər ölkələrdə istehlakı qadağan edilən “Sloboda” yağlarına qarşı ölkəmizdə də həssaslıq göstərilməlidir. Çünki bu yağ illlər boyu Azərbaycanda da satılıb. Belədirsə, Azərbaycanda bu məsələyə reaksiya verilməlidir”.
Fərqanə Nağıyeva: “Marketlərdə satılan bitki və heyvan mənşəli yağlar arasında keyfiyyətsiz olanları çoxdur”
Qida eksperti Fərqanə Nağıyeva “Bakı-Xəbər”ə şərhində bildirdi ki, bu gün market rəflərində çox sayda duru yağa rast gəlmək olar: “Marketlərdə satılan bitki və heyvan mənşəli yağlar arasında keyfiyyətsiz olanları çoxdur. Yağ insan orqanizmi üçün faydalı qidalardandır. Xüsusilə də, mikro və makro elementlərlə zəngin olan yağlar orqanizmə gündəlik lazım olan kalori miqdarının 25-30 faizini təmin edir. Bir qram yağ orqanizmdə 9 kalori olaraq hesablanır. Bu yalnız faydalı yağlar olduqda insana fayda verə bilər. Doymuş yağlar insan orqanizmində xolesterin səviyyəsini qaldırır ki, bu da bir çox xəstəliklərə səbəb olur. Doymuş yağlar əksər hallarda heyvan mənşəli qidalarda olur. Keyfiyyətsiz yağlar insanda ilk növbədə ürək-damar xəstəliklərinə, eyni zamanda infarkt və erkən ölümə səbəb olur. Ona görə də, keyfiyyətli yağlardan istifadəyə diqqət edilməlidir. Təhlükəli hesab edilən bütün yağlar satışdan çıxarılmalıdır”.
Günel CƏLİLOVA
