Olimpiadanın qızıl medalçısı məktəbli Xəlilzadə Hüseynin arzusu... - FOTO
Hüseyn Xəlilzadə: “Böyüyəndə kibertəhlükəsizlik mütəxəssisi olmaq istəyirəm”
Hər bir uşaq seçilmək, fərqlənmək istər. Hərəsi bir cür özünü isbatlamağa çalışır, biri əlaçı olmaqla, bütün fənləri yüksək səviyyədə oxumaqla, başqa birisi idmanla, şahmatla, digərləri musuqi və incənətlə...
Hər uşağa Tanrı bir cür istedad verir. “Bakı-Xəbər”də təhsildə, olimpiadalarda, idmanda, incəsənətdə nəticələr göstərən uşaqların uğurları barədə ardıcıl olaraq yazılar işıq üzü görür. Biz uğurlu həyat hekayəsi olan uşaqları cəmiyyətə təqdim etməklə həm onları tanıdırıq, onlara stimul veririk, həm də bu örnək balalardan başqa övladlarımızın da nümunə götürməli olduqlarını düşünürük. Çünki belə uşaqlar hər zaman örnəkdir, yaxşı nümunədir.
“Olimpiadaya anamın dəstəyi ilə qoşuldum və uğur qazanaraq qızıl medal aldım”
Barəsində danışacağımız balalarımızdan biri də Xəlilzadə Hüseyn Sədiyar oğludur. 2012-ci ildə Bakı şəhərində doğulan Hüseyn 246 nömrəli tam Orta Məktəbin VII sinif şagirdidir. Hüseyn Xəlilzadə riyaziyyatı da, informatikanı da, başqa fənləri də yaxşı oxuyur. Hüseyn deyir ki, elmlərin açarı riyaziyyatdır, informatikanı bilməklə isə bütün dünyanı öyrənmək olar. “Riyaziyyat və informatika fənlərinin mənim üçün ayrıca bir anlamı var. Ən sevdiyim fənn isə informatikadır”.
İnformatikaya olan marağı və sevgisi nəticəsində Respublika Fənn Olimpiadasına (RFO) qoşulan Hüseyn deyir ki, RFO-da iştirak etmək ən böyük arzusu olub. “İnformatika üzrə keçirilən Respublika Fənn Olimpiadasında iştirak etmişəm və birinci yerə layiq görülmüşəm. Olimpiadaya anamın dəstəyi ilə qoşuldum və uğur qazanaraq qızıl medal aldım. Anam hər zaman mənə dəstək olur və məni düzgün istiqamətdə yönəldir. Bu da, əlbəttə, mənə ruh verir. Anamın dəstəyi öz üzərimdə daha çox işləməyim üçün böyük stimuldur. Biləndə ki, sənin arxanda ən doğma adamın durur, sənə inanır, səni dəstəkləyir, onda özünü daha inamlı hiss edirsən.
Mən böyüyəndə kibertəhlükəsizlik mütəxəssisi olmaq istəyirəm. Ona görə də, böyüyəndə kibertəhlükəsizlik üzrə təhsilimi davam etdirmək istəyirəm”-deyə H.Xəlilzadə bildirdi.
Hüseyn öz biliyi, istedadı ilə uğur qazanan şagirdlərimizdəndir. Ona uğur qazanmaq yollarında anası ilə yanaşı təhsil aldığı məktəbin rəhbərliyi, eləcə də müəllimləri dəstək verir.
“Mən 246 nömrəli Orta Məktəbin direktoru hörmətli Elmar Həşimova çox təşəkkürümü bildirirəm. Çünki olimpiadada iştirakıma dəstək oldu və onun dəstəyilə biliyimi daha da artırıb qalib oldum.
İnformatika müəllimlərim Mehdi müəllimə və Aysel müəlliməyə də çox təşəkkür edirəm. Onların öyrətdikləri nəticəsində qızıl medal qazana bildim”.
Hüseyn deyir ki, uğurlarında ailəsinin və müəllimlərinin verdiyi dəstəyin çox böyük rolu olub. Hüseynin hədəfi bir Azərbaycan məktəblisi kimi daha nüfuzlu beynəlxalq olimpiadalarda iştirak etmək, medallar, sertifikatlar qazanmaqdır.
Hər bir məktəblimizin uğuruna sevinməliyik. Onların yaşlarının az olmasına baxmayaraq, artıq uğur hekayələrinin ilk səhifələri qızıl hərflərlə yazılıb.
Hüseyn Xəlilzadəyə daha böyük uğurlar arzulayırıq və inanırıq ki, o, gələcəkdə kibertəhlükəszilik üzrə mütəxəssis olacaq, ölkəmizə böyük faydalar verəcək.
Yolun açıq olsun, Hüseyn!
İradə SARIYEVA
