Təcili - Ukrayna ordusu Moskvanı tutmağı hədəflədi...
Ramil Məmmədli: “Ukraynanın Rusiyanın Kursk vilayətinə daxil olması ümumi mənada müharibənin gedişatına heç bir təsir göstərməyəcək”
Ukrayna silahlı qüvvələrinin son sutka ərzində Kurskda irəlilədiyi, yeni ərazilər ələ keçirdiyi iddia edilir. Diqqətçəkən məqam Kurskla Rusiyanın paytaxtı Moskva arasında məsafənin təxminən 500 km olmasıdır. Rusiya kimi böyük əraziyə malik bir ölkə üçün bu məsafə az hesab olunur və versiyalardan biri Kiyevin hücum hədəfinin məhz Moskvaya istiqamətlənməsidir.
Maraqlıdır, Ukraynanın hədəfi Kurskdan Moskva istiqamətində hücum ola bilərmi?
Hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki, Kreml üçün Ukrayna ordusunun Rusiyanın dövlət sərhədlərini keçməsi sözün əsl mənasında, gözlənilməz olub: “Çünki Kremldə Ukrayna ordusunun belə genişmiqyaslı hərbi əməliyyatlara yetəcək potensiala sahib olduğuna şübhə edirdilər. Hətta baş verənlərə ilkin siyasi reaksiyalar Rusiyanın hakim dairələrində savaşın belə radikal inkişaf istiqamətlərini istisna edirdilər. Və rəsmi Kiyevin belə risqli taktika seçməyə cəsarət edə biləcəyinə də ehtimal vermirdilər.
Onu da qeyd etmək lazımdır ki, Kreml Rusiya ərazisinə girmiş Ukrayna ordusunun ölkə sərhədlərindən kənara çıxarılması məsələsində mümkün qədər tələsmək məcburiyyətindədir. Çünki Ukrayna ordusunun Kursk və Belqorod vilayətlərində irəliləməsi və ya bəzi yaşayış məntəqələrini nəzarət altında saxlaması Rusiyanın beynəlxalq imicinə sarsıdıcı zərbələr vurmağa başlayıb. Bu səbəbdən də, Kreml mümkün qədər tez bir zamanda savaşı Rusiya ərazisində sona çatdırmağa çalışır.
Ukraynanın Rusiyanın Kursk vilayətinə daxil olması ümumi mənada müharibənin gedişatına heç bir təsir göstərməyəcək. Rusiya indiyə kimi Ukraynanın 62 min kv kilometr ərazisini işğal edib. Ukrayna isə neçə gündür Rusiyanın sadəcə min kv kilometr ərazisini ələ keçirə bilib. Rəsmi Kiyevin bu addımında simvolik məna var. Sadəcə, müharibəni Rusiyanın ərazisinə keçirmək istəyir. Moskvaya çatmağa hələ çox var”.
Məhəmmədəli QƏRİBLİ
