İranın Qafan konsulu ermənilər barədə Pezeşkiandan ötkəm danışdı...
Ramil Hüseynov: “Konsul bununla erməniləri arxayın edir ki, azərbaycanlının prezident olmasından narahat olmayın”
İran və Ermənistan arasında dostluq münasibətləri tarixi minillikləri əhatə edir, biz həmişə bir yerdə olmuşuq. Bu sözləri İranın Qafandakı baş konsulu Mürtəza Abidin Varamin erməni mediasına geniş müsahibəsində deyib.
O bildirib ki, dünyada ölkələr və liderlər arasında bizdəki kimi sıx dialoqun nümunələri çox azdır: “Bu, Ermənistanın bizim üçün əhəmiyyətini göstərir. Və bu münasibətlərin düşmənləri var”.
Varamin İranda prezidentin dəyişməsinin (azərbaycanlı Pezeşkianın İran prezidenti olmasının) Ermənistanla münasibətlərə heç bir təsir etməyəcəyini vurğulayıb: “İran qanunvericiliyi elə qurulub ki, prezidentin dəyişməsi heç nəyi dəyişməyəcək”.
Varamin onu da qeyd edib ki, İran-İsrail gərginliyi Tehranın Cənubi Qafqaza diqqətinin zəifləməsinə gətirib çıxarmayacaq: “Baxmayaraq ki, müxtəlif ölkələr İranın diqqətini yayındırmağa çalışır. Üstəlik, elə ölkələr var ki, bu regiondan minlərlə kilometr aralıda yerləşsələr də, yerli proseslərə müdaxilə edərək Ermənistanı strateji qarşıdurma zonasına çevirmək istəyirlər. Bu ölkələr və bu insanlar burada olmamalıdır”.
Gör bunlara necə təlimat verilib ki, İran konsulu prezidentin adından belə danışır. Bununla ermənilərə demək istəyir ki, azərbaycanlı bir şəxsin prezident olması əsla sizi narahat etməsin. Yəni İran Ermənistanla bağlı əvvəlki siyasətinə sadiq qalacaq.
“Bu o deməkdir ki, İran hər zaman olduğu kimi Ermənistanın arxasında duracaq”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, bütün bunlar fars şovinizminin bariz nümunəsidir: “Məsələ ondadır ki, İran çoxmillətli dövlət olsa da, bu dövlətin əsasında fars şovinizmi dayanır. Hər zaman belə olub. 1979-cu ildə baş verən islam inqilabından sonra da siyasət bunun üzərində qurulub. İslam ümmətindən dəm vursalar da reallıqda fars şovinizmə söykənən siyasət yeridirdilər. Kimsə tarixdə baş verənləri inkar edə bilməz. Birinci Qarabağ müharibəsində Ermənistanın duruş gətirməsində, ərazilərimizi işğal etməsində İranın da az payı olmayıb. Ermənistanın birinci prezidenti Levon Ter-Petrosyan müsahibələrində açıq deyirdi ki, İran olmasaydı 1994-1995-ci illərdə ölkəsi üçün iqtisadi fəlakət olardı. Ermənistanın ağır sosial-iqtisadi vəziyyətdən çıxarılmasında İranın xidmətləri böyük olub. Tehran rejimi bu gün həmin siyasəti davam etdirir. İran üzləşdiyi kəskin siyasi-iqtisadi problemlərin həll yolunu tapmaqdansa, Zəngəzura fokuslanıb. Hamıdan tez Qafanda konsulluq açıb. Əminəm ki, İranın Qafandakı baş konsulu Mürtəza Abidin Varaminin belə danışması təsadüfi deyil. Bu ölkənin Xarici İşlər Nazirliyindən ona bu təlimat verilib. Yoxsa o, bu dərəcədə cəsarət etməzdi. Konsul bununla erməniləri arxayın edir ki, azərbaycanlının prezident olmasından narahat olmayın. Bu o deməkdir ki, İran hər zaman olduğu kimi Ermənistanın arxasında duracaq. Erməni maraqlarını qoruyacaq”.
Vidadi ORDAHALLI
