Blinken etiraf etdi ki, Azərbaycanla hədə dilində danışmaq olmaz...

Məlum həqiqətdir ki, bu gün Azərbaycan dünyada böyük nüfuza sahib olan ölkədir. Bundan başqa, ölkəmiz hazırda dünyada etibarlı tərəfdaş kimi qəbul olunur. Beynəlxalq münasibətlər sistemində Azərbaycanın artan nüfuzu, müxtəlif proseslərdə təsir imkanlarının güclənməsi mövcud geosiyasi reallıqdır. 

Azərbaycanın beynəlxalq aləmdə nüfuzunun daha da yüksəldiyini sübut edən digər amil isə ölkəmizə edilən rəsmi və işgüzar səfərlər, eləcə də xarici ölkələrə kapital qoyuluşunun artmasıdır. İqtisadi inkişaf göstəricilərinə, ordunun gücünə, beynəlxalq münasibətlər sistemində etibarlı roluna görə Azərbaycan çox ciddi nailiyyətlər əldə etmiş bir dövlətdir. Amma o da sirr deyil ki, bəzi dairələr Azərbaycan haqqında mənfi rəy formalaşdırmağa çalışır. Dünyada mövcud olan erməni lobbisi, onlarla birlikdə hərəkət edən qüvvələrin fəaliyyəti bunun təsdiqidir. Lakin iqtidar tərəfindən aparılan uğurlu xarici siyasət, iqtisadiyyatın yüksəlişi bu gün imkan vermir ki, hansısa ölkə Azərbaycana qarşı təhqir, təhdid və böhtan dili ilə danışsın. Azərbaycan artıq beynəlxalq aləmdə yalnız bərabərhüquqlu dildə danışılan bir ölkədir. Qeyd edilənlərin sübutu ABŞ dövlət katibi Entoni Blinkenin Azərbaycan prezidenti İlham Əliyevə zəngi fonunda özünü bir daha qabarıq büruzə verdi. Telefon söhbəti zamanı prezident İlham Əliyev qeyd edib ki, ABŞ tərəfindən Azərbaycanla bağlı son bəyanatlar və atılan addımlar Azərbaycan-ABŞ münasibətlərinə ciddi zərər vurub. Dövlət başçısı 2023-cü il noyabrın 15-də ABŞ Dövlət katibinin köməkçisi Ceyms O’Braynın Nümayəndələr Palatasının Xarici İşlər Komitəsinin Avropa üzrə alt komitəsinin dinləmələrində ölkəmizlə bağlı səsləndirdiyi fikirlərin qərəzli olduğunu, həqiqəti əks etdirmədiyini və Azərbaycan tərəfindən rədd edildiyini bildirib.

Azərbaycan tərəfinin ABŞ-ın Azərbaycana münasibətdə yüksək səviyyəli ikitərəfli görüş və təmasları təxirə salması və “ikitərəfli münasibətlərimizdə “əvvəlki kimi” ola bilməz” bəyanatını nəzərə aldığı, bunu adekvat cavablandırdığı vurğulanıb. Bundan başqa, prezident İlham Əliyev Azərbaycan Xarici İşlər Nazirliyinin noyabrın 16-da bununla əlaqədar açıqlama verdiyini, Azərbaycan tərəfinin də öz növbəsində ABŞ-dan olan yüksək səviyyəli səfərləri ləğv etdiyini xatırladıb. Dövlət katibi Blinken münasibətlərin normallaşdırılması məqsədilə dekabrda ABŞ dövlət katibinin köməkçisi Ceyms O'Braynın Azərbaycana səfərinə icazə verilməsini xahiş edib. Amma prezident İlham Əliyev həmin təkliflə bir şərtlə razılaşıb ki, bu səfərdən sonra Azərbaycanın yüksək səviyyəli rəsmilərinin ABŞ-a səfərlərinə qoyulan əsassız qadağa aradan qaldırılsın. Dövlət katibi bunu qəbul edib. Bütün bunlar bir daha onun təsdiqidir ki, Azərbaycan öz mövqeyində qətidir, prinsipialdır və bu mövqeyi sona kimi müdafiə etməkdə israrlıdır. Qarşısında kimin olmasından asılı olmayaraq, Azərbaycan məsələlərə yanaşmada qətiyyətlidir. Elə bundan irəli gəlir ki, ABŞ ölkəmizə qarşı yanlış  mövqeyindən geri çəkildi. Nəticədə bir daha təsdiq olundu ki, heç bir qüvvə Azərbaycanla təzyiq dili ilə danışa bilməz.

Indi Vaşinqtonda da qəbul edilir ki, ABŞ Konqresinin aşağı palatası olan Nümayəndələr Palatasındakı Qarabağ dinləmələri Azərbaycan–Amerika münasibətlərinə zərbə olub. Qeyd olunmalıdır ki, ölkəmiz Birləşmiş Ştatların bütün regional təşəbbüslərində, xüsusən də beynəlxalq terrorizmlə mübarizədə yaxından iştirak edib. Azərbaycan ABŞ-a regional təhlükəsizliyin başlıca komponentinin əməkdaşlıq olduğunu xatırladır. Əməkdaşlıq isə bərabərtərəfli olmalı, səmimiyyətə əsaslanmalı, hər bir dövlətin üzərinə götürdüyü öhdəliklərə sadiqlik ruhunu rəhbər tutmalıdır. ABŞ bilməmiş deyil ki, 44 günlük müharibədən sonra Azərbaycan və Ermənistan arasında yaşananlar, o cümlədən Qarabağ müstəvisində baş verənlər Nikol Paşinyan və komandasının qeyri-konstruktiv, Cənubi Qafqazda sülhün yaranmasına zidd mövqeyinin nəticəsidir. Bunu da prezident İlham Əliyev Blinkenin diqqətinə çatdırıb. Dövlət başçısı tərəfindən qeyd olunub ki, sülh müqaviləsinin mətni ilə bağlı Azərbaycan tərəfinin 2023-cü il sentyabrın 11-də Ermənistana təqdim etdiyi təkliflər Ermənistan tərəfindən noyabrın 21-də cavablandırılıb. Beləliklə, Ermənistan öz cavabını 70 gün gecikdirib. Yetmiş günlük gecikdirmə bir daha nümayiş etdirir ki, Ermənistan sülh müqaviləsinin mətnindən danışıqlar prosesini uzatmaq üçün bəhanə kimi istifadə edir. Bunlarla yanaşı, ABŞ artıq nəzərə alır ki, Azərbaycan qonşu ölkələrlə, o cümlədən də İranla hansı səviyyədə əlaqələr qurur, necə münasibət saxlayır, nə kimi razılaşmalar əldə edir, bu, müstəsna suveren hüquq məsələsidir. Ölkəmizin digər ərazilərini Naxçıvanla birləşdirən yolun İrandan keçməsi istiqamətindəki razılıq da bura aiddir. Azərbaycan Naxçıvana gedən yolun İrandan keçməsini istəyir. Həm də ona görə ki, Ermənistan üzərinə götürdüyü öhdəlikləri yerinə yetirmir, həmin yolda təhlükəsizlik təminatını özü gerçəkləşdirməyə çalışır.  Bu isə üçtərəfli razılaşmalara ziddir. Bütün bunları ABŞ nəzərə almaq istəmədi. Nəticədə hadisələri bu istiqamətdə inkişafı ABŞ-a və onun Cənubi Qafqaz siyasətinə zərbə vurdu. İndi ABŞ regionda zəifləyən mövqelərini yenidən bərpa etməyə çalışır. Bunun üçün isə Azərbaycanla yaxınlaşmağa məcburdur. Bunlar fonunda bir daha bəlli oldu ki, heç kim, heç bir qüvvə artıq Azərbaycanla təzyiq, təhdid, diqtə dili ilə danışa bilməz. Bu yöndə cəhdlər yersiz və əbəsdir. Bu gün öz milli maraqlarına uyğun, beynəlxalq hüququn normaları çərçivəsində müstəqil qərarlar qəbul etmək Azərbaycanın xarici siyasət strategiyasının əsas prinsipi kimi qəbul edilir. Artıq bir çox dövlətlər ölkəmizə təzyiq göstərməyin nəticəsiz olduğunu bu və ya digər formada etiraf edirlər. Azərbaycanla hədə-qorxu, ultimatum dili ilə heç kimin danışması mümkün deyil.

Tahir TAĞIYEV