Ermənistanı gizli “nüvə dövlətinə” çevirmək planı - ABŞ, Rusiya və Koreya işin içində...
Elşad Musayev: “Ermənistan istəyər ki, gizli nüvə dövləti olsun, amma bu real görünmür”
Ermənistan nüvə enerjisindən imtina etməyəcək və bu, ölkənin 2040-cı ilə qədər Enerji Təhlükəsizliyi Strategiyasının tələbidir.
Bunu BMT-nin enerji məsələləri üzrə milli eksperti Ara Marcanyan Ermənistanın baş naziri Nikol Paşinyanın canlı yayımda bəyanatını şərh edərkən bildirib.
Ermənistan hökumətinin başçısı xüsusilə qeyd edib ki, Ermənistan Rusiya Federasiyası, ABŞ və Cənubi Koreyadan olan tərəfdaşlarla yeni AES blokunun tikintisi ilə bağlı danışıqlar aparır: “Ermənistanın qarşısında atom elektrik stansiyasının yeni enerji blokunun tikintisi vəzifəsi durur və bu gün biz Rusiya, ABŞ, Koreyadan olan həmkarlarımızla danışıqlar aparırıq və kommersiya baxımından bizim üçün hansı təkliflərin faydalı olacağını anlamağa çalışırıq”.
Ermənistan tərəfi xüsusilə kiçik modul nüvə rektorlar üçün yeni texnologiyalarda maraqlıdır. Paşinyan xatırladıb ki, hələ iyun ayında Ermənistanın Ərazi İdarəetmə və İnfrastruktur Nazirliyinin nümayəndələri bu məsələləri müzakirə etmək üçün ABŞ-a səfər ediblər. “Hansı variantın bizim üçün sərfəli olduğuna qərar verməliyik və ən məqbul variantı seçəcəyik”.
Maraqlıdır, Ermənistan nə edir? Həm Rusiya, həm də ABŞ və Cənubi Koreya ilə atom danışıqları aparır. Ermənistanın gizli nüvə dövlətinə çevrilmək planı ola bilərmi?
“... bütün məkrli niyyətləri ermənilərdən gözləmək olar”
Sözügedən məsələyə aydınlıq gətirən Böyük Azərbaycan Partiyasının sədri Elşad Musayev “Bakı-Xəbər”ə açıqlamasında buna birmənalı yanaşmadı: “Görünən odur ki, Ermənistan elektrik enerjisinə olan tələbatını təmin etmək məqsədilə axtarışdadır. Məsələ ondadır ki, Ermənistanda bir enerji çatışmazlığı problemi var. Sovet dönəmində Ermənistanda AES tikildi və 1976-cı ildə fəaliyyətə başladı. Daha sonra “Metsamor” AES-in istismar müddəti bir neçə dəfə uzadıldı. Ancaq Ermənistanın gələcəkdə enerjiyə olan tələbatını ödəməkdə çətinliklə üzləşəcəyi ehtimal olunur. Ona görə də onlar Birləşmiş Ştatlar vasitəsilə istəyirlər ki, kiçik modul nüvə rektorların tikintisinə nail olsunlar. Həmçinin Cənubi Koreyanı bu işə cəlb etmək istəyirlər. Çünki yaxşı bilirlər ki, Cənubi Koreya bununla bağlı üstün texnologiyalara sahibdir. Ancaq nəzərə almaq lazımdır ki, AES tikiləndən sonra onun mühafizəsi, texniki xidmətin göstərilməsi və digər məsələlər mühüm əhəmiyyət kəsb edir. Üstəlik, Ermənistan ərazisi seyismik zonada yerləşdiyi üçün AES-lər üçün risq dərəcəsi böyükdür. Təbii ki, Paşinyan məsulyətsiz adam olduğu üçün bütün regionu təhlükə ilə üz-üzə qoyur. Ona görə də proseslərin gedişini izləmək lazımdır. Çünki Ermənistanın elə böyük imkanları yoxdur nələrsə etsin. Ancaq istənilən halda bu, təhlükəli oyundur və bunun qarşısını almaq üçün həm Azərbaycan, həm də Türkiyə tərəfindən reaksiya veriləcək. Ermənistan istəyər ki, gizli nüvə dövləti olsun, amma bu real görünmür. Çünki bunu şərtləndirən bir sıra faktorlar var. Bunun üçün gərək geniş və çoxşaxəli imkanlar olsun. Ermənistan ərazi baxımından balaca ölkədir və nüvə sınaqları keçirə bilməz. Okeana da çıxışı yoxdur ki, sınaqları orada həyata keçirsin. Lakin bütün məkrli niyyətləri ermənilərdən gözləmək olar”.
Vidadi ORDAHALLI
