Azad rayonlarda həyətyanı torpaq paylanışı bu səbəblərdən çox vacibdir...
Aydın Hüseynov: “Azad olunan rayonlarda əhaliyə pay torpaqlarının verilməsi rayonların bərpasına, əhaliyə müsbət təsir edəcək”
İşğaldan azad edilmiş ərazilərdə kəndlərdə yaşayan əhaliyə pay torpaqlarının verilməsi gözlənilir. Bu məsələ Milli Məclisdə müzakirə olunub. İndi keçmiş məcburi köçkünləri düşündürən əsas məsələlərdən biri də azad olunmuş ərazilərdə qeydiyyatda olan vətəndaşlara pay torpaqların hansı şəkildə verilməsidir.
Xatırladaq ki, Azərbaycanda torpaq islahatı 1996-cı ildə başlayıb və bir neçə il davam edib. Bu islahat nəticəsində keçmiş kolxoz və sovxozlar ləğv edilərək, onlara məxsus ərazilər pay torpağı şəklində yerli əhaliyə paylanıb. Qarabağ bölgəsinin rayonları isə işğal altında olduğundan orada torpaq islahatı aparılmayıb.
“Qarabağ və Şərqi Zəngəzur iqtisadi rayonlarında azad biznesin inkişafına daha geniş meydan vermək üçün əlavə güzəştlər də nəzərdə tutulur”
Mövzu ilə bağlı fikir bildirən Milli Məclisin İqtisadi siyasət, sənaye və sahibkarlıq komitəsini üzvü Aydın Hüseynov “Bakı-Xəbər”ə açıqlamasında qeyd etdi ki, işğaldan azad edilmiş Qarabağ və Şərqi-Zəngəzur iqtisadi rayonlarında əhalinin mərhələli şəkildə məskunlaşdırılması tədbirləri həyata keçirilməkdədir. Bu proses çərçivəsində həmin ərazidəki insanların məşğulluğu, müxtəlif fəaliyyət sahələri üzrə işlə təmin olunması, eləcə də knd təsərrüfatı ilə məşğul olması üçün tədbirlər də görülür: “Böyük Qayıdışa dair Dövlət Proqramında nəzərdə tululan tədbirlərə əsasən, hazırda həmin ərazilərin inkişafı və iqtisadiyyata reinteqrasiyasına dəstək məqsədilə müvafiq infrastrukturun qurulması işləri həyata keçirilir, eyni zamanda, torpaqlardan səmərəli istifadənin təşkili və torpaq ehtiyatlarının idarə edilməsi, torpaq islahatlarının aparılması ilə bağlı plan hazırlanır. Bu plana uyğun olaraq işğaldan azad edilmiş ərazilərdə kəndlərdə yaşayan əhaliyə pay torpaqlarının verilməsi təmin olunacaq”.
A.Hüseynovun sözlərinə görə, azad olunmuş ərazilər zəngin iqtisadi potensiala, o cümlədən, münbit torpaq ehtiyatlarına malikdir ki, bu da bölgədə kənd təsərrüfatının inkişafı üçün əlverişli imkanlar yaradır. Bu ərazilərdə taxılçılıq, o cümlədən üzümçülük, meyvəçilik, fındıqçılıq sahələrinin inkişaf etdirilməsi, heyvandarlıq təsərrüfatlarının yaradılması üçün güclü potensial var: “Artıq Kəlbəcər və Laçında arıçılıq təsərrüftları yaradılıb. “Dost Aqropark” layihəsi artıq öz müsbət nəticələrini verməkdədir. Dövlət bu ərazidə çalışan fermerlərə və kiçik, fərdi sahibkarlara, vətəndaşlara həm dəstək göstərir, subsidiya verir, həm də vergi və sosial güzəştlərlə əhatə edir. Bu da öz növbəsində gələcəkdə ölkəmizin kənd təsərrüfatı məhsullarının xarici idxal asılılığından azad olmasına öz müsbət təsirini göstərəcək”.
Millət vəkili hesab edir ki, azad olunan rayonlarda əhaliyə pay torpaqlarının verilməsi rayonların bərpasına, əhaliyə müsbət təsir edəcək. Pay torpaqların onların dayanıqlı gəlir əldə etmə imkanlarını təmin edəcək. Eləcə də Qarabağ və Şərqi Zəngəzur iqtisadi rayonlarında azad biznesin inkişafına daha geniş meydan vermək üçün əlavə güzəştlər də nəzərdə tutulur. Bu güzəştlərlə son nəticədə azad edilmiş ərazilərdə istehsal, emal, ticarət və xidmət infrastrukturunun yaradılması, yeni texnologiyaların tətbiqi, investisiya layihələrinin həyata keçirilməsi məqsədilə xüsusi vergi-gömrük güzəştləri, müxtəlif iqtisadi, maliyyə və institisional stimullar tətbiq olunacaq.
Günel CƏLİLOVA
