Ermənistan Azərbaycanın əsas sülh şərtinə “yox” dedi - konstitusiyanı dəyişmədən sazişə getmək istəyir...
Ramil Hüseynov: “Paşinyan hakimiyyəti bu tələbdən imtina etməklə odla oynayır”
“Ermənistan Konstitusiyası və ona dəyişikliklər Ermənistanın daxili işidir. Biz onunla bağlı hələ 2018-ci ildə başlanan daxili müzakirələrə rəsmi Bakının qarışma cəhdlərini ölkəmizin işlərinə kobud müdaxilə kimi qiymətləndiririk”.
Prezidenti İlham Əliyevin açıqlamasına cavab olaraq Ermənistan XİN-in bəyanatında belə deyilir.
Prezident Əliyev iyunun 6-da Türk Dövlətləri Parlament Assambleyasına (TÜRKPA) üzv ölkələrin parlament sədrləri ilə görüşdə demişdi ki, “Ermənistanın hazırkı konstitusiyası dəyişməz qaldığı halda, Ermənistan ilə Azərbaycan arasında sülh sazişinin bağlanması, sadəcə, mümkün deyil”.
İrəvan vurğulayır ki, bu cür söhbətlər sülh prosesini torpeda edir və Azərbaycan rəhbərliyinin sülhə nail olmaqda səmimiyyətinə şübhə yaradır: “Danışıqların aparıldığı sülh sazişində aydın şəkildə qeyd olunub ki, tərəflər bir-birinin ərazi bütövlüyünü tanıyır və bir-birlərinə qarşı ərazi iddiaları yoxdur. Sülh sazişi layihəsində həmçinin razılaşdırılmış müddəa var ki, tərəflərdən heç biri sülh sazişindən irəli gələn öhdəlikləri yerinə yetirməmək üçün öz daxili qanunvericiliyinə istinad edə bilməz”.
Nazirlik hesab edir ki, tərəflərin bütün narahatlıqlarını aradan qaldırmağın ən aydın, birbaşa yolu Ermənistan və Azərbaycan arasında uzunmüddətli sülh səhifəsini açacaq sazişin imzalanmasıdır.
Necə yəni Konstitusiyaya dəyişikliklər ölkənin daxili işidir? Ermənistan Konstitusiyasında bizə qarşı konkret ərazi iddiaları öz əksini tapıb.
“Çox güman ki, revanşist qüvvələrə bəhanə verməməkdən ötrü belə açıqlamalar verilir”
Sözügedən məsələyə aydınlıq gətirən “Yeni Xətt” Müstəqil Siyasi Tədqiqatlar Mərkəzinin sədri Ramil Hüseynov “Bakı-Xəbər”ə açıqlamasında Paşinyan hakimiyyətinin bu dəyişikliklərə getməyə məhkum olduğunu bildirdi: “Ermənistan Konstitusiyasının dəyişdirilməsi vacibdir. Ən azından bunu mövcud reallıqlar tələb edir. Həmçinin Azərbaycanın bununla bağlı tələblərlə çıxış etməsi yeni deyil. Əvvəllər də bununla bağlı Azərbaycanın tələbi olub. Bu da səbəbsiz deyil. Məsələ ondadır ki, Ermənistan Konstitusiyasında Qarabağın bu ölkəyə birləşdirilməsinə dair bənd var. Bu, bənd çıxarılmadan tərəflər arasında necə sülh sazişi imzalana bilər? Tutaq ki, Azərbaycanla Ermənistan arasında sülh sazişi imzalandı. Bu, Ermənistan Konstitusiya Məhkəməsi tərəfindən ratifikasiya olunmalıdır. Haradan zəmanət var ki, ermənilər sonra bunun Konstitusiyaya uyğun olmadığı tezisini ortaya atmayacaqlar? Hardan zəmanət var ki, Ermənistanda hakimiyyət dəyişikliyindən sonra yeni qüvvələr bunu əllərində bayraq etməyəcəklər? Ona görə də Paşinyan hakimiyyəti bu tələbdən imtina etməklə odla oynayır. Elə ara-sıra Nikol bəyan edirdi ki, Ermənistan Konstitusiyasının dəyişdirilməsinə ciddi ehtiyac var. O zaman nə dəyişib ki, Ermənistan XİN-i Prezident Əliyevin tələbinə belə sərt münasibət bildirir? Fikrimcə, bu, ictimayi rəyə hesablanmış addım da ola bilər. Məsələ ondadır ki, Azərbaycanın işğal altında olan 4 kəndin geri qaytarılması revanşistlərin ciddi etirazına səbəb olub. Revanşist qüvvələr kilsə ilə birlikdə Paşinyana qarşı etiraz aksiyaları keçirirlər. Çox güman ki, həmin qüvvələrə bəhanə verməməkdən ötrü belə açıqlamalar verilir. Çünki Paşinyanda əminlik yoxdur ki, ona qarşı keçirilən etiraz aksiyalarına yaxın aylarda son qoyulacaq. Ancaq istənilən halda Ermənistan Konstitusiyası dəyişdirilməlidir”.
Vidadi ORDAHALLI
