Rusiya İrəvandan ya qorxur, ya da nə edəcəyini bilmir - Paşinyan isə öz işindədir...
Mehman İsmayılov: “Rusiya indi çəkiclə zindan arasında qalıb”
“Ermənistan rəhbərliyinin Kollektiv Təhlükəsizlik Müqaviləsi Təşkilatının (KTMT) Minsk görüşündə iştirakdan imtina etməsi erməni xalqının maraqlarına cavab vermir”. Bunu Rusiya Xarici İşlər Nazirliyinin mətbuat katibi Mariya Zaxarova gündəlik brifinqdə deyib.
Bildirib ki, Ermənistan rəhbərliyinin bu qərarı təəssüf doğurur.
"Ermənistan rəhbərliyinin KTMT-nin birgə iclasında iştirak etməmək qərarı, əlbəttə ki, təəssüf doğurur. Biz bunun erməni xalqının uzunmüddətli maraqlarına cavab verdiyini hesab etmirik", - o deyib.
Qeyd olunur ki, noyabrın 14-də Ermənistanın baş naziri Nikol Paşinyan da Belarus prezidenti Aleksandr Lukaşenko ilə telefon danışığında noyabrın 23-də KTMT-nin iclasında iştirak etməyəcəyini bildirib.
Bildirilir ki, Ermənistanın xarici işlər naziri Ararat Mirzoyan və Ermənistan parlamentinin spikeri Alen Simonyan KTMT-nin Minsk görüşündə iştirak etməyəcəklərini bildiriblər.
Rusiya Paşinyanın zərbələrinə hələ də təəssüf etməklə reaksiya verir. Moskva niyə sərt addım atmır - qorxur, ya nə edəcəyini bilmir?
“...Çox ehtiyatla davranıb, Ermənistanı hələlik dilə tutmaqla...”
Politoloq Mehman İsmayılov “Bakı-Xəbər”ə şərhində “Birincisi, Rusiya anlayır ki, artıq Ermənistanı itirməkdədir. İkinci, Rusiya rəhbərliyi açıq-aydın başa düşür ki, Paşinyan Rusiyanın mövqelərinə zərbə endirməyin əvəzində Qərbdən dəstək alır. Paşinyan Rusiyanın mövqelərinə nə qədər ağır zərbələr vursa, bir o qədər Qərbdən dəstək alacaq. Çünki Paşinyan Qərbin hakimiyyətə gətirdiyi bir adamdır. Üstəlik, Rusiya açıq-aydın anlayır ki, Rusiya Ermənistanın ərazisini tərk etmək məcburiyyətində qalsa, bu bütövlükdə Güney Qafqazdan onun çıxıb getməsi və bütövlükdə bu ərazini tərk etməsi deməkdir. Rusiya indi çəkiclə zindan arasında qalıb. Rusiya Ermənistana hər cür təzyiq edə bilər, amma o təzyiq etməyə başlayan kimi, Ermənistan rəhbərliyi bu təzyiqi cəmiyyətin Rusiyaya nifrətinə çevirəcək. Rusiya anlayır ki, erməni cəmiyyəti Azərbaycanla müharibəni uduzandan sonra Rusiyaya nifrət edir. Erməni cəmiyyəti gözləyirdi ki, Rusiya Azərbaycanla savaşa girəcək və Ermənistanın aqressiyasını müdafiə edəcək, işğal olunmuş Azərbaycan torpaqlarının sonsuza qədər onun işğalında qalmasına yardım edəcək”-deyə bildirdi.
M.İsmayılovun sözlərinə görə, bu baş verməyəndən sonra Ermənistanın içində antirusiya ovqatı, Rusiyaya nifrət var. “Bir tərəfdən də Rusiyanın əlində Ermənistana təzyiq edə biləcək güclü rıçaqlar var” - deyən M.İsmayılovun sözlərinə görə, Rusiya erməni kilsəsinin, daşnakların, “Hınçak”ın, erməni diasporunun, Rusiyada yaşayan 3 milyondan çox erməninin əli ilə Ermənistana təzyiq edə bilər. “Rusiya iqtisadi rıçaqlarla da Ermənistana təzyiq təşkil edə bilər. Məsələn, Ermənistana satdığı neftin, qazın, taxılın qiymətini qaldıra bilər, amma bunlar Rusiyaya əl vermir. Çünki Rusiya təzyiqin dozasını artıran kimi Ermənistan bundan istifadə edib Qərbin qucağına düşəcək. O səbəbdən də Rusiya indi bir tərəfdən bəyanatlarla kifayətlənir, digər tərəfdən də Ermənistana təzyiq rıçaqlarını araşdırmağa başlayıb. Amma Rusiya yaxşı başa düşür ki, Ermənistana ediləcək hər bir təzyiq onların münasibətlərinə neqativ təsir edəcək və Paşinyan erməni cəmiyyətini Rusiyaya qarşı qladırıb Rusiyanın 102-ci bazasının çıxardılmasını tələb edəcək. Bu da Rusiyanın maraqlarının əleyhinədir. Təbii ki, Rusiya erməni cəmiyyətinin əhval-ruhiyyəsinə təsir etməyə çalışır. Rusiya Paşinyanı, Paşinyan Rusiyanı günahlandırır. Bu qarşıdurmada Rusiya erməni cəmiyyətinin əhval-ruhiyyəsini erməni cəmiyyətinə qarşı çevirməyə çalışır, amma Rusiya Ermənistana açıq-aydın təzyiq göstərməyə, bunun üçün iqtisadi, siyasi, hərbi rıçaqlardan istifadə etməyə başlayan kimi Ermənistan dərhal bütövlükdə Qərbin tərəfinə keçəcək, inidyə qədər apardığı maskalanmış siyasətin maskasını çıxarıb açıq şəkildə Rusiyanın, onun mövqeyinin əleyhinə mübarizəyə başlayacaq. Hər iki tərəf hazırda gedən bu soyuq savaşda balansın kimin xeyrinə dəyişəcəyini gözləyir. Ona görə də bəyanatlarla kifayətlənirlər. Amma təbii ki, Rusiya Ermənistanı itirməkdən qorxur. Çünki Rusiyanın Güney Qafqazdakı maşası, rıçaqı, mexanizmləri ermənilərdir. Ona görə də Ermənistanın ərazisindən Rusiya çıxmaq istəmir. Belə olan vəziyyətdə Rusiya yəqin ki, uzun müddət bu bəyanatlarla irəli gedə bilməyəcək. Gec və ya tez Ermənistanla Rusiya arasında açıq qarşıdurma başalayacaq”-deyə qeyd edən M.İsmayılov bildirdi ki, onda Rusiya Ermənistana olan və ona xidmət edən beşinci kolondan, Qarabağ klanından, cinayətkar Köçəryan-Sərkisyan cütlüyündən Paşinyan rejiminə qarşı istifadə etməyə başlayacaq. “Onda da Ermənistanın içərisində, təbii ki, Rusiyaya qarşı çox açıq-aşkar üsyankar bir əhval-ruhiyyə başlayacaq. Ona görə də Rusiya çox ehtiyatla davranıb Ermənistanı hələlik dilə tutmaqla, seçdiyi Qərbə doğru istiqamətlənmiş kursdan daşındırmağa çalışır” - deyə M.İsmayılov əlavə etdi.
İradə SARIYEVA
