İraq prezidentinə tövsiyə - İrəvandan əvvəl Bakıda Xocalı abidəsinə gedəydiniz...
Qasım Hacıyev: “İraq prezidenti Xocalı soyqırımına münasibət bildirmədən İrəvana gedib yalançı, uydurma “erməni soyqırımı” abidəsinin üzərinə əklil qoyursa...”
Bakıda rəsmi səfərdə olan İraq prezidenti Əbdüllətif Camal Rəşid noyabrın 21-də Ermənistana səfər edib. Aysor.am.ru-nun yaydığı məlumata görə, Əbdüllətif Camal Rəşid İrəvandakı qondarma “erməni soyqırımı abidəsi”ni ziyarət edib.
İraq prezidenti qondarma “soyqırımı qurbanları”nın xatirəsinə ucaldılmış abidənin önünə əklil qoyub, əbədi məşəl önünə gül dəstələri düzüb. "İstənilən xalqı soyqırıma məruz qoymaq cəhdlərini pisləyirik"- deyə Əbdüllətif Camal Rəşid bildirib. İraq prezidenti qondarma soyqırıma belə ürək yanğısı ilə yanaşırsa, onda gərək öz ölkəsində vaxtilə Səddam Hüseynin törətdiyi kürd soyqırımına hüquqi-siyasi qiymət verin. Tarixdə “erməni soyqırımı” deyilən bir hadisə baş verməyib, amma kürdlərin Səddam Hüseyn tərəfindən soyqırım edilməsi gerçəkdir.
“Səddam rusun adamı idi, bunun da üzərində ermənipərəst Qərbin, ABŞ-ın təsiri yox deyil”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, İraq prezientinin bu addımı təəssüf doğurur. “ilk növbədə onu demək lazımdır ki, İslam Əməkdaşlıq Təşkilatı başqa beynəlxalq qurumlardan fərqli olaraq Ermənistanın Azərbaycana təcavüzünü pislədi, qınadı, Ermənistanın təqsirkar olduğunu ifadə edən qərar çıxardı. Çünki o vaxt o biri beynəlxalq təşkilatlar iddia edirdilər ki, Ermənistan müharibədə iştirak etmir, Azərbaycan Qarabağ erməniləri ilə döyüşür. Amma İƏT yeganə təşkilat idi ki, Ermənistanın təcavüzünü tanıdı, onu təcavüzkar adlandırdı. Amma buna baxmayaraq bəzi müsəlman dövlətləri və onların liderləri ermənipərəst mövqeyini göstərdi. Təəssüf ki, şiə qardaşımız İrandan da bunu gördük. İraq prezidentinin qondarma “erməni soyqırımı” abidəsini ziyarət etməsi məni təəccübləndirmədi. Niyə? Çünki o, Paşinyanla görüşdə ermənilərə simpatiyasını ifadə edib və bildirib ki, İraq erməni vətəndaşlarından çox faydalanıb, bir sözlə, ermənilərlə “qədim əlaqələr”dən danışıb. Onu da deyim ki, ərəblər tarixən işğalçı xalq olub. Sonra müsəlman dövlətlərinin çoxu ədalətli mövqe tutub, düzgün inkişaf edib, xalqların xeyrinə qərarlar verib, o qərarlardan özləri də faydalanıb.
Təəssüf ki, biz bunu İran və İraq haqda deyə bilmərik. İki müsəlman dövlət müharibə edib bir-birinin yeniyetmələrini, gənclərini qətlə yetirdilər. Onlardan bundan başqa nə gözləmək olardı? İraqın sabiq prezienti Səddam Hüseyn Rusiyanın adamı idi, orada təhsil görmüşdü, onu İraqa gönərdilər, o da sona qədər Rusiyanın siyasətini yeritdi. Səddamın cinayətlərini də bütün dünya bilir, onun kürdlərin və başqa xalqların genosidini həyata keçirdiyi gizlin deyil. İkincisi, 20-dən artıq ərəb dövləti müsəlman olduqları halda başqa müsəlman ölkələrini niyə müdafiə edə bilmirlər? Ona görə ki, başqaları gəlib onların başının üstündə ağalıq edir.
İraqı vaxtilə Rusiyanın adamı Səddam Hüseyn idarə edirdi, hər dəfə Ermənistan Azərbaycan-Dağlıq Qarabağ probleminin həllinə tərəf addım atılanda o hay-küy salıb dünyanın başını qatırdı, imkan vermirdi ki, bu problem beynəlxalq səviyyədə müzakirə olunsun. Onun münasibətini belə bilirəm. İraqın başına Qərb ölkələri, Amerika nələr gətirdi. Ərəb birliyi yoxdur, onlar birləşib sülh yarada bilmirlər ki, sülh şəraitində yaşasınlar. Suriya da o gündədir, İraqı, Misiri nə günə saldılar və sair”.
Q.Hacıyev qeyd etdi ki, Azərbaycanda səfəri zamanı kifayət qədər məlumat əldə edən İraq prezidentinin Ermənistanda bu davranış göstərməsinə heç şübhəsiz ABŞ-ın, Qərbin təsiri var. “ABŞ bu kimi dövlətləri öz əlinin altında saxlayır, onlarla bağlı incə siyasət yürüdür. ABŞ İraqa hücum etməsə də, onun siyasətinə dərindən nüfuz edə bilir. Səddam rusun adamı idi, bunun da üzərində ermənipərəst Qərbin, ABŞ-ın təsiri yox deyil.
İraq prezidenti Azərbaycanda olarkən müsəlman qardaşlarının məruz qaldığı Xocalı soyqırımına münasibət bildirmədi, Xocalı soyqırımı abidəsini ziyarət etmədi. İraq prezidenti Xocalı soyqırımına münasibət bildirmədən İrəvana gedib yalançı, uydurma “erməni soyqırımı” abidəsinin üzərinə əklil qoyursa, demək onda təəssübkeşlik yoxdur. Bəlkə də o nə müsəlmandır, nə də ərəbdir.
Bu, siyasətin axmaq üzüdür. Çox təəssüf ki, İraq prezidenti yalana uydu, haqsızlığa dəstək oldu. Biz o biri dövlətləri qınayırıq, deyirik ki, xristian təəssübkeşliyi edirlər. Bəs bizim müsəlman qardaşlarımız niyə təəssüb çəkmir?”-deyə Q.Hacıyev qeyd edir.
Q.Hacıyev əlavə etdi ki, müsəlman dövlətinin başçısı erməni yalanının toruna düşürsə, onda biz hansı qardaşlıqdan danışa bilərik?!
İradə SARIYEVA
