Bakı-Tbilisi-Qarsa yeni ölkələr qoşulacaq...
Akif Nəsirli: "Bakı-Tbilisi-Qars dəmiryolu Şanxaydan Brüsselə qədər uzanan dəmiryol şəbəkəsinin bir hissəsidir"
"Nəqliyyat sahəsində yaradılan və yaradılacaq infrastruktur bir çox ölkələr üçün əvəzolunmaz nəqliyyat imkanları açacaq. Xüsusilə Bakı-Tbilisi-Qars dəmir yolunun artıq bir-iki aydan sonra genişləndirilmiş formada fəaliyyətə başlaması, hesab edirəm ki, böyük nailiyyətlərdən biridir".
Bu sözləri Prezident İlham Əliyev martın 16-da Gürcüstanın Baş naziri İrakli Kobaxidze ilə təkbətək görüşdən sonra mətbuata bəyanatında söyləyib.
Bir-iki aya bu dəmir yolunun ötürmə qabiliyyətinin bir milyon tondan beş milyon tona çatdırılacağını xatırladan Prezident Əliyev qeyd edib: “Eyni zamanda, bu dəmir yolunun fəaliyyəti bir çox ölkələr üçün də cəlbedici olacaq”.
Liberal İqtisadçılar Mərkəzinin rəhbəri Akif Nəsirli “Bakı-Xəbər”ə bildirdi ki, biz yaxın gələcəkdə bu dəmiryol xəttinə yeni ölkələrin qoşulacağını görəcəyik. "Bakı-Tbilisi-Qars dəmiryolu ümumiyyətlə Qafqazda ən əhəmiyyətli dəmiryolu şəbəkəsi sayıla bilər. Ona görə ki, bu dəmiryolu xətti Asiya ilə Avropanı birləşdirən ən optimal və aşağı xərcili nəqliyyat sistemidir.
Tədadüfi deyil ki, bu dəmiryolu hansı ölkənin ərazisindən keçirsə həmin ölkəyə yükgötürmə qabiliyyətinə uyğun olaraq dividend gətirir. Bu, əsasən Azərbaycan, Gürcüstan və Türkiyədir. Amma biz bunu yalnız bu üç ölkə miqyasında dəyərləndirməməliyik. Bakı-Tbilisi-Qars dəmiryolu Şanxaydan Brüsselə qədər uzanan dəmiryol şəbəkəsinin bir hissəsidir. Burada Çin, Orta Asiya, Qafqaz ölkələri, Yaxın Şərq, Türkiyə, oradan isə Avropaya çıxışdan söhbət gedir. Yəni bu dəmiryolu Orta Asiya ölkələrinin və Çinin gələcəkdə Avropaya çıxışını tam olaraq təmin edəcək. Orta Asiya və Çin yükləri Xəzərin o biri sahilinə qədər dəmiryolu ilə gətirir, sonra həmin yüklər Xəzər dənizi vasitəsilə gəmilərlə Bakıya, Bakıdan isə Bakı-Tbilisi-Qars dəmiryolu xəttilə Türkiyə ərazisinə çatdırılır. Türkiyədən sonra isə o yüklər növbəti mərhələdə dəmiryolu ilə Avropa ölkələrinə çatdırıla bilir. Yəni bu yalnız Azərbaycanın, Gürcüstanın və Türkiyənin Avropaya çıxışını təmin etməkdən ötrü deyil, Çin və Orta Asiya ölkələrinin Avropaya çıxışını təmin edəcək bir perspektivə malik dəmiryolu xəttidir.
Ona görə də, hesab edirəm ki, bu gün onun yükgötürmə qabiliyyəti 1 milyon tondan 5 milyon tona qaldırılır, yaxud gələcəkdə daha yüksək ötürücülük qabiliyyətinin yaradılması üçün yəqin ki, addımlar atılacaq. Getdikcə tələbat artacaqdır"-deyə A.Nəsirli qeyd etdi.
A.Nəsirlinin sözlərinə görə, xüsusi qatar daşıyan bərələrin Xəzər dənizində işə düşməsi məsələsi də gündəmdədir, müzakirə olunur.
"Tutaq ki, yüklər Çindən Xəzər dənizinin o biri sahilinə - ya Türkmənistana, ya Qazaxıstana gətirilə, ordan isə bütün qatarı bərələrə yerləşdirib Bakı limanlarına daşımaq, növbəti mərhələdə Bakı limanlarından qatarların Avropaya yola salınması məsələsi reallaşa bilər. Bunun üçün müəyyən danışıqlar gedir. Hazırda müxtəlif mütəmadi olmayan marşrutlar üzrə oxşar yükdaşımalar həyata keçirilir. Amma bunun gələcəkdə mütəmadi xarakter alması mümkündür.
Tutaq ki, gündə bərə ilə Qazaxıstanın Aktau, Türkmənistanın Türkmənbaşı limanından Bakı limanlarına bir neçə bərə bir neçə qatarı daşıya bilər. Yəni bu yüklərin daşınmasına tələbat artdıqca bu dediyimiz məsələlər intensivləşəcək və yenidən biz gələcəkdə Bakı-Tbilisi-Qars dəmiryolunun yükgötürmə qabiliyyətini artırmalı olacağıq"-deyə A.Nəsirli vurğuladı.
İradə SARIYEVA
