Stoltenberq İrəvanla sülh prosesi barədə ən dolğun məlumatları Bakıda aldı...
Elşad Həsənov: “Belə görünür ki, erməni tərəfi ilkin mərhələdə Qazaxın 4 kəndini qaytaracaq”
“Hazırda biz Ermənistanla sülh danışıqlarının fəal mərhələsindəyik”. Bunu Prezident İlham Əliyev NATO-nun Baş katibi Yens Stoltenberq ilə mətbuata bəyanatında bildirib.
Ölkə başçısı deyib ki, Brüsselə sonuncu səfəri zamanı mətbuat konfransında bu məsələyə toxunub: “Və qeyd etdim ki, Azərbaycan belə bir təşəbbüs irəli sürüb və biz Ermənistanın cavabını gözləyirik. Sülh danışıqlarına başlamağın bizim təşəbbüsümüz olduğunu bir daha bildirmək istərdim. Bu günədək sülh sazişinin layihəsinə dair ermənistanlı həmkarlarla 7 dəfə şərhlərin mübadiləsi baş tutub. Xarici işlər nazirləri və sərhədlərin delimitasiyası ilə bağlı Baş nazirlərin müavinləri arasında keçirilmiş görüşlər məsələnin həlli üçün yaxşı imkanın olduğunu nümayiş etdirir. Bu yaxınlarda qeyd etdiyim kimi, biz sülhə heç vaxt olmadığımız qədər yaxınıq”.
“Paşinyan ciddi siyasi iradə ortaya qoysa, sülh sazişinin imzalanması tezləşə bilər”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, həqiqətən də tərəflərin son dövrlər sülh müqaviləsinə çox yaxın olduqları görünür: “Buna səbəb aparılan diplomatik danışıqlar və səylərdir. Baş nazirlərin müavinləri səviyyəsində sərhədlərin delimitasiyası ilə bağlı keçirilən danışıqlar artıq nəticə verir. Artıq eksklav olmayan 4 kəndin qaytarılması real olaraq qarşıya qoyulub və bu istiqamətdə işlər gedir. Ancaq təəssüf ki, Ermənistanda müəyyən qüvvələr prosesə mane olur və bunu əngəlləməyə çalışırlar. Xüsusən də kəndlərin qaytarılmasına etiraz edirlər. O cümlədən, erməni Kilsəsi də sülh prosesinə zərbə vurmağa çalışır. Əsasən də 4 kəndin qaytarılmasını Ermənistan hakimiyyətinin təslimçiliyi kimi təqdim edirlər. Ona görə də nə qədər ki Kilsə dövlət siyasətinə qarışır, Ermənistanda sülhün olması, necə deyərlər, gözlənilmir. Yəni Ermənistan hakimiyyəti bu məsələdə həm də Kilsənin təzyiqi altındadır. Bu baxımdan Ermənistan hakimiyyəti Kilsənin dövlət siyasətinə qarışmasının önünü kəsməlidir. Ancaq belə görünür ki, Ermənistan tərəfi ilkin mərhələdə Qazaxın 4 kəndini qaytaracaq. Çünki başqa yol yoxdur. Ermənistan işğal altında saxladığı Azərbaycan kəndlərini geri qaytarmalıdır. Artıq Ermənistan hakimiyyəti anlayır ki, sülh müqaviləsi imzalanmalıdır. O üzdən, Prezident Əliyev NATO-nun Baş katibi Yens Stoltenberqlə görüşündə sülh prosesi ilə bağlı çox vacib məqamlara toxdu. Ölkə başçısı informasiyalı şəxs olduğu üçün nə dediyini yaxşı bilir. Stoltenberq də çıxışında qeyd etdi ki, sülh region xalqları üçün çox vacibdir. Eyni zamanda Qara dəniz regionu və NATO təhlükəsizliyi üçün də əhəmiyyətlidir. Stoltenberqin Azərbaycana birinci səfər etməsi təsadüfi deyil. Çünki o yaxşı bilir ki, Azərbaycan Cənubi Qafqazın lider dövlətidir. Həm də müharibəni udmuş ölkədir. Bir sözlə, Paşinyan ciddi siyasi iradə ortaya qoysa, sülh sazişinin imzalanması tezləşə bilər”.
Vidadi ORDAHALLI
