Cənubi Koreya da Ukrayna savaşına qoşula bilər - Rusiyaya xəbərdarlıq edildi: Ukraynaya silah göndərəcəyik...
Şimali Koreyanın Ukrayna ilə müharibədə Rusiyaya dəstək olmaq üçün bölgəyə əsgər göndməsi xəbərlərinin ardından bir sürpriz açıqlama da Cənubi Koreyadan gəlib.
Cənubi Koreya administrasiyası Şimali Koreyanın Rusiyaya qoşun göndərməsinə cavab olaraq, Ukraynaya silah tədarükünü nəzərdən keçirə biləcəkləri barədə xəbərdarlıq edib. "Associated Press" xəbər verir ki, Cənubi Koreya rəsmiləri narahatdırlar ki, Rusiya Şimali Koreyanı Cənubi Koreyanı hədəf alan nüvə və raket proqramlarını gücləndirə biləcək qabaqcıl silah texnologiyaları verməklə mükafatlandıra bilər.
Cənubi Koreya rəsmiləri Milli Təhlükəsizlik Şurasının fövqəladə iclasında Şimali Koreyanın bölgəyə qoşun göndərməsi ilə bağlı iddiaları Cənubi Koreya və beynəlxalq ictimaiyyət üçün "ciddi təhdidi" adlandırıblar.
Adı açıqlanmayan bir Cənubi Koreya rəsmisi isə bildirib ki, Ukraynaya həm müdafiə, həm də hücum silahları göndərməyi nəzərdən keçirə bilərlər. Şimali Koreya nüvə raketlərini mükəmməlləşdirmək üçün yüksək texnologiyalı Rusiya texnologiyaları əldə etməyə cəhd edə biləcəyini deyən rəsmi bildirib ki, Rusiyanın Şimali Koreyanın köhnəlmiş adi silah sistemlərini modernləşdirmək və kosmosda müşahidə sistemi əldə etmək səylərinə mümkün yardımı Cənubi Koreya üçün də ciddi təhdid yaradacaq.
Rusiyanın 2022-ci ildə Ukraynaya hücumundan bəri Cənubi Koreya ABŞ-ın Moskvaya qarşı sanksiyalarına qoşulub və Kiyevə humanitar və maliyyə yardımı göndərib. Lakin münaqişələrdə fəal iştirak edən ölkələrə silah verməmək siyasətinə uyğun olaraq Ukraynaya birbaşa silah dəstəyi verməyib.
Qeyd edək ki, Cənubi Koreya Kəşfiyyat İdarəsi (NIS) keçən həftə Şimali Koreyanın bu ay Rusiyaya 1500 əsgər göndərdiyini təsdiqlədiyini bildirib. Ukrayna prezidenti Zelenski də 10 min Şimali Koreya əsgərinin Rusiya qüvvələrinə qoşulmağa hazırlaşdığına dair kəşfiyyat məlumatı aldıqlarını bildirib.
Şimali Koreya və Moskva isə Şimali Koreyanın Rusiyaya qoşun və silah göndərməsi iddialarını təkzib edirlər.
TAHİR
