AMEA-da çox həbslər olacaq - konkret adlar çəkilir...
İlqar Orucov: “Dövlət vəsaitlərini məhz səmərəsiz şəkildə xərcləmək, onu israf etmək yolverilməzdir”
Məlum olduğu kimi, Azərbaycan Milli Elmlər Akademiyasında baş vermiş qanun pozuntusu faktları ilə bağlı cinayət işi başlanıb. Bu barədə Baş Prokurorluğun Mətbuat xidməti məlumat yayıb.
Bildirilib ki, Azərbaycan Respublikasının Hesablama Palatasından daxil olmuş material əsasında Milli Elmlər Akademiyasının fəaliyyətində aşkar edilmiş qanun pozuntuları ilə bağlı aparılmış araşdırma üzrə Baş prokuror yanında Korrupsiyaya qarşı Mübarizə Baş İdarəsində cinayət işi başlanıb. Qurumun 2020-2023-cü illərə dair fəaliyyəti üzrə təyin edilmiş audit yoxlamaları nəticəsində vəzifəli şəxslər tərəfindən külli miqdarda dövlət vəsaitinin təyinatı üzrə istifadə edilməməsi, habelə digər qanun pozuntularının törədilməsinə əsaslı şübhələr müəyyən edilib.
Qeyd etdiyimiz kimi, AMEA-da baş verən qanunsuzluqlarla bağlı cinayət işi açılıb. Maraqlıdır, bu cinayət işinin sonu, hədəfi necə ola bilər?
“Alimlərin gözünün nurunun itirilməsi, gecə-gündüz laboratoriyalarda, kitabxanalarda, tədqiqat zamanı udduqları toza görə verilən pulu mənimsəyənlər o vəsaiti geri qaytarmalı və ən ağır şəkildə cəzalandırılmalıdır”
Azərbaycan Gənc Alim, Doktorant və Magistrlər Cımiyyətinin sədri, fəlsəfə doktoru İlqar Orucov “Bakı-Xəbər”ə şərhində bildirdi ki, Azərbaycanın elm məbədində baş verən hadisələr ürəkağrıdıcıdır: “Elmə aid olmayan insanların elmə münasibəti bu cür olmalıydı. O insanlar sayəsində Azərbaycan Milli Elmlər Akademiyası tək maddi deyil, mənəvi cəhətdən də zərərə uğradı. Ramiz Mehdiyevin AMEA-ya müdaxiləsi nəticəsində layiqsiz insanlar ora müxbir və həqiqi üzv seçildilər. Heç bir elmi məktəbi olmayan insanlar saxta himayəçilik əsasında Akademiyanın üzvu oldu. Aidiyyəti olmayan insanlara ordan ev verildi. Cinayət işinə ev məsələsi də aid edilməlidir. Akademiyada o qədər saxtakarlıqlar baş aldı ki, insan elm sözündən utanır. Orda baş verən hadisələrə görə günahı olan hər bir şəxs sərt şəkildə cəzalandırılmalıdır. Mənimsənilmiş bütün pullar qəpiyinə qədər Akademiyaya geri qaytarılmalıdır. Elmə ayrılan vəsaiti mənimsəyənlərin adı bir-bir açıqlanmalıdır. Alimlərin gözünün nurunun itirilməsi, gecə-gündüz laboratoriyalarda, kitabxanalarda, tədqiqat zamanı udduqları toza görə verilən pulu mənimsəyənlər o vəsaiti geri qaytarmalı və ən ağır şəkildə cəzalandırılmalıdır. AMEA-nın başına gətirilən oyunlar dövlətə xəyanətdir. Dövlət vəsaitlərini məhz səmərəsiz şəkildə xərcləmək, onu israf etmək yolverilməzdir. Akademiyada çoxlu sayda “ölü canlar”, şişirdilmiş ştatlar yaradıldı. Danılmaz faktdır ki, oranın işçiləri işə metro ilə gedib-gəlirdi. Ancaq Akademiyanın rəhbərliyi, həm institut direktorları çox bahalı maşınlarda gəlirdilər. Bu nə dərəcədə doğrudur? Onların maaşı hər kəsə bəllidir”.
Günel CƏLİLOVA
