Azərbaycan iqlimlə bağlı daha bir əməkdaşlıq formatı ortaya qoydu - "Şamaxı məsləhətləşmələri"...
Mübariz Göyüşlü: “İqlim dəyişmələri ekoloji problemlə mübarizədə maliyyə dəstəyi tələb edən məsələdir”
Azərbaycan daha bir qlobal tədbir ərəfəsindədir. Ölkəmizdə BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına - COP29-a hazırlıqlar yüksək səviyyədə davam edir.
Məlum olduğu kimi, Prezident İlham Əliyev COP-öncəsi tədbirin iştirakçılarına müraciət ünvanlayıb. Azərbaycan Prezidentinin COP29 tədbirinə müraciəti geniş və çoxşaxəlidir. Burada iqlim dəyişikliklərinin yaratdığı qlobal problemlərdən bəhs edilir və Azərbaycanın bu sahədəki fəaliyyəti vurğulanır.
Müraciətdə Azərbaycanın təşəbbüsü ilə irəli sürülmüş innovativ “Şamaxı məsləhətləşmələri”nin iqlim üzrə danışıqların gələcək inkişafı üçün səmərəli qeyri-rəsmi format rolunu oynayacağı qeyd edilib. Maraqlıdır, “Şamaxı məsləhətləşmələri” iqlim üzrə danışıqların nə kimi perspektivi var?
“Az inkişaf etmiş, inkişaf etməkdə olan kiçik ada dövlətlərinin ehtiyaclarını təmin etmək üçün Azərbaycanın məlum təşəbbüsü alqışlanmalıdır”
Siyasi şərhçi Mübariz Göyüşlü “Bakı-Xəbər”ə açıqlamasında qeyd etdi ki, iqlim dəyişmələri, ekoloji problemlə mübarizədə maliyyə dəstəyi tələb edən məsələdir. Bu səbəbdən də inkişaf etməkdə olan və kiçik ada dövlətlərin bu məsələləri təmin etməsi o səviyyədə deyil: “Hesab edirəm ki, Azərbaycanın İtki və Zərərə Cavab Fondunun yaradılması təşəbbüsü faydalı nəticələrə səbəb ola bilər. Əlbəttə, az inkişaf etmiş, inkişaf etməkdə olan kiçik ada dövlətlərinin ehtiyaclarını təmin etmək üçün Azərbaycanın məlum təşəbbüsü alqışlanmalıdır. Lakin yalnız Azərbaycanın təşəbbüsləri ilə bizim nəticə əldə etməyimiz çətin olar. Bu səbəbdən də müvafiq dövlətlərin, xüsusən böyük dövlətlərin, təşkilatların bu məsələ ilə bağlı dəstək verməsi lazımdır. Biz öz üzərimizə düşən işi edirik və edəcəyik. Digər ölkələrin də bu istiqamətdə müəyyən səy göstərməsi lazımdır. Hər bir ölkə COP29-a öz töhfələri ilə gəlir, dünyanı gələcək fəlakətlərdən necə qorumağın yollarını birgə müzakirə etmək üçün bir masa ətrafına toplanır. Azərbaycan həm də dünya birliyinə iqlim dəyişmələri ilə bağlı problemləri necə aradan qaldırmağın yollarını göstərir, özünün görülən və görüləcək işlərdə nümunə olduğunu diqtə edir”.
Günel CƏLİLOVA
