Azərbaycan və Orta Asiya ölkələrinin "iqlim əleyhinə" yeni ittifaqı yarana bilər...
Rəsul Cahangirli: “Xəzərin ekologiyasının qorunması ilə bağlı bu ölkələrlə ortaq mövqedən çıxış etmək olar”
Azərbaycan COP29-a sədrliyi çərçivəsində regionumuzda iqlim dəyişmələri ilə bağlı problemlərin həlli üçün Mərkəzi Asiya ölkələri ilə birgə təşəbbüsləri dəstəkləməyə hazırdır.
Bunu Prezident İlham Əliyev Qazaxıstanın paytaxtı Astanada Mərkəzi Asiya və Azərbaycan Respublikasının Dövlət Başçılarının görüşündə deyib.
“Mən artıq Mərkəzi Asiya ölkələrinin prezidentlərinə rəsmi dəvət məktubları göndərmişəm və noyabrda Bakıda yenidən görüşməyimizə şad olaram”, - deyə Azərbaycan Prezidenti qeyd edib.
Maraqlıdır, iqlim dəyişmələri ilə bağlı problemlərin həlli ilə əlaqədar Azərbaycanın Orta Asiya ölkələri ilə əməkdaşlığının nə kimi perspektivləri var?
“Bir var, bir ölkə ekologiyanın qorunması ilə bağlı hansısa təşəbbüslə çıxış etsin, bir də var, bir neçə region dövləti buna qoşulsun”
Sözügedən məsələyə aydınlıq gətirən ekspert Rəsul Cahangirli “Bakı-Xəbər”ə açıqlamasında bu sahədə əməkdaşlığın perspektivinin olduğunu qeyd etdi: “Azərbaycanın Orta Asiya ölkələri ilə iqlim sahəsində əməkdaşlığını şərtləndirən bir sıra faktorlar var. Əvvəla, coğrafi baxımdan bir-birinə yaxın ölkələrdir. Xəzər dənizinin sahilində yerləşən 5 dövlətdən ikisi Orta Asiya ölkəsidir – Qazaxıstan və Türkmənistan. Azərbaycan bu dövlətlərin hər ikisi ilə su sərhədinə malikdir. O baxımdan Xəzərin ekologiyasının qorunması ilə bağlı bu ölkələrlə ortaq mövqedən çıxış etmək olar. Ən başlıca problem də Xəzər dənizinin quruması ilə əlaqədardır. Bu da ekoloji baxımdan bütün sahilyanı ölkələri təhdid edir. Hesab edirəm ki, Xəzərin qorunması ilə bağlı əməkdaşlığın perspektivi var. Digər tərəfdən, Azərbaycanla yanaşı, Orta Asiya dövlətləri də böyük “yaşıl enerji” potensialına malikdirlər. Birgə əməkdaşlıq çərçivəsində həm “yaşıl enerji” enerji istehsalını genişləndirmək, həm də onu ixrac etmək mümkündür. Bu da ekologiyanın qorunmasına öz töhfəsini verəcək. Bu sahədə əməkdaşlıq iqlim dəyişiklikləri ilə bağlı problemlərin birgə həllinə öz töhfəsini verə bilər. Yəni işlərin birgə koordinasiya edilməsi işin effektini artıracaq. Çünki bir var, bir ölkə ekologiyanın qorunması ilə bağlı hansısa təşəbbüslə çıxış etsin, bir də var, bir neçə region dövləti buna qoşulsun. Əlbəttə ki, ikincisi daha səmərəlidir. Bu baxımdan hesab edirəm ki, Prezident Əliyevin təşəbbüsü düzgündür və eyni zamanda reallığı özündə ehtiva edir. Hesab edirəm ki, bunun müsbət nəticələri olacaq”.
Vidadi ORDAHALLI
