Şərqdə müsəlman qanı su yerinə axır - "sülhsevər" Roma Papasının səsi gəlmir...
Məhərrəm Zülfüqarlı: “Çox təəssüf ki, Vatikan qan-qadanın, ölüm-itimin qarşısının alınması mövqeyindən çıxış etmir”
Erməni hiyləsinə və təxribatına operativ cavab verən, hətta ermənilərə yersiz dəstək nümayiş etdirən Roma Katolik Kilsəsinin rəhbəri Papa Fransisk, nədənsə, Fələstində yaşanan insan faciəsinə heç gözünün ucu ilə belə baxmaq istəmir. Demək lazımdır ki, Fələstindəki insanlıq faciəsinə və müharibəyə münasibətdə Roma Papasının heç bir fəallığı yoxdur.
Bu necə sülhsevər dini mərkəzdir, o necə Papadır ki, Fələstində yaşananlara fəal müdaxiləsi yoxdu? Qeyd etdiyimiz kimi, Qarabağdan cəmi 100 min (ermənilərin təqdim etdiyi şişirtmə rəqəm) erməni könüllü çıxıb getdi, amma Papa buna görə ard-arda bir neçə dəfə danışdı, Azərbaycana yersiz çağırışlar etdi, amma Qəzzada bir neçə milyon adam məhv olur, Papanın səsi belə çıxmır.
“Roma Papasının Fələstində baş verən insan faciəsinə soyuqqanlı yanaşması təəssüf doğurur”
AVCİYA-nın vitse-prezidenti, professor Məhərrəm Zülfüqarlı “Bakı-Xəbər”ə şərhində “Roma Katolik kilsəsinin mərkəzi olan Vatikan və həmin dini dövlətin başında duran Papa daim siyasətə qarışıb. Yeri gəldikcə, dünya siyasətinə də təsir edə bilib. Hətta orta əsrlərə qayıtsaq görərik ki, Papanın nümayəndələri Qaraqorum şəhərinə, tatar-monqolların mərkəzinə elçi göndərib və onlara “siz gəlin katolik kilsəsinin təsiri altına düşün, katolikliyi qəbul edin” deyiblər. Görün nə qədər ərazi keçərək ağılsız təkliflər ediblər və onlara da layiqli cavablar verilib. Qaldı indiki dövrə, Roma Katolik Kilsəsi hələ indiyə qədər obyektiv mövqe tuta bilməyibsə, tərəf tutub xristian təəssübkeşliyi ilə çıxış edibsə, hazırda baş verən İsrail-Həmas müharibəsində seyirçi mövqe tutması təbiidir. Bu gün Roma Papasının Fələstində baş verən insan faciəsinə soyuqqanlı yanaşması təəssüf doğurur. Bu yanaşma da dini baxışa söykənən ideologiyaya başucalığı gətirmir. Günahsız insanlar, uşaqlar, qadınlar qırılır, bu qanlı mənzərələrə biganə qalmaq bütün dini inanclara ziddir. Özünü Allah adamı hesab edən, dini ibadətlə məşğul olan, tək Allaha inanan əsl dindarlar bu məsələdə tezliklə sülhün bərqərar olmasına, danışıqlarda vasitəçi olmağa çalışmalıdırlar. Əgər bunu etmirlərsə, demək onların yeritdiyi siyasət də bilavasitə öz maraqlarına xidmət edir” - deyə bildirdi.
M.Zülfüqarlı qeyd etdi ki, bu halda dindən danışmağa dəyməz. Erməni təəssübkeşliyindən qalmayan Papanın fələstinlilərin faciəsinə göz yummasının mənfi hal olduğunu deyən M.Zülfüqarlı hesab edir ki, Papanın reaksiyası olmalıdır. “Çox təəssüf ki, erməni toruna düşüb Azərbaycana haqsız çağırışlar edən Papa fələstinlilərin faciəsinə son qoyulmasına çağırış etmir. Fələstin ərazisində İsrail-Həmas münaqişəsinin sona çatmasını kim arzulayırsa, tezliklə qırğınlara son qoyulması üçün kimlər vasitəçilik etmək istəyirsə, əsl düzgün mövqe onların mövqeyidir. Amma çox təəssüf ki, Vatikan qan-qadanın, ölüm-itimin qarşısının alınması mövqeyindən çıxış etmir. Bu da onun beynəlxalq səviyyədə imicinə müsbət nəsə gətirməyəcək”-deyə M.Zülfüqarlı qeyd etdi.
Əli TURABOV
