İngilisdillilər arasında ABŞ və Qərbin casus şəbəkəsi yetişdirilir?..
Qərb təşkilatlarının Azərbaycana marağının təsadüfi olmadığı məlumdur. Xüsusən də onların əvvəlki dövrlərdə bir sıra hallarda ödənişsiz ingilis dili kurslarının təşkili diqqəti çəkirdi. ABŞ və Avropa təşkilatlarının “xeyirxah” davranışı hər kəsin diqqətini cəlb etməmiş deyil.
Belə bir rəy var ki, Qərb təşkilatlarının və Amerikanın himayəsində olub Azərbaycanda uşaqlara ingilis dili öyrədən kurslarda şagirdlər və Qərbdə təhsil alıb gəlmiş mütəxəssislər arasında Qərbin casus şəbəkəsi qurulur.
Bu nə qədər doğru iddia ola bilər? Belə ehtimallar ola bilərmi?
Bəzi ekspertlər deyir ki, o təşkilatlar və ABŞ-a bağlı qurumlar ölkəmizdə özünün casus şəbəkəsini yaratmaq üçün kifayət qədər cəhdlər göstərib, müxtəlif təhsil proqramları həyata keçirməklə, kurslar təşkil etməklə bunu həyata keçirmək niyyəti güdüblər. İngilisdillilər arasında bu işinin aparılmasının xüsusilə hədəfləndiyini deyən eksperlərin fikrincə, ABŞ-a bağlı təkilatlar Azərbaycanda onlara sadiq insanların yetişdirilməsinə az maraq göstərmir.
“...O uşaqlarda və gənclərdə həmin o kursları təşkil edən ölkələrə, təşkilatlara rəğbət və bağlılıq yaranır”
Siyasi şərhçi Azər Həsrət baki-xeber.com-a “Əlbəttə, hamını şübhə altına almağın tərəfdarı deyiləm. Qərbdə oxuyan və Azərbaycan dövləti üçün kifayət qədər böyük işlər görən istənilən sayda həmvətənlərimiz var. Amma bir şeyi də unutmayaq, yaxşı deyirlər ki, pulsuz pendir tələdə olur. Bəzən baxırıq, həvəsləndirici pulsuz kurslar təşkil olunur, yaxud bu kurslar güzəştli qiymətlərə olur. Bəzən görürsən ki, istər uşaqların, istərsə də gənclərin cəlb edilməsi üçün müəyyən addımlar atılır. Bu addımların arxasında maraq durmamış deyil. Buna casus şəbəkəsi də deməyək, bu bir az fərqli bir şeydir. Bir qayda olaraq nə edirlər? İngilis dili kursları, yaxud Qərbdə gənclərin oxudulması istər-istəməz o uşaqlarda və gənclərdə həmin o kursları təşkil edən ölkələrə, təşkilatlara rəğbət və bağlılıq yaradır. Təbiidir ki, həmin o bağlılıq da gələcəkdə həmin məsələrdə problemlərə səbəb ola bilir. Yəni bu bir sınanmış üsuldur, taktikadır”-deyə bildirdi.
A.Həsrətin sözlərinə görə, bu taktikadan yalnız Qərb deyil, yanı başımızda Rusiya, İran da istifadə edir. Uzun illər İranın ölkəmizdə həyata keçirdiyi əməlləri, pulsuz təşkil etdiyi kursları, dərnəkləri, mədəniyyət mərkəzlərini xatırlayan A.Həsrət vurğuladı ki, qonşu dövlətlər olan İranla Rusiya da bu sahədə boş durmayıblar. “Bu baxımdam düşünürəm ki, məsələlərin üzərinə bir az ehtiyatla, diqqətlə getmək lazımdır. Məsələnin mahiyyətinə varmaqla burada biz problemi aşkarlaya bilərik. Yenə də deyirəm, hamını qaralamaq düzgün deyil. Amma o dövlətlərə bağlı olanların olduğu da istisna edilmir”-deyən A.Həsrət qeyd etdi ki, o uşaqlar və gənclər harada olurlarsa olsunlar, harada oxuyurlarsa oxusunlar, amma onların vətəninin Azərbaycan olduğunu unutmasınlar. “Onlar unutmasınlar ki, onların vətəni Azərbaycandır, ingilis dili öyrədən hansısa kursların bağlı olduğu dövlətlər deyil”-deyə siyasi şərhçi vurğuladı.
İradə SARIYEVA
