ABŞ-dan iddia - "Qarabağdakı rus sülhməramlıları əvəz edilməlidir"...
Amid Əliyev: “Bölgəyə hansısa yeni bir missiyanın və ya qüvvənin gəlməsinə heç bir ehtiyac yoxdur”
ABŞ Dövlət Departamenti hesab edir ki, Rusiyanın Azərbaycan Respublikasının Qarabağ iqtisadi regionundakı sülhməramlıları əvəzlənməlidir.
Bunu ABŞ dövlət katibinin Avropa və Avrasiya məsələləri üzrə köməkçisi Ceyms Obrayen Konqresin Nümayəndələr Palatasının Xarici Əlaqələr Komitəsində çıxışı zamanı deyib:
“2020-ci il atəşkəs bəyanatına görə Rusiya qoşunları hazırda oradadır, bu onların ilk müddətidir. Bu ölkələr (Ermənistan və Azərbaycan – red.) üçün alternativ olarsa, Rusiya sülhməramlılarının iştirakına artıq ehtiyac qalmayacaq. Onlar artıq sülhməramlılar kimi öz vəzifələrini yerinə yetirə bilməyiblər”.
O əlavə edib ki, ABŞ Rusiya sülhməramlılarına alternativ təklif etməyə hazırdır:
“Ən yaxşı yanaşma hər iki ölkəyə alternativ verməkdir - bizimlə və Qərblə işləmək”.
ABŞ və Qərb açıq şəkildə Ermənistanı müdafiə etdiyi halda, Azərbaycan bu təklifi qəbul edərmi? Onların neytrallığı yoxdursa, necə alternativ ola bilərlər?
Siyasi şərhçi Amid Əliyev “Bakı-Xəbər”ə açıqlamasında bildirdi ki, ABŞ tərəfindən bu fikrin indiki məqamda səsləndirilməsini təsadüfi hesab etmək olmaz: “Bir halda ki, ABŞ ciddi cəhdlə Ermənistana nüfuz edir, Rusiya ilə Ukrayna cəbhəsində müharibə aparır və belə olan təqdirdə Qafqazada Rusiyaya qarşı demarşa da hazırlaşır.
Bu bəyanatda bir neçə maraqlı məqam var.
Birincisi, Qarabağ problemi artıq bitib. Bölgədə yenidənqurma və bərpa işləri gedir. İcmalar arasında etimad və etibara əsaslanan reinteqrasiya prosesi uğurla icra olunur. Ərazidə Azərbaycanın suverenliyi tam şəkildə bərpa olunub, nəzarət Azərbaycandadır.
İkincisi, bölgədə Rusiya SMQ olmasına baxmayaraq, təhlükəsizlik artıq Azərbaycan tərəfindən təmin olunur. SMQ üzərinə düşən sülhyaratma missiyası, demək olar ki, bitib. Bu fikirlə razılaşmaq olar. Lakin RF SMQ-nin bölgədə olması, çıxması 10 noyabr Bəyanatı ilə tənzimlənir. Onların bölgədən vaxtından əvvəl çıxması isə sırf Azərbaycandan asılıdır.
Üçüncüsü, bölgəyə hansısa yeni bir missiyanın və ya qüvvənin gəlməsinə heç bir ehtiyac yoxdur. Bu məsələnin isə Ermənistanla müzakirə olunmasının özü belə absurddur. Azərbaycan bu məsələdə heç kimə güzəştə getməyəcək və hansısa 2 -ci və 3 -cü dövlətin qüvvələrini öz ərazisinə buraxmayacaq.
ABŞ hər iki ölkə ilə, xüsusilə də Azərbaycanla konstruktiv mövqe qurmaq istəyirsə, baş verən prosesləri düzgün və ədalətli şəkildə qiymətləndirməli, Ermənistana sülhə görə təzyiqlər etməli, bitərəfliyi saxlamağı bacarmalıdır.
Rusiya ilə ziddiyyətləri Azərbaycan üzərindən müəyyən etmək düzgün qərar hesab edilə bilməz. Azərbaycan hər bir dövlətlə qarşılıqlı etimada əsaslanan münasibətlərin qurulması və ən əsası, bölgədə sülhün qorunmasına xidmət edəcək siyasəti dəstəkləyir”.
Məhəmmədəli QƏRİBLİ
