ABŞ kəşfiyyatı Qafqazda “müharibəyə təhrikçilik" hesabatı yaydı...
Rəşad Bayramov: “...regionda yeni münaqişə ocağının yaranmasına verilən dəstəkdən başqa nəsə deyil”
Erməni mediası ABŞ kəşfiyyatının illik qiymətləndirilməsinə dair bəzi qısa fraqmentləri təqdim edib.
1. Bakı Dağlıq Qarabağı ələ keçirə bilsə də, Ermənistanla Azərbaycan arasında gərginlik davam edəcək.
2. 2024-cü ildə Ermənistan və Azərbaycan arasında mümkün münaqişə qısamüddətli və məhdud intensivliyə malik ola bilər.
3. Yeni münaqişə risqini artıran amillər: Azərbaycanın məqsədlərə çatmaq üçün güc və hərbi təzyiqdən istifadə etməyə hazır olması; hərbi qulluqçuların yaxınlığı; atəşkəs mexanizminin və sülh müqaviləsinin olmaması.
Azərbaycanın “dəhliz” əldə etmək istəyi hərbi gücdən istifadə risqini artırır.
Nəticələr:
1. Azərbaycan Ermənistana qarşı güc tətbiq edəcək. Təhlükəsizlik zəmanətləri məhdud eskalasiya üçün maneə deyil.
2. Ən çox ehtimal olunan hücum istiqaməti “anklavlar” əldə etmək üçün Tavuşdur. Xarici aktorlardan kəskin reaksiya olmasa, Bakı dəhlizi mümkün qədər tez yarmağa çalışacaq.
3. “Təcavüzkarı” (Azərbaycan nəzərdə tutulur-red) sakitləşdirmək cəhdləri nəticə vermir. Hətta danışıqlarda “Artsaxı” və “anklavları” təslim edən Ermənistan rəhbərliyi 2022-ci ilin sentyabrında xeyli əsgərini və strateji yüksəkliklərə malik əraziləri itirdiyi müharibəyə bənzər yeni müharibə ilə üzləşəcək.
Hesabatda həmçinin qeyd olunur ki, guya Rusiya zəiflədiyi üçün Qarabağ və onun ətrafında baş verənlərə seyrçi qalıb.
Ermənistanda həyəcanla müzakirə olunan bu hesabat əslində ABŞ-ın obyektivliyini deyil, qızışdırıcı niyyətini ortaya qoyur. Çünki sadalanan bəndlərin, demək olar ki, hamısı bizə ziyan, Ermənistana isə xeyirdi. Bütün bu tezisləri uzun illərdi ki, Ermənistan beynəlxalq rəydə özünə haqq qazandırmaq üçün səsləndirir. Bir sözlə, ABŞ kəşfiyyatı adından yayılan bu sənədi Vaşinqtonun müharibəyə yeni təhrikçilik cəhdi kimi dəyərləndirmək olarmı?
Siyasi şərhçi Rəşad Bayramov “Bakı-Xəbər”ə açıqlamasında bildirdi ki, demək olar, bütün detallar Ermənistanın mülahizələrinə uyğun qurulub. Qoşunların “güzgü effekti” ilə geri çəkilməsinin vacibliyini, güya Azərbaycanın Zəngəzur dəhlizinə hücum edəcəyi ilə bağlı mülahizələri Ermənistan indiyə qədər beynəlxalq ictimai rəyə yeritməyə çalışıb. Hesabatla tanış oldum. Orada həm də qeyd edilir ki, Ukraynadakı müharibə Rusiyanın Cənubi Qafqazda regional təhlükəsizlik arbitri rolunu zəiflədib, buna görə Moskva Azərbaycanın Qarabağda keçirdiyi əməliyyatın (bir günlük antiterror tədbirləri nəzərdə tutulur) qarşısını almaq üçün resurs və siyasi kapitalını istifadə etmək istəməyib. Çox yalnış təsbitdir. Rusiya gücünü itirsə, Ukraynada bütün dünya ilə vuruşub, önə çıxmağı bacarmaz. Yaxşı olardı ki, ABŞ kəşfiyyatı vəziyyəti olduğu kimi təsvir etsin. Rusiyanın mövqe dəyişikliyini özünün Ermənistandakı fəallığı ilə izah edə bilərdi. Səfirlik adı ilə az qala həmin ölkədə hərbi baza saxlayır. Paşinyan məhz onların təhriki ilə Rusiyaya meydan oxuyur, rus bazalarının Ermənistandan çıxarılmasını tələb edir. Nə əcəb bu detallara toxunmur? Görünür ki, 2024-cü ildə müharibənin olmasını ABŞ çox istəyir. Bununla Rusiyanın başını qatmağa çalışır. Ancaq bunun da başlıca səbəbini Azərbaycanın hücum etmək cəhdi ilə əlaqələndirir. Bir sözlə, bütün bu fikirlər regionda yeni münaqişə ocağının yaranmasına verilən dəstəkdən başqa nəsə deyil. Yaxşı olardı ki, ABŞ gərginliyə səbəb olan əsas məsələ olan, Ermənistanın üzərinə götürdüyü öhdəlikləri yerinə yetirmədiyini də qeyd edərdi. Bunu etməyibsə, deməli, təqdim etdiyi hesabat qərəzli və məqsədlidir”.
Məhəmmədəli QƏRİBLİ
