İlham Əliyev Şuşadan sonrakı planlarını vaxtsız açsaydı...
“...Qırx dörd günlük müharibə zamanı çoxlu xarici media nümayəndələrinə müsahibələr verərək, təbii ki, bizim planlarımız haqqında mən danışa bilməzdim. Halbuki suallar, demək olar ki, təkrarlanırdı. Bir dəfə demişdim ki, Şuşasız bizim işimiz yarımçıq olacaq. Ancaq hələ o vaxt mən bilirdim ki, Xankəndisiz, Xocalısız bizim işimiz yarımçıq qalacaq. Üç il bundan əvvəl mən əmr verərək Azərbaycan Ordusunu dayandırdım və bir daha demək istəyirəm, tarix göstərdi ki, nə qədər düzgün addım idi. Ancaq o gündən, bax, bu günə qədər - sentyabr ayına qədər hər gün biz işləyirdik, çalışırdıq ki, Azərbaycanın suverenliyi tam şəkildə bərpa edilsin. Oktyabrın 15-də Ağdərədə, Əsgəranda, Xocavənddə, Xocalıda və Xankəndidə mən Azərbaycan Bayrağını qaldırdım. Bundan böyük xoşbəxtlik ola bilməz - həm mənim üçün, həm sizin üçün, həm Azərbaycan xalqı üçün, həm də bütün dünya azərbaycanlıları üçün...”
Bu sözləri Azərbaycan Prezidenti İlham Əliyev 8 Noyabr – Zəfər Günü münasibətilə Xankəndi şəhərində keçirilən hərbi paradda çıxışında deyib.
“O vaxt o qüvvələr Xankəndidə hansısa təxribatlar törədib bunu Azərbaycanın üzərinə ata bilərdilər”
Prezidentin ordumuzun 3 il əvvəl Xankəndiyə girməməsinin səbəbi ilə bağlı açıqlamasına münasibət bildirən politoloq Tural İsmayılov baki-xeber.com-a bildirdi ki, Azərbaycan liderinin düşünülmüş siyasət strategiyası var və həmin strategiya da vaxtlı-vaxtında özü tərəfindən icra edilir: “Təbii ki, bütün bunlar da ölkəmizin sonucda qələbələrilə nəticələnir. Ona görə də, onun fikirlərində xüsusi bir məqama diqqət yetirmək lazımdır. Cənab Prezident daim söyləyir ki, mən nəyi necə və nə vaxt etməli olduğumu bilirəm. Sonuncu antiterror tədbirləri də göstərdi ki, bütövlükdə ölkə Prezidentinin həm xarici siyasətlə, həm də bütövlükdə ölkənin suverenliyi və təhlükəsizliyi ilə bağlı konkret strategiyası və hədəfləri olub. Əvvəlcədən düşünülmüş bu planlar, strategiyalar nəticəsində də Azərbaycan böyük bir uğura tərəf yön alıb. Həm qlobal siyasi təşəbbüslərdə kifayət qədər ön plana çıxıb, həm iqtisadi, hərbi, müdafiə sənayesi baxımdan yüksək inkişaf edib, həm də nəticədə öz torpaqlarını işğaldan azad edə bilib.
Ona görə də 2020-ci ildə baş verən hadisələrdə hamıya bəlli idi ki, əvvəl-axır Azərbaycanın suverenliyi Xankəndi və ətrafında da bərqərar ediləcək. Sadəcə, həmin dövrdə Azərbaycanı hansısa məsələlərdə beynəlxalq güclər onsuz da ittiham edirdi, ölkəmiz ətrafında siyasi şou tamaşaları qurmağa çalışırdılar. O vaxt o qüvvələr Xankəndidə hansısa təxribatlar törədib bunu Azərbaycanın üzərinə ata bilərdilər”.
T.İsmayılov vurğuladı ki, ona görə də Azərbaycan bu tarixi zəfərləri məhz Prezident İlham Əliyevin siyasi qətiyyəti, uzaqgörənliyi və düşünülmüş strategiyası ilə əldə edib.
İradə SARIYEVA
