7 fevral seçkisi ictimai və dövlət marağını necə uzlaşdıra bilər?..
Müstəqilliyin ilk illərindən respublikamızda bütün dünyada qəbul edilmiş demokratik siyasi sistemə uyğun milli dövlət quruculuğu istiqamətində islahatlar həyata keçirildi.
Ulu öndər Heydər Əliyevin başlatdığı və Prezident İlham Əliyevin davam etdirdiyi dərin və çoxşaxəli islahatlar Cənubi Qafqaz regionunun hərtərəfli inkişafının qarşısında böyük əngələ çevrilmiş Qarabağ probleminin həll olunmasına gətirib çıxarmaqla yanaşı, həm də Azərbaycanın dünya birliyinin mühüm aktoru kimi qəbul edilməsinə şərait yaratdı. Şübhəsiz, gələn il keçiriləcək növbədənkənar prezident seçkilərinin respublikamızın beynəlxalq aləmdəki mövqelərini daha da gücləndirəcək.
7 fevral seçkilərində iştirak edənlər bütöv Azərbaycanın vətəndaşı olmağın qürurunu yaşayacaqlar
Azərbaycan vətəndaşı 2024-cü il fevralın 7-də keçiriləcək növbədənkənar prezident seçkilərinə tam fərqli hisslərlə gedəcək. 30 il öncə hamımız seçkilərin, demək olar ki, 20 faizində keçirilməyən ölkənin vətəndaşı idik. Öz doğma yurd-yuvalarından qovulmuş vətəndaşlarımız yaşadığı ərazilərdə deyil, pənah gətirdikləri ərazilərdəki seçki məntəqələrinə üz tutaraq səsvermə hüququndan yararlanırdılar. İkinci Qarabağ müharibəsindən sonra vəziyyət kökündən dəyişdi. Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu 30 illik erməni işğalına son qoyaraq ərazi bütövlüyümüzü bərpa etdi. Əzəli torpaqlarmızı zorla qoparmağa çalışan erməni separatçılarına və onların himayədarlarına tarixi dərs verən Prezident İlham Əliyevin qətiyyəti və uzaqgörən siyasəti sayəsində Azərbaycan dövlətinin siyasi hakimiyyətinin təsiri azad olunmuş ərazilərdə də bərqərar oldu. İndi keçmiş məcburi köçkünlər siyasi həyatımızın əlamətdar hadisəsinə çevriləcək növbədənkənar prezident seçkilərinə öz doğma şəhər və qəsəbələrindəki yaradılan məntəqələrdə səs verəcəklər. Zəfər seçkiləri kimi tarixi düşəcək 7 fevral seçkilərində iştirak etməklə bütöv Azərbaycanın vətəndaşı olmağın qürurunu yaşacaqlar.
Dekabrın 19-dan etibarən Azərbaycanda növbədənkənar prezident seçkisi ilə əlaqədar namizədlər - seçki hüququ olan vətəndaşlar, seçicilərin təşəbbüs qrupları, siyasi partiyalar, siyasi partiyaların blokları Azərbaycan Respublikası Prezidentliyinə namizədliyini irəli sürməyə başlayıblar. Seçki Məcəlləsinə əsasən, səsvermə gününə ən çoxu 50 və ən azı 30 gün qalmış saat 18.00-dək partiyanın, siyasi partiyalar blokunun səlahiyyətli nümayəndəsi namizədin qeydə alınması üçün zəruri olan seçki sənədlərini Mərkəzi Seçki Komissiyasına təqdim etməlidir. Namizədin qeydə alınması üçün zəruri olan seçki sənədlərinin Mərkəzi Seçki Komissiyasına təqdim edilməsinə 2023-cü il dekabrın 19-dan başlanıb və bu müddət 2024-cü il yanvarın 8-i saat 18.00-dək olan dövrü əhatə edəcək. Həmin müddətədək namizədliyin rəsmi qeydə alınması üçün lazım olan ən azı 40 min seçici imzası (60 seçki dairəsini əhatə etməklə) MSK-ya təqdim edilməlidir.
Hazırda Prezident İlham Əliyev reytinqinin ən yüksək nöqtəsindədir
Politoloq Qabil Hüseynli hesab edir ki, 7 fevral seçkisi ictimai və dövlət marağını necə uzlaşdırılması baxımından da olduqca önəmlidir:
“Hazırda Prezident İlham Əliyevin reytinqinin ən yüksək nöqtəsindədir. Belə reytinqlə seçkiyə getmək onun rəqibləri üzərində aşkar qələbə çalmasına səbəb olacaq. Bununla yanaşı, 2024-cü ildə bir sıra ölkələrdə - ABŞ və Rusiyada prezident, İranda isə parlament seçkiləri olacaq. Beynəlxalq aləmin təmsilçisi olan bir çox ölkələrin başı seçkilərə qarışmış olacaq. Belə olan təqdirdə xarici qüvvələrin ölkənin daxili işlərinə qarışmaq imkanları məhdudlaşacaq. Biz rahat şəkildə öz seçkimizi keçirə biləcəyik. Əli Kərimli kimi adamlar deyir ki, İlham Əliyev niyə cəmiyyətlə məşvərət etmədən bu qərarı verib. Çox cılız yanaşmadır. Bu adamlar bilmir ki, belə qərarı vermək birbaşa Prezidentin səlahiyyəti daxilindədir? Konstitusiyanın 108-ci maddəsinə əsasən, Prezidentə bu hüquq verilir. Bundan əvvəlki prezident seçkiləri də növbədənkənar olmuşdu. Hazırda fəaliyyətdə olan parlament də növbədənkənar seçilib. Əgər bu adamlar seçkidə iştirakdan qorxurlarsa, özlərinə başqa bəhanə tapsınlar, ya da zəif olduqlarını açıq etiraf etsinlər”.
Politoloqun sözlərinə əsasən, bu, Azərbaycanın bütün tarixi boyu baş tutacaq ən qürurverici seçki kimi tarixə düşəcək. Çünki üç il bundan əvvəl Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 gün ərzində Qarabağı və ətraf rayonları erməni işğalından azad etdi. Bu ilin sentyabrının 19-20-də isə uğurlu antiterror əməliyyatları ilə Azərbaycan beynəlxalq qanunlarla təsbit olunmuş ərazilərində suverenliyini, ərazi bütövlüyünü tam bərpa etdi. Beynəlxalq vasitəçilərin uzun illər edə bilmədiklərini və yaxud etmək istəmədiklərini Azərbaycan özü reallığa çevirdi”.
Ekspertin sözlərinə görə, 2020-ci ildə Prezident İlham Əliyev nəinki bölgədə, bütövlükdə dünyada yeni reallıq yaratdı. Bu qələbənin və uğurun əsas səbəbkarı məhz İlham Əliyevdir. Bütün bunlar nəzərə alınaraq ölkədə yeni prezident seçkilərinin keçirilməsi barədə qərarın qəbul edilməsi Prezident İlham Əliyevin müdrikliyinin və uzaqgörənliyinin növbəti parlaq təzahürüdür.
Heç şübhəsiz, Prezident İlham Əliyevin rəhbərliyi ilə bizi irəlidə hələ daha böyük qələbələr gözləyir. Azərbaycan xalqı hər zaman bütün sınaqlardan ölkə rəhbərliyi ətrafında sıx birləşərək çıxıb. Bu dəfə də xalqımız böyük müdriklik və uzaqgörənlik nümayiş etdirərək növbəti dəfə seçkidə iştirak etməklə, ictimai və dövlət maraqlarının müdafiəsində öz sadiqliyini nümayiş etdirəcək.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
