Tehran hələ də İrəvanın əlində Azərbaycana böhtan arenası olaraq qalır...
Qasım Hacıyev: “Təəssüf ki, Tehran da Ermənistan rəsmisinin Azərbaycana böhtan, şər atmasına şərait yaradır, halbuki, buna imkan verməməli idi”
Ermənilər, nəinki Qərb ölkələrini, eləcə də qonşu dövlətləri aldatmaqda israrlıdırlar. Yalan danışmaqda pərgar olan bu toplumun rəsmiləri də harda gəldi Qarabağla, oradakı irslə bağlı həqiqətə uyğun olmayan fikirlər səsləndirirlər.
Ermənistan xarici işlər nazirinin müavini Vahe Gevorqyan Tehranda Qədim Sivilizasiyalar Forumunun 7-ci iclasında çıxışı zamanı deyib ki, Qədim Sivilizasiyalar Forumuna üzv dövlətlər UNESCO kimi aparıcı beynəlxalq təşkilatlar çərçivəsində əməkdaşlığı inkişaf etdirmək üçün əlavə səylər göstərməlidir. O, Qarabağdakı erməni “mədəni irsindən” danışıb və iddia edib ki, guya orada erməni “mədəni irsi” “dağıdılır”, “məhv edilir”, “təhqir olunur”, “mənimsənilir”. Guya Qarabağdakı erməni əhali “etnik təmizləməyə” məruz qalıb, “yerli əhalinin zorla köçü baş verib” və bu da “erməni mədəni irsini daha da təhlükə altına qoyub”.
Erməni nazir müavini iddia edib ki, bu “təkcə Ermənistan üçün deyil, bütün bəşəriyyət üçün çağırışdır”.
“Bu baxımdan biz “Dağlıq Qarabağda” UNESCO-nun müstəqil ekspert missiyasının yerləşdirilməsinin tərəfdarıyıq, Azərbaycan hələ də bunun qarşısını alır”, - deyə Gevorkyan bildirib.
“Bu qurum çalışır ki, Qarabağa gəlib burada uydurma “erməni irsi” teatrı qursun”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Ermənistanın xarici işlər nazirinin müavininin Tehrandan Azərbaycanı hədəf seçməsi təsadüfi deyil. Q.Hacıyevin sözlərinə görə, sözügedən forumda Gevorkyan fürsətdən istifadə edib və Azərbaycanın Qarabağdakı “erməni irsini” “dağıtığını”, “mənimsədiyini” deyib. “Adam Ermənistan rəsmisinin bu çıxışını oxuyanda təəccüblənməyə bilmir. “Ermənistan rəsmisinin əsassız iddialarına detallı cavab vermək tamamilə mümkündür, amma onlar heç nəyi başa düşmək istəmədiyi üçün adam danışmaq istəmir. Qəribədir, Ermənistan törətdiyi cinayətlərdən, işğaldan, vandalizmdən sonra deməyə söz də tapa bilir. Bu adamın yazıb üzündən oxuduğu mətni bilirsiz nə ilə müqayisə etmək olar? Uşaq ki, yuxudan durub ağzına gələni danışır, Gevorkyanın danışığını ona bənzətmək olar. O, dünyadan Azərbaycanın tələb edə biləcəyi şeyləri tələb edir. Bu nə həyasızlıqdır, anlamaq olmur. Bunların danışdıqları nağıllara heç kəs inanmır. Amma yenə də nağıl danışırlar. Təəssüf ki, Tehran da Ermənistan rəsmisinin Azərbaycana böhtan, şər atmasına şərait yaradır, halbuki buna imkan verməməli idi. Nə baş verdiyini, gerçəyin nədən ibarət olduğunu qonşu İran da yaxşı bilir, amma Ermənistana dayan demir”.
Gevorkyanın UNESCO-ya çağırış etməsinə gəlincə, Q.Hacıyev xatırlatdı ki, 44 günlük müharibədən sonra, 2022-ci il fevralın 4-də Fransa prezidentinin, Azərbaycan və Ermənistan liderlərinin, həmçinin Avropa İttifaqı Şurasının sədrinin iştirakı ilə video formatda keçirilən dördtərəfli görüşdə UNESCO-nun Azərbaycan və Ermənistana missiya göndərməsi ilə bağlı razılıq əldə olunub, razılığa əsasən UNESCO-nun missiyası Azərbaycanın İrəvandakı abidələrini yoxlamağa gedəcəkdi, amma hələ də bu missiyadan xəbər yoxdur. “Bu missiya həm Azərbaycan, həm də Ermənistan ərazisində abidələrin monitorinqini keçirəcəkdi, vəziyyətini öyrənəcəkdi, amma hələ də UNESCO-nun sözügedən missiyası görsənmir. Biz dəfələrlə UNESCO-ya yazdıq, müraciət etdik, missiya göndərməsini tələb etdik, amma qurum bizim çağırışımızı nəzərə almadı. UNESCO nümayəndələri də Fransa rəsmiləri kimi ermənilərin çağırışına uyub onların qabağına düşüb hər yerə getmək istəyirlər. UNESCO missiyası obyektiv yoxlamalar keçirmək fikrində deyil, bu qurum çalışır ki, Qarabağa gəlib burada uydurma “erməni irsi” teatrı qursun.
Onlar obyektiv yoxlamalar keçirilərsə ermənilərin Qarabağ ərazisində törətdikləri kultsid cinayətlərinin hələ itməyən izlərini gərək dilə gətirsinlər. Amma obyektiv olmayacaqlar. Ermənilər Qarabağ ərazisini sözün həqiqi mənasında xaraba gününə qoyub, abidələri məhv edib, hər cür mədəni cinayərlər törədiblər. Bu gün UNESCO-nu Qarabağa gətirməklə Ermənistan nə əldə etmək istəyir, anlamaq çətindir. Dağıdılan, məhv edilən Azərbaycan irsidir. Bilirsiz ki, Qarabağda tarixən erməni irsi olmayıb, onlar bu torpağa gəlmədilər, gəlmə xalq nə mədəniyyət yarada, onun nə mədəni irsi ola bilər ki? Əvvəllər də ermənilər haray salmışdılar ki, Qarabağda guya bunların abidələri, evləri dağıdılır, amma sentyabrda BMT-nin missiyası Qarabağa gəldi və heç bir binanın, abidənin dağıdılmadığını bəyan etdi. BMT-nin müşahidə missiyasının bəyanatı azdır ki, indi UNESCO Qarabağa missiya göndərmək istəyir. UNESCO-nun missiyası Azərbaycana və Ermənistana eyni vaxtda gəlməlidir. Eyni vaxta hər iki ölkənin ərazisində missiya həyata keçirməlidir. Amma ermənipərəst UNESCO yenə də qərəzindən, birtərəfli mövqeyindən qalmır. Halbuki, ermənilərin törətdikləri cinayətləri bütün dünya bilir, amma nə edək ki, yenə də ermənipərəstlər meydandadır. Ermənilər qəbirlərə qədər söküb aparıblar, azərbayanlıların cəsədlərini təhqir ediblər. Belə bir vandal tayfanın siyasiləri danışanda sənə elə gəlir ki, ya bunların huşları başlarından çıxıb, ya da bunların əsəb damarları yoxdur. Torpaqlarımızı uzun illər işğal altında saxlayırdılar və biz onların nə etdiklərini bilmirdik, amma sonradan hamısı məlum oldu”-deyən Q.Hacıyev qeyd etdi ki, Ermənistan rəsmilərinin çağırışları nəticəsiz qalacaq, çünki dünyanın əksər ölkələrinin nümayəndələri ermənilərin cinayətlərinin şahidi olublar. Q.Hacıyev əlavə etdi ki, ermənilər son 30 ildə torpaqlarımızda özlərinə “qədim mədəniyyət” yaratmaqla məşğul olublar, bu isə tamamilə uğursuzluğa düçar olub.
İradə SARIYEVA
