Trampa ikinci sui-qəsd cəhdi - Məxfi Xidmət hərəkətə keçdi, bir nəfər saxlandı...
ABŞ-da noyabrın 5-də keçiriləcək seçkilərdən əvvəl prezidentliyə namizəd Donald Tramp iyulun 13-də Pensilvaniya ştatında keçirdiyi seçki mitinqində sui-qəsd cəhdinə məruz qalıb. Qulağından vurularaq ölümdən çətinliklə xilas olan Tramp 2 ay sonra silahlı hücumla yenidən gündəmə gəlib.
Belə ki, keçmiş prezident Trampın tez-tez qolf oynamağa getdiyi Trump National Golf Club-da atəş səsləri eşidilib. Trampın yaxınlığında eşidilən silah səsləri böyük panikaya səbəb olub.
Respublikaçılar Partiyasından prezidentliyə namizədin seçki kampaniyasının sözçüsü Trampın ətrafına atəş açıldığını və prezidentliyə namizədin heç bir xəsarət almadığını deyib.
“Donald Trampın yaxınlığında atəş açılıb, o, hazırda təhlükəsiz yerdədir və vəziyyəti yaxşıdır” - Trampın seçki kampaniyasının sözçüsü deyib.
Trampın seçki kampaniyasının kommunikasiya direktoru Stiven Çeunq bildirib ki, prezident Tramp hazırda təhlükəsiz yerdədir: "Hələlik əlavə təfərrüatlar yoxdur".
Trampın qolf klubu onun Palm Beachdəki Mar-a-Lago klubundakı dəbdəbəli iqamətgahından cəmi beş mil aralıda yerləşir. Keçmiş prezident seçki kampaniyası xaricində tez-tez burada qolf oynayarkən görülür.
Trampa silahlı hücum cəhdindən sonra ABŞ Məxfi Xidməti hərəkətə keçib. Birləşmiş Ştatlar Məxfi Xidmətinin sözçüsü Entoni Quqlielmi X-də məsələni araşdırdıqlarını söyləyib.
Hüquq-mühafizə orqanlarından isə, insidentin sözügedən ərazidən kənarda iki şəxs arasında baş verdiyini və Trampın hədəfdə olmadığını bildirib.
Donald Trampın oğlu kiçik Donald Tramp Jr isə sosial şəbəkədə atasının növbəti dəfə sui-qəsd cəhdinə məruz qaldığını iddia edib.
Kiçik Donald Jr Tramp əlavə edib ki, yaxınlıqda kolların arasından AK-47 tipli silah tapılıb: "Yenə dostlar! Florida ştatının West Palm Beach şəhərindəki Trump Golf Sahəsində atışma səsləri eşidildi. Yerli hüquq-mühafizə orqanlarının məlumatına görə, kolların arasından AK-47 tapılıb. Trampın kampaniyası keçmiş prezident Trampın təhlükəsiz yerdə olduğunu təsdiqləyən bəyanat yayıb. Bir şübhəlinin saxlandığı bildirilir".
TAHİR
