20 milyon manat Nəcməddin Sadıqova necə verilib? - Əsaslı ittihamlara cavab verilmir...
Artıq Azərbaycan cəmiyyətində Nəcməddin Sadıqov şəxsində ölkə yurisdiksiyasının qarşısında aciz qaldığı, ram edilə bilməyən "cinayətkar" fenomeni formalaşmaqdadir.
Cəmiyyətdə "Tərtər hadisələri" kimi tanınan cinayət işinin məhkəmə prosesində müttəhimlərin ifadələrində ittiham edilən, ayrı-ayrı generalların mediaya açıqlamalarında xəyənatkar əmrlər verdiyi, indi də 143 milyonluq mənimsəmədə ittiham edilən Müdafiə Nazirliyinin yüksək çinli məmurların məhkəməsində ona 20 milyona yaxın pulun verilməsi ittihamları irəli sürülsə də, bu şəxs "ölməz Kaşşey" kimi hələ də toxunulmazlığını saxlaya bilir. Hətta şahid qismində belə proseslərə cəlb edilmir.
Məsələn, bu günlərdə Müdafiə Nazirliyinin mənimsəməyə görə tutulmuş Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi polkovnik Cəlal Kazımov, Quru Qoşunların Maliyyə İdarəsinin sabiq rəisi Bayram Bayramov və Hərbi Dəniz Qüvvələrinin Maliyyə Xidmətinin sabiq rəisi Vüsal Əlizadənin cinayət işi üzrə məhkəmə prosesində Nəcməddin Sadıqova qarşı 20 milyon manatlıq ittiham irəli sürülüb. Belə ki, Bakı Hərbi Məhkəməsində hakim Fikrət Əliyevin sədrliyi ilə keçirilən prosesdə təqsirləndirilən şəxslərin vəkilləri bir sıra vəsatətlər verib. Həmin vəsatətlərdən birində Nizami Məmmədovun vəkili qeyd edib ki, cinayət işi üzrə təqsirli bilinən və ayrı icraatda məhkəməsi keçirilən Məlikməmməd Qurbanov ifadəsində vəzifədə işlədiyi 2015-2019-cu illərdə 20 milyon manat pul mənimsənildiyini deyib.
“O deyib ki, həmin pulun 19 milyon 600 min manatını Nəcməddin Sadıqova verib, 400 min manatı isə özünə qalıb. Həmçinin sabiq idarə rəisi Nəcməddin Sadıqovun ona 800 min manat pulu Nizami Məmmədova çatdırmaq üçün verdiyini bildirib”, - deyə müdafiəçi bildirib.
Bu ilin 15 iyulunda eyni cinayət işi üzrə keçirilən məhkəmədə bildirilir: "İstintaqa göndərilən dörd illik hesabatda Müdafiə Nazirliyinin Baş Qərargah rəisi olmuş general-polkovnik Nəcməddin Sadıqovun xərcləri də ayrıca göstərilib. Sənədə əsasən, N.Sadıqovun göstərişi ilə, hər birində altı ədəd olmaqla, altı dəst armudu stəkana 21 min manat xərclənib(!).
Hesabatda sabiq Baş Qərargah rəisinə aid daha bir xərc də şərablarla bağlıdır. İddia olunur ki, N.Sadıqov hərəsi 100 manatdan 80 şüşə çaxır aldırıb. Buna da 8 min manat pul xərclənib.
Sözügedən cinayət işində bu cür məqamlar, demək olar ki, bütün proseslərdə müşahidə edilir. Digər tərəfdən, 143 milyonluq mənimsəmədə ittiham edilən bütun vəzifəli şəxslər birbasa Nəcməddin Sadıqova tabe ola şəxslərdir. Nəcməddin Sadıqovun bu işlərdən xəbəri varsa da, yoxsa da, o, vəzifəli şəxs kimi məsuliyyət daşıyır. Amma nədənsə o, şahid qismində belə məhkəmə proseslərinə cəlb edilmir. Səbəb nədir?
Tərlan Eyvazov: "Görünür, ortaya qoyulan sənədlərdə Nəcməddin Sadıqovun imzası yoxdur"
Bizimlə söhbətində hərbi ekspert Tərlan Eyvazov bildirdi ki, birincisi, məhkəmə prosesi hüquqi müstəvidə aparıldığından, hər bir vəzifəli şəxs öz imza atdığı sənədin məsuliyyətini daşıyır. Görünür, ortaya qoyulan sənədlərdə Nəcməddin Sadıqovun imzası yoxdur. Amma imzası olmasa belə, bu cinayəti Nəcməddin Sadıqovun tabeliyində olan vəzifəli şəxslər törədib, ona görə o da məsuliyyət daşıyır. Digər tərəfdən, müttəhim deyirsə ki mən Nəcməddin Sadıqova 20 milyon pul vermisəm, o mütləq məsuliyyətə cəlb edilməlidir.
Məncə, bunun əsas səbəbi Nəcməddin Sadıqovun Rusiyaya bağlı şəxs olmasıdır".
Namizəd Səfərov: "Nəcməddin Sadıqov Moskvanın adamıdır, 30 ildən çoxdur ki, Azərbaycanda fəaliyyət göstərir"
Yaranmış sualla bağlı rəyini öyrəndiyimiz hüquqşünas Namizəd Səfərov bildirdi ki, Nəcməddin Sadıqovun məsuliyyətə cəlb edilməməsinin səbəbini anlamaq üçün heç hüquqşünas olmağa da ehtiyac yoxdur: "Adi vətəndaş da başa düşür ki, cinayət törətmiş şəxsin cinayət məsuliyyətinə cəlb edilməməsinin səbəbi odur ki, cinayətdə əlbir olan və onu himayə edən şəxslər vəzifədədir. Nəcməddin Sadıqov və onu himayə edən şəxslər haqqında sosial şəbəkələrdə yüzlərlə fakt var, video-çəklişlər var. Lakin bunların heç birinə reaksiya verilmir. Nəcməddin Sadıqov Moskvanın adamıdır, 30 ildən çoxdur ki, Azərbaycanda fəaliyyət göstərir. O, beşinci kolonun nümayəndəsidir. Azərbaycanda yalnız bu cür oğrular azad və mustəqildir. Onun göstərişi isə Moskvadan gəlir. Nəcməddin Sadıqov Azərbaycanda Moskvanın əsas canişinlərindən biridir, oturub Bakıda, bu qədər müttəhimin iddiaları ortada olduğu halda ona qarşı heç bir addım atılmır. Nəcməddin Sadıqov Bakı şəhərinin ortasinda, "Salyanski kazarma" adlanan yerdə böyük bir ərazini cinayət yolu ilə ələ keçirib, orada özünə villa tikib. Bunu Azərbaycanda heç kim edə bilməzdi, o elədi və ona "gözün üstə qaşın var" deyən yoxdur. Həm Tərtər hadisələrində, həm də ordumuza qarşi törədilən digər cinayətlərdə təkzibolunmaz faktlarla Nəcməddin Sadıqovun adı hallansa da, ona qarşı heç bir addim atılmır. Hələ 1990-92-ci illərdə ordu ilə bağli onun cinayətləri və xəyanətləri ilə bağlı ortaya təkzibolunmaz faktlar qoyulub. Onun bu əməlləri bu gün də davam edir, 44 günlük müharibədə səlahiyyətli şəxslər təsdiqlədi ki, o, xəyanət edib. Lakin bu gün heć bir dövlət orqanı Nəcməddin Sadıqov haqqında tədbir görmək gücündə deyil, ən azı belə görünür".
Akif NƏSİRLİ
