Mir Cəlalın “Nizami Gəncəvi dünyası” kitabının təqdimat mərasimi olub
Türk Mədəniyyəti və İrsi Fondunun qərargahında qurumun “Ədibin evi” Ədəbiyyata Dəstək Fondunun birgə əməkdaşlığı çərçivəsində nəşr olunan XX əsr Azərbaycan ədəbiyyatının görkəmli nümayəndəsi, yazıçı, elm xadimi, professor Mir Cəlalın “Nizami Gəncəvi dünyası” kitabının təqdimat mərasimi keçirilib. Kitabda Mir Cəlalın dahi Azərbaycan şairi Nizami Gəncəvinin əsərləri haqqındakı elmi məqalələri yer alıb.
Türk Mədəniyyəti və İrsi Fondundan bildirilib ki, tədbir “Ədibin evi” Ədəbiyyata Dəstək Fondunun icraçı direktoru Şəfəq Mehrəliyevanın moderatorluğu ilə gerçəkləşib. Tədbiri giriş sözü ilə açan Türk Mədəniyyəti və İrsi Fondunun prezidenti Aktotı Raimkulova bildirib ki, Türk dünyasının böyük şəxsiyyətlərinin irsini tanıtmaq hər zaman Fondun prioritetləri sırasında olub. O, Mir Cəlalın “Nizami Gəncəvi dünyası” kitabının Fondun “Türk dünyasının görkəmli şəxsiyyətləri” seriyasından ikinci nəşr olduğunu qeyd edib. Aktotı Raimkulova bu kitab seriyasından təşkilatın ilk nəşri “Heydər Əliyev və Məhəmməd Füzuli” kitabı olduğunu diqqətə çatdırıb.
Aktotı Raimkulova qeyd edib ki, dahi Nizami Gəncəvi irsinə məhəbbət görkəmli yazıçı, alim Mir Cəlalın yaradıcılığında hər zaman önəmli yer tutub. Fondun prezidenti sözügedən nəşrin həm Nizami irsinin öyrənilməsinə, həm də Mir Cəlal yaradıcılığına Azərbaycan oxucularının marağını daha da artıracağına əminliyini vurğulayıb.
Tədbirdə çıxış edən ADA Universitetinin rektoru, professor Hafiz Paşayev Türk xalqlarının ədəbi şəxsiyyətlərinin yaradıcılığının tanıdılmasının əhəmiyyətini vurğulayıb. Professor Hafiz Paşayev Türk Mədəniyyəti və İrsi Fonduna fəaliyyətində uğurlar arzulayıb.
Tədbirdə həmçinin, Azərbaycan Respublikası mədəniyyət nazirinin müavini Səadət Yusifova, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynov, ədəbiyyatşünas alim, professor Təhsin Mütəllimov, şair, yazıçı Fərid Hüseyn çıxış edərək Nizami Gəncəvinin mənəvi dünyasının Azərbaycan ədəbiyyatında yaratdığı izlərin Mir Cəlal yaradıcılığında dərindən araşdırıldığını qeyd ediblər. Çıxışçılar belə layihələrin Türk dünyasının ədəbiyyatına, mədəniyyətinə töhfə verdiyini vurğulayıblar.
Mətləb Salahov
