Elzaya qarşı "şeirdə gizli pornoqrafiya" ittihamları - AYB müdaxilə edəcəkmi...
Elza Seyidcahanın Azərbaycan Yazıçılar Birliyinin (AYB) üzvü seçilməsi o zaman ciddi narazılıqla qarşılandı, indi də onun bu Birlikdə olmasına etiraz edənlər çoxdur. E.Seyidcahanın son yayılan şeiri isə sözün həqiqi mənasında aləmi bir-birinə vurub.
“Tüpürüm sizin ağzınıza” adı verdiyi şeir sosial şəbəkələrdə müzakirələrə səbəb olub və müəllif qınağa tuş gəlib.
“Tüpürcəyim baldır mənim, Alın bunu ağzınıza” - deyən E.Seyidcahanın bununla nə demək istədiyini hərə bir yana yozur. Bəziləri deyir ki, bu, “gizli pornoqrafiya” nümunəsidir. Elzanın şeirlərində gizli söyüş və pornoqrafiya elementlərinin olduğunu deyənlər hesab edir ki, AYB E.Seyidcahanla bağlı tədbir görməlidir.
Sosial şəbəkə platformalarında yayımlanan “Tüpürüm sizin ağzınıza” şeiri ilə Elzanın hər kəsi təhqir etdiyini deyənlər də var.
Bu arada məlumat yayılıb ki, AYB sədri Anar Rzayev deyib ki, E.Seyidcahanın şeiri ilə tanış olduqdan sonra qərar verilə bilər: “Şeirlə tanış olduqdan sonra bir söz deyə bilərəm. Əlbəttə, bizim nizamnaməni pozan kəslər AYB-dən uzaqlaşdırılır. Məsələn, klassiklərimizi təhqir edən adam olub ki, biz onu kənarlaşdırmışıq. Elza Seyidcahanın şeirində də təhqir olarsa, tədbir görüləcək”.
Qeyd etdiyimiz kimi, bu gün E.Seyidcahanın AYB-dən çıxarılması aktuallaşıb.
Ramazan Qafarlı: “Yazırsansa bəs bu əxlaqi məsələlərə niyə toxunursan?”
E.Seyidcahanın “şeirinə” tanınmış şəxslər çox ciddi reaksiya veriblər. Onlardan biri də professor Ramazan Qafarlıdır. R.Qafarlı “Bakı-Xəbər”ə şərhində bildirdi ki, E.Seyidcahanın yazdıqları şeirdən çox uzaqdır. “Bunu biabırçılıq hesab edirəm. Gərək onu Yazıçılar Birliyinə qəbul etməyəydilər. Onun yazdıqları şeir deyil axı. Biabırçılıqdır. Onun "şeirlərini" hamı eşidir. Yeniyetmələr də, yaşlı nəsil də, ana-bacılarımız da qulaq asmağa məcbur olur. Çünki bu, televiziyalardan səsləndirilir. Ağlına gələni yazır. Ona görə də, əsəbiləşirəm”-deyə R.Qafarlı bildirdi.
Qeyd edək ki. R.Qafarlı E.Seyidcahanın sonuncu şeirində “gizli pornoqrafiya” olduğunu deyir. “Elə onu gördüm əsəbiləşdim. O elə yazır ki, biabırçılıqdır. Mən onu qəbul etmirəm. Buna görə onun yazdığını ləğv etmək lazımdır. Yazırsa özü üçün yazsın, onun yazdıqlarını ictimailəşdirmək olmaz. Ona şeir demək olmaz. Ayıbdır elə şeylər. Sosial şəbəkələrdə bu müzakirə olunur. O yazır, bəs bunu televiziyalar niyə çıxarır? Şou üçün, baxış yığmaqdan ötrü bunu efirə çıxarırlar. Gətirib orda onu təlxək kimi oynadırlar. O təlxəklik edir. Bu nə poeziyadır, nə ədəbiyyatdır. O yaxşı musiqiçidir, yaxşı bəstəkardı. Get bəstəkarlıqla məşğul ol, sən şeir niyə yazırsan? Yazırsansa bəs bu əxlaqi məsələlərə niyə toxunursan? Cəfəngiyat yazırsan, bunu niyə ictimailəşdirirsən? Bir neçə ay əvvəl bir söz yazmışdı, o da ictimailəşdi. Yəni elə ifadələr tapır ki, bunlar hamısı axırda gedib pornoqrafiyaya çıxır. Belə etmək, bu cür düşünmək olmaz axı”.
Bir alim, bir ziyalı kimi E.Seyidcahanın yazdıqlarına etiraz etdiyini deyən müsahibimiz hesab edir ki, onun yazdıqlarının şeirlə, ədəbiyyatla heç bir əlaqəsi yoxdur: “Onun yazdıqlarının sətiraltı mənaları aydındır. Elə şeir olmaz. Bu şeir deyil”-deyə R.Qafarlı bildirdi.
Tural Turan: “...Azərbaycan ədəbiyyatına, sözünə, şeirinə növbəti xəyanətin yeni mərhələsidir”
Gənc şair Tural Turan da hesab edir ki, E.Seyidcahanın yazdılqları şeir deyil. “Elzanın şeirlə, şeirin də Elza ilə heç bir əlaqəsi yoxdur. Günah onu AYB üzvülüyünə qəbul edənlərdədir. Görünür, “tüpürcəyim bal dadır” deyən Elzanın sözü kimlərəsə xoş gəlir. Onun AYB-dən çıxarılıb-çıxarılmaması məsələsinə gəlincə, bu, AYB-nun işidir. “Mən bir söz deyə bilmərəm. Onu çıxarmaq, yaxud saxlamaq AYB rəhbərliyinin işidir. Elə Elza kimilərinə görə mən AYB-dən çıxmışam. Belə düşünürəm ki, Elzanın dedikləri onlara xoş gəlir.
Elza Seyidcahan kimilərinin AYB-yə üzv qəbul olunması, onun vəsiqəsini daşıması Azərbaycan ədəbiyyatına, sözünə, şeirinə növbəti xəyanətin yeni mərhələsidir. Onun AYB-yə üzv qəbul edilməsi gənclərdə böyük narazılıq yaradıb. Çünki onun poeziyaya dəxli yoxdur, pornoqrafiyanın və sairin də ümumiyyətlə ədəbiyyata aidiyyəti yoxdur”.
T.Turan bildirdi ki, E.Seyidcahanın yazdıqlarında poeztik, qrammatik pozğunluqlar var, bu, Azərbaycan dilində düzgün cümlələr deyil. “Özünü Sabirə bənzədir, amma indi Mirzə Ələkbər Sabirin sümükləri məzarda tərpənir. Elzanın AYB üzvlüyünə qəbul edilməsi və hələ də orada üzv olaraq qalması sözə, şeirə xəyanətin növbəti mərhələsidir”-deyə T.Turan bildirdi.
Əli TURABOV
