Bizə çox hüquqşünas lazımdır, ya aqronom?..
“Ölkəmizdə hüquqşünas sayı ehtiyacdan çoxdur. Amma aqronom sayımız ehtiyaclarımızdan daha azdır”. Bunu əmək və əhalinin sosial müdafiəsi naziri Sahil Babayev Təhsilin İnkişafı Fondunun təşkilatçılığı ilə ümummilli lider Heydər Əliyevin 100 illik yubileyinə həsr olunan Təhsilin İnkişafı Forumunun “İnnovasiya ekosisteminin yaradılması” panelində çıxışı zamanı deyib.
Onun sözlərinə görə, müəssisələrdə texniklər, orta ixtisas təhsillilər çox azdır: “Sizə bir misal çəkim. Bu yaxında kənd təsərrüfatı naziri Məcnun Məmmədov ilə bir müzakirə apardıq. Orada bildirildi ki, ölkədə günə 25 manatdan aşağı ağac budayan şəxs tapmaq olmur. Hesablayanda 25 gün ərzində onlar kənd yerlərində 700-800 manat əməkhaqqı qazana bilirlər. Hələ ağacbudama sezonunda onların göstərdiyi xidmət 50 manata qalxır. Amma bu gün bizim ixtisaslı işçilərimiz onu qazanmırlar”.
Maraqlıdır, bu ölkədə hüquqşünasa çox ehtiyyac var, ya aqronoma?
İlqar Hüseynli: “Ölkəyə aqronom da lazımdır, hüquqşünas da…”
Sosial sahə üzrə ekspert İlqar Hüseynli “Bakı-Xəbər”ə açıqlamasında qeyd etdi ki, ölkəyə aqronom da lazımdır, hüquqşünas da: “Hazırki şəraitdə aqronom ölkəyə çox lazımdır. Nəzərə almaq lazımdır ki, ərzaq təhlükəsizliyinin təmin olunması üçün bu sahə inkişaf etdirilməlidir. Aqrar sektorun inkişafı üçün aqronoma ciddi ehtiyac var. Bununla yanaşı, kifayət qədər hüquqşunasa da ehtiyac var. Onu da deyim ki, Azərbaycan Avropa məkanında adambaşına düşən vəkil sayına görə ən aşağı pillədədir. Vəkillərin sayının artırılmasına ehtiyac var. Hüquq sistemində yeni düşüncəli, antikorrupsiya təfəkkürlü gənclərin olması vacibdir. Normal demokratik cəmiyyətin idarə olunması üçün hüquq sahəsində təhsil alan gənclər lazımdır. Eyni zamanda, ölkədə peşəkar həkim qıtlığı yaşanır. Bu çox ağrılı bir məsələdir. Bütövlükdə ölkədə ixtisaslı kadrlara geniş ehtiyac var. O cümlədən, aqronom və hüquqşünasa”.
Rüfət Quliyev: “Əkinçilik, çayçılıq, düyüçülük inkişaf edir, amma mütəxəssis yoxdur”
Millət vəkili Rüfət Quliyev bildirdi ki, region gəncləri arasında işsizliyin səviyyəsi yüksəkdir və bunun səbəblərindən biri bazar iqtisadiyyatıdır. Çünki qiymət və əmək haqqı tələb-təklif və rəqabət əsasında formalaşır: “Regionlarda daha çox torpaqşünas, aqronom, baytar, mexanik, zavod mühəndislərinə ehtiyac var. Bölgələrdə fəaliyyət göstərən zavodlarda 55-60 yaşlarından aşağı mühəndislərə rast gəlinmir. Bundan başqa, paytaxtdan fərqli olaraq regionlarda İT, maliyyə ixtisaslarına yiyələnmiş kadrlar da demək olar ki, yoxdur. Ali təhsilin rol oynamadığı bir çox peşə növləri var, lakin gənclər həmin istiqamətlərə yönəlməkdə maraqlı deyillər.
Kimdən soruşursan, ali məktəb bitirib. Əksəriyyəti də eyni ixtisaslar – hüquq, beynəlxalq münasibətlər, iqtisadiyyat. Bölgələrdə bu ixtisaslar üzrə elə də çox mütəxəssisə ehtiyac yoxdur. Əsas sadaladığım sahələrdə kadr azlığı yaşanır, bu peşələrə yönəlsinlər. Əkinçilik, çayçılıq, düyüçülük inkişaf edir, amma mütəxəssis yoxdur”.
Mehman Muradlı: “Ölkədə vəkil çatışmazlığı yaşanır”
Vəkil Mehman Muradlı “Bakı-Xəbər”ə şərhində qeyd etdi ki, bu gün ölkədə hüquqşunas, vəkil çatışmazlığı yaşanır. 2500 vəkil var. 10 milyonluq əhali üçün bu qədər olduqca azdır: “Onu da deyim ki, hüquqşunaslıq ixtisasını tədris edən ali təhsil ocaqlarının da sayı çox deyil. Azərbaycana hüquqşünas da lazımdır, aqronom da, fəhlə də… Onu da deyim ki, bu fikri səsləndirən nazirin özü də ixtisasca hüquqşünasdır.
Aqronom sabah işə götürüləndə və ya çıxarılanda onun hüququ necə qorunmalıdır? Iş elanlarına nəzər yetirilsə aydın olar ki, dövlət orqanlarında bu sahəyə böyük ehtiyac var. Bu gün məhkəmələrdə iclas katibi, məsləhətçi çatışmazlığı yaşanır. Bu kimi problemlər olduğu halda hüquqşünasa ehtiyac yoxdur demək düzgün deyil”.
Günel CƏLİLOVA
