OCCRP Azərbaycanı hədəfə alır, ancaq ABŞ varlılarının ofşor zonalarda əməllərini “görmür”...
Şakir Ağayev: “OCCRP-ni əsas maliyyələşdirən ölkələrdən biri ABŞ-dır”
Mütəşəkkil Cinayətkarlıq və Korrupsiya hesabatı layihəsi - OCCPR ermənipərəst mövqedən çıxış edir və Azərbaycana qarşı şər-böhtan kampaniyası aparır, guya söz azadlığını və şəffaflığı təbliğ edir.
Doğrudan da qarşısına bunu məqsəd kimi qoyubsa, onda bu qurum nə yaxşı Amerika milyarderlərinin offşor zonalarda çirkin və qanunsuz fəaliyyətlərini araşdırmır?
Ekspertlər hesab edir ki, bu təşkilat ABŞ və bir sıra Avropa ölkələrinin hökumətləri tərəfindən maliyyələşdirilir və bu halda həmin ölkələr, xüsusən də ABŞ ondan rəqiblərinə, yaxud da sevmədiyi ölkələrə qarşı silah kimi istifadə edir.
Yeri gəlmişkən, yerli mətbuatda təqdim edilən bir araşdırmaya görə, 2014-2023-cü illərdə ABŞ federal hökuməti OCCRP-nin xərclədiyi vəsaitin 52 %-ni təmin edib. O cümlədən OCCRP-nin yaradıldığı 2008-ci ildən indiyədək ABŞ hökuməti müstəqil qeyri-kommersiya redaksiyasına azı 47 milyon dollar ayırıb və əlavə 12 milyon dollar ayırmağı öhdəsinə götürüb. Eyni zamanda, digər Qərb hökumətləri - Böyük Britaniya, Fransa, İsveç, Danimarka və Niderland son 10 ildə azı 15 milyon dollar məbləğində vəsait ödəyiblər. OCCRP-nin Direktorlar Şurası bu araşdırmanı birgə dərc edən nəşrlər üçün verdiyi açıqlamada ABŞ-nin onların əsas sponsoru olduğunu təsdiqləyib. Bu fikirlər mediada yer alıb.
“Bu ölkənin milyarderlərinin çirkin əməllərini, korrupsiya və maliyyə fırıldaqlarını görsə belə, bu barədə hesabat yaya bilməz”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində “Mütəşəkkil Cinayətkarlıq və Korrupsiya hesabatı layihəsinin Azərbaycanı hədəfə alması hansı institutların, təşkilatların, dövlətlərin sifarişi olduğu məlumdur. Bu qurumu maliyyələşdirən, ona sponsorluq edənlər ABŞ və Avropa dövlətləridir. OCCRP-i əsas maliyyələşdirən ölkələrdən biri ABŞ-dır və bu səbəbdən də o, ABŞ milyarderlərinin ofşor şirkətlərini, onların çirkin və qanunsuz əməllərini görməzdən gəlir”.
Ş.Ağayev qeyd etdi ki, bu təşkilatın bunları görməzliyə vurması və onların əvəzinə Azərbaycanı hədəfə alması ilk hal deyil, bu davam edən bir prosesdir. “OCCRP ABŞ-ın birbaşa vasitəçiliyi və iştirakı ilə yaradılan bir təşkilatdır, bu ölkənin milyarderlərinin çirkin əməllərini, korrupsiya və maliyyə fırıldaqlarını görsə belə, bu barədə hesabat yaya bilməz.
Uzağa getməyək, bir neçə gün əvvəl ABŞ prezidenti Co Bayden vergidən yayınma, qanunsuz silah saxlama, Ukraynadakı korrupsiya əməllərinə və sair ittihamlarla həbs edilən oğlunun cinayətlərini bağışlayıb onu əfv etdi. Bu faktla ABŞ-ın məhkəmə sisteminin, ali qanununun hansı formada karikaturaya döndərildiyini Bayden sübut etdi”.
Ş.Ağayev qeyd etdi ki, ABŞ-da bu cür qanunazidd hallar açıq şəkildə baş verirsə, eyni zamanda da bu ölkə dünyaya korrupsiya ilə mübarizə və demokratiya barədə “dərslər” keçirsə, bu dərsləri birinci özlərindən başlamalı idilər. “Başda ABŞ və Qərb ölkələri olmaqla demokratiya, insan hüquqları, korrupsiya ilə mübarizə kimi məsələlərdən istifadə edib ayrı-ayrı ölkələrdə öz maraqlarını təmin etmək istəyirlər. Sözsüz, OCCRP-ni özlərini tənqid etməsi, çirkin əməllərini ifşa etməsi üçün yaratmayıblar, yaradıblar ki, müstəqil siyasət yürüdən, bunların əmrlərini yerinə yetirməyən dövlətlərə qarşı istifadə etsinlər. Bunun başqa adı yoxdur, ancaq bu məqsədi güdürlər” - deyə Ş.Ağayev vurğuladı.
İradə SARIYEVA
