Ankarada terror hücumu - 3 şəhid, 14 yaralı var... - FOTO/VİDEO/YENİLƏNDİ
Türk Aviasiya və Kosmik Sənaye Şirkətində (TUSAŞ) terror aktı baş verib. Əvvəlcə müəssisəyə kamikadze hücumu, sonra isə giriş qapısında atışma olub. Türkiyənin daxili işlər naziri Ali Yerlikaya bildirib ki, TUSAŞ-ın Ankara Kahramankazan obyektlərinə qarşı terror hücumu həyata keçirilib.
"Hücum nəticəsində, təəssüf ki, şəhidlərimiz və yaralılarımız var," - nazir qeyd edib.
Hücumun növbə dəyişmə vaxtı saat 15.30-da baş verdiyi bildirilir. Bu detal terrorçuların hücumu əvvəlcədən planlaşdırdığını və kəşfiyyat apardığını göstərir.
Hücumu 3 terrorçunun həyata keçirdiyi və onlardan 2-nin zərərsizləşdirildiyi bildirilib. Qalan 1 terrorçunun binaya sızdığı iddia edilir. Terrorçuların TUSAŞ-ın giriş qapısına taksi ilə gəldiyi və qarşıdurmadan sonra taksinin partladıldığı iddia edilir. Hazırda bölgədə təhlükəsizlik qüvvələri ilə qalan bir terrorçu arasında atışma davam edir.
Hadisənin təhlükəsizlik kamerası görüntüləri də ortaya çıxıb. Görüntülərdə terrorçuların maşından düşərək ətrafa atəş açdığı görünür.
Daxili işlər naziri Ali Yerlikaya TUSAŞ-da törədilən terror aktında 3 şəhidin, 14 yaralının olduğunu açıqlayıb. Nazir terrorçulardan 2-nin öldürüldüyünü deyib.
TUSAŞ-ın Kahramankazan şəhərciyində törədilən terror aktı ilə bağlı Ankara Respublika Prokurorluğunda araşdırma başlayıb.
TAHİR