Putin COP-a "gəlməmək" qərarını veribsə də belə, dəyişə bilər və dəyişməlidir… "Uşaq məntiqi" və "erməni sxemi"…
COP29-un başlanmasına 20 günə yaxın vaxt qalır və tədbirə qatılacaq dünya rəsmilərinin sayının artdığı bu ərəfədə Rusiya prezidenti Putinin Bakıya gəlməyəcəyi barədə anonim xəbər gündəmin ən həssas məsələsinə çevrildi. Məlumatı BBC radiosu guya "Azərbaycan hökumətindəki mənbəyə istinadla" yayıb və maraqlıdır ki, Azərbaycana dost olmayan çevrələr bu xəbərə daha həvəslə müraciət edirlər.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Hələlik Rusiya rəsmiləri xəbərlə bağlı konkret rəy bildirməyiblər. Ehtimallara görə, Kreml hakimiyyəti son anadək bununla bağlı konkret fikir bildirməyəcək. Fikrimcə ən doğru taktika da elə məhz bu olardı...
Putinin COP-a münasibəti məsələsində diqqət çəkən daha bir mövzu bəzi dairələrin bunu Ukraynanın Qərb liderlərinə müraciəti ilə əlaqələndirməyə cəhd etməsidir. Məlumatlara görə, bu həftə Zelenski Qərb liderlərini Putinin Bakıya gələcəyi təqdirdə Bakıya getməkdən imtina etməyə çağırıb. Nə qədər doğru olub-olmadığını söyləmək çətindir. Zelenskinin Putinə şəxsi və dövlətlərarası kontekstdə münasibəti bəllidir. Qatı düşməndirlər. Qərb liderlərinin Zelenskinin müraciətinə necə reaksiya verəcəklərini bir kənara qoyaq. Ancaq necə ola bilər ki, Zelenski bu müraciətlə özünün Putinə düşmənçiliyi ilə yanaşı həm də Azərbaycana düşmənçilik etdiyini anlamasın?! Axı Azərbaycan Zelenskiyə və Ukraynaya heç bir düşmənçilik etmir?! Əksinə, hətta "ip üstündə yerimək" şəraitində Ukraynaya mümkün humanitar dəstəyini verir və onun ərazi bütövlüyünü dəstəkləyir. Belə də Zelenski Azərbaycana niyə düşmənçilik etsin ki?!...
Digər tərəfdən, həqiqətən belə müraciət edilibsə, Qərb liderlərinin qlobal əhəmiyyətli bir tədbirə Zelenskinin prizmasından baxacaqları onlar üçün çox böyük məsuliyyətsizlik olardı. Fikrimcə, Qərb liderləri COP-da iştirak məsələsində Zelenskinin şərtinə uymaq kimi aşağı səviyyəyə düşməyi özlərinə yaraşdırmazlar, yaraşdırmamalıdırlar... Hər halda onlar yaxşı anlayırlar ki, Azərbaycan tək özünə yox, bütün dünyaya lazım olan bir yükü üzərinə götürüb. Əgər Qərb liderləri qlobal məsələyə sadəcə "Zelenskiyə xoş gəlmək, Putinlə məişət səviyyəli intriqa aparmaq" prinsipindən baxsalar, tarixin ən ağır ittihamına hədəf olacaqlar və Azərbaycan da bunu onlara heç vaxt bağışlamaz.
Gələk Putinə... Onun bu gün COP-la bağlı həqiqətdə hansı düşüncədə olduğunu söyləmək olmaz. Ancaq Putin kimi "nəhəng siyasət arenasının fiquru" necə düşünə bilər ki," Mən Bakıya getsəm, Qərb liderləri Bakıya getməyəcək, mən getməyim ki, onlar da getməmək qərarından vaz keçsinlər"... Bu lap uşaq məntiqi oldu ki... Bəli, uşaq məntiqi... Ancaq nə yaxşı ki, Putin özü yox, onun Bakı ilə münasibətlərinə hər "tində bir daş atmağa" adət etmiş erməni siyasilər belə düşünür. Onların "məntiqi" sxemləri və hədəfləri bəllidir - "Putinlə İlham Əliyev dostdur. Qərb liderləri Bakıya gəlməsələr, COP-un mötəbərliyi aşağı düşəcək. Qərb liderlərinin Bakıya gəlməsi üçün Putin dostu İlham Əliyevin uğurunun xatirinə özünü "qurban verəcək" və Bakıya getməyəcək"...
Erməni sxemlərinin layihə müəllifləri Putinin Bakıdan imtinasının ardınca yeni kampaniya başladacaqlar - "Əliyevlə Putinin münasibətləri formal imiş və elə bu səbəbdən Putin dostunun ən tarixi və ən məsul anlarında onu tək buraxdı"...
Bütün bunlardan sonra Putindən və Qərb liderlərindən situativ, emosional yox, strateji müdrik yanaşma gözlənilir. Putinin də, Qərb liderlərinin də COP29-da iştirakının alternativi yoxdur. Elə həmin Qərbin özünün qlobal düşmənçiliyin ən böyük səbəbi olan Ukraynaya görə, 2-ci Dünya Sülh konfransında Putinin iştirakına nail olmaq üçün hansı çabaları göstərdiyi məgər unudulub? Elə həmin Putinin özü Ukrayna üzrə İsveçrədə 1-ci Qlobal sülh konfransına dəvət olunmaq üçün az çabalar göstərmişdi?! Necə olur ki, Putin və Qərb liderləri İsveçrədə bir müzakirə içində olmağı özlərinə rəva görür, lakin Bakıda COP29-a birgə qatılmaqdan imtina edirlər?!
Qərb liderləri COP29-da iştirak məsələsinə "Zelenski - Putin faktoru" ilə baxsalar, tarix qarşısında ən ağır məsuliyyətin subyektlərinə çevriləcəklər. Eynilə də Putin... Rusiya rəhbəri COP29-da iştirak məsələsinə "Mən getsəm, birdən Qərb liderləri gəlməz" kimi qeyri-ciddi prinsiplə baxsa, onun özü də heç də qərblilərdən az olmayan ağır tarixi məsuliyyətin altına düşmüş olacaq...
Bu ana kimi Putin Bakı ilə bağlı qərar veribsə də belə, COP-a saatlar qalmış qərarını dəyişə bilər və dəyişməlidir...
Tahir TAĞIYEV
