MDB-nin təhlükəsizlik strukturunda Azərbaycanın Ermənistanla birgə işi mümkünsüz hala gəldi - Almaniya faktı...
Təbriz Musayev: “Ermənilərdən istənilən xəyanəti, satqınlığı gözləmək olar”
Ermənistanın Təhlükəsizlik Şurasının katibi Armen Qriqoryan Almaniyanın Federal Kəşfiyyat İdarəsinin rəhbəri Bruno Kal ilə Berlin şəhərində işgüzar nahar edib.
Bu barədə məlumatı Ermənistan mətbuatı yazıb.
Bildirilib ki, görüş zamanı tərəflər regional və beynəlxalq təhlükəsizlik məsələlərini, eləcə də ikitərəfli maraq doğuran digər mövzuları müzakirə ediblər.
Məlumat üçün qeyd edək ki, oktyabrın əvvəllərində Federal Təhlükəsizlik Xidmətinin direktoru Aleksandr Bortnikov MDB-yə üzv dövlətlərin təhlükəsizlik və xüsusi xidmət orqanları rəhbərləri Şurasının 55-ci iclasında çıxışı zamanı Avropa İttifaqının bölgədə qarşıdurma yaratmaq istədiyini bəyan etdi. Bortnikovun sözlərinə görə, Qərb İrəvanı Bakı ilə danışıqları ləngitməyə inandırmaqla Azərbaycan-Ermənistan nizamlanması prosesinə başçılıq etməyə və de-yure BMT-nin, de-fakto NATO-nun himayəsi altında regionda özünün “sülhməramlı” kontingentinin yerləşdirilməsinə nail olmağa çalışır: “NATO-nun dünyanın müxtəlif regionlarında əvvəlki vasitəçilik təcrübəsini nəzərə alaraq, blokun Cənubi Qafqazda möhkəmlənməsi, təbii ki, regionda sabitliyə kömək etməyəcək”.
O da məlumdur ki, Almaniya NATO-da, Ermənistan isə KTMT-də təmsil olunur. Bu bloklar da bir-birinə qarşı düşmən mövqedədir. Astanada MDB xüsusi xidmət orqanları rəhbərlərinin görüşündə Azərbaycan da iştirak edib. Belə olan halda zəmanət varmı ki, o görüşdə müzakirə edilən məxfi xarakterli informasiyaları Ermənistan Almaniya ilə bölüşməyəcək? Ona görə də bununla bağlı qəti şərt qoyulmalıdır. Ya Azərbaycanın xüsusi xidmət orqanlarının təmsil olunduğu çoxtərəfli formatlardan Ermənistan çıxarılmalıdır, ya da Azərbaycan o tədbirlərdə iştirak etməməlidir. Azərbaycan xüsusi xidmət orqanları hansısa təhlükəli məqamlarla bağlı öz analizlərini bölüşürsə, Ermənistanın bunu digər tərəfə ötürməsi ehtimalı böyükdür. Ona görə də, ən azından, MDB ölkələrinin xüsusi xidmət orqanlarının görüşündə Ermənistanın iştirakına müəyyən qədər məhdudiyyət qoyulsun. O vaxta qədər ki, Ermənistan yolunu aydın müəyyənləşdirsin və hansı düşərgədə olduğu bəlli olsun.
“MDB dövlətləri kəşfiyyat məlumatlarını alıb Ermənistanla bölüşməməlidir”
Sözügedən məsələyə aydınlıq gətirən İrəvan Azadlıq Təşkilatının sədri Təbriz Musayev “Bakı-Xəbər”ə açıqlamasında qeyd etdi ki, sözügedən məsələnin gündəmə gətirilməsi vacibdir: “Çünki ermənilərdən istənilən xəyanəti, satqınlığı gözləmək olar. Nəzərə alsaq ki, Ermənistan siyasi oriyentasiyasını dəyişərək Qərbə satılmaq yolunu tutub, o baxımdan belə bir ehtimal böyükdür. Bəli, bu kimi görüşlərdən istifadə edərək məxfi məlumatları Almaniyaya və digər Qərb ölkələrinə ötürmələri ehtimalı böyükdür. Xüsusən də Ermənistanın məxfi xarakterli məlumatları Fransa ilə bölüşmə ehtimalı çox böyükdür. Çünki hamımıza məlumdur ki, Ermənistan Fransa ilə necə yaxın əlaqələrə malikdir. Ermənistanda ABŞ-ın ən böyük səfirlik binası var. Kimsə soruşmur ki, əhalisi heç 3 milyon nəfər olmayan, açıq dənizə çıxışı olmayan Ermənistana niyə bu qədər önəm verilir. Bəlli məsələdir ki, ABŞ-ın Ermənistandakı səfirliyində diplomat qılığına girənlərin çoxu kəşfiyyatçılardır. Onlar həm regionla bağlı kəşfiyyat məlumatları toplayır, həm də ABŞ-ın regiona daxil olması üçün zəmin formalaşdırmağa çalışırlar. O baxımdan belə bir ölkəyə əsla etibar etmək olmaz. MDB dövlətləri bütün bunları nəzərə alıb kəşfiyyat məlumatlarını Ermənistanla bölüşməməlidilər. Bu, çox ciddi fəsadlara yol aça bilər”.
Vidadi ORDAHALLI
