Azərbaycan Ordusunda tam yeni struktur yaradılır - dünyada görünməyib....
Emin Həsənli: “Silahlı Qüvvələrimizdə İntellektual qabiliyyətli bölmələrin yaradılması və kadr hazırlığı bugünümüz üçün prioritetdir”
Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə ordu quruculuğu sahəsində aparılan islahatlar çərçivəsində Azərbaycan Ordusunda İntellektual qabiliyyətli bölmələr yaradılıb. Bu barədə Müdafiə Nazirliyi məlumat yayıb.
Bildirilib ki, təhsildə fərqlənən istedadlı gənclərin bilik və bacarıqlarından daha səmərəli faydalanmaq, eyni zamanda onların karyera inkişafına töhfə vermək məqsədilə Müdafiə Nazirliyində hərbi xidmətkeçmə ilə bağlı yeni konsepsiya tətbiq edilir. Yeni təlim-təcrübə konsepsiyasına əsasən, hərbi xidmətdə olan yüksək intellektə malik istedadlı çağırışçılar gənc əsgərlərin hazırlığı proqramını başa çatdırdıqdan sonra öz ixtisaslarına uyğun müxtəlif layihələrə və fəaliyyətlərə cəlb olunmaları məqsədilə hərbi xidmətlərini Milli Müdafiə Universitetinin tərkibində yaradılmış bölmələrdə xüsusi şəraitdə davam etdirəcəklər.
“Ordumuzda mənəvi-psixoloji durum, vətənpərvərlik nə qədər yüksəkdirsə, yeni intellektual idarəetmə bacarıqları olan bölmələrin olması da bir o qədər vacibdir”
Azərbaycan ordusunda İntellektual qabiliyyətli bölmələr yaradılmasının əhəmiyyəti haqqında fikir bildirən “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli “Bakı-Xəbər”ə açıqlamasında qeyd etdi ki, Azərbaycan Ordusunun inkişafı həm şaquli, həm üfüqi islahatlar, yeniliklərin olmasını şərtləndirir. Buna görə də struktur dəyişiklikləri və ordunun döyüş qabliyyətinin artırılması paralel aparılır: “44 günlük Vətən müharibəsinə qədər görülən işlər öz bəhrəsini verdi və biz hamımız müzəffər ordumuzla fəxr edirik. Amma 2020-ci ildən artıq 4 il keçir və bu dörd ildə də bir çox yeniliklər baş verib. Silahlı Qüvvələrdə struktur islahatları, Ordunun döyüş qabiliyyətinin artırılmasına yönələn bu addımlar barədə hamımız bilirik. İndi elə bir zaman gəlib ki, süni intellekt və robot texnologiyaları orduların döyüş qabiliyyətinin artırılmasında mühüm bir halqaya çevrilib”.
Ekspert hesab edir ki, Azərbaycan dövlətinin də bu yenilikləri Silahlı Qüvvələrdə tətbiq etməsi çox təbii haldır: “Bu gün dünya hərb tarixində öz izini qoyan bir ordunun yeni texnologiyalardan kənarda qalması mümkün deyil. Bu baxımdan Azərbaycan Ordusunda İntellektual qabiliyyətli bölmələrin yaradılması alqışlanmalıdır. Aydın məsələdir ki, yeni texnologiyaların tətbiqi yeni bilik və bacarıqlara malik kadrların olmasını tələb edir. Bu baxımdan Silahlı Qüvvələrimizdə İntellektual qabiliyyətli bölmələrin yaradılması və kadr hazırlığı bugünümüz üçün prioritetdir. Unutmaq olmaz ki, ordumuzda mənəvi-psixoloji durum, vətənpərvərlik nə qədər yüksəkdirsə, yeni intellektual idarəetmə bacarıqları olan bölmələrin olması da bir o qədər vacibdir. Bunun üçün Azərbaycanın bütün resursları var”.
Günel CƏLİLOVA
