İdman, gənclərin fiziki inkişafı və dövlət siyasəti - Prezident nələrə yekun vurdu...

Cəmiyyətin gələcəyi gənclərdən asılıdır. Məhz gənc nəslin düzgün tərbiyəsinin nəyə görə hər zaman aktual olduğu bu baxımdan başadüşüləndir. Nəyə görə uşaq və gənclərin fiziki, həmçinin mənəvi inkişafının daim diqqət mərkəzində olması da anlaşılandır. 

Anlaşılan odur ki, fiziki və mənəvi cəhətdən inkişaf etmiş, savadlı, layiqli vətəndaş cəmiyyət üçün olduqca lazımlıdır, vacibdir və bu da gələcəyimizin etibarlı əllərdə olduğundan xəbər verir. Uşaq və gənclərin fiziki, həmçinin mənəvi tərbiyəsinə, inkişafına dövlətimiz tərəfindən xüsusi diqqət və qayğının göstərilməsi də bu baxımdan heç də səbəbsiz və təsadüfi deyil.

Ölkəmiz idmanın inkişaf səviyyəsinə görə aparıcı ölkələrdən biri kimi tanınır

Dövlətimizin uşaq və gənclərin fiziki və mənəvi cəhətdən sağlam tərbiyə olunmasına göstərdiyi diqqət və qayğını cəmiyyətimiz hər zaman hiss edir. Xüsusən də bir-birinin ardınca yeni-yeni məktəblərin, idman komplekslərinin tikilməsi, eləcə də əsaslı təmirinə xüsusi yer ayrılması dövlət qayğısının bariz nümunəsidir. Təkcə paytaxtda ərazisində deyil, respublikamızın bütün şəhər və rayonlarında, həmçinin ucqar kəndlərdə belə məktəb binalarının yenidən inşa edilməsi, bir çox təhsil ocaqlarının yenidən əsaslı təmir edilməsi, ən müasir avadanlıqlarla təchiz olunması artıq ənənə halını alması da təsadüfi sayıla bilməz. Azərbaycan hazırda idmanın inkişaf səviyyəsinə görə dünyada aparıcı ölkələrdən biri kimi tanınır. 1997-ci ildə İlham Əliyevin Milli Olimpiya Komitəsinin prezidenti seçilməsindən sonra ölkəmizdə Olimpiya hərəkatı, bədən tərbiyəsi və idmanın inkişafı yeni mərhələyə qədəm qoydu. Azərbaycanın beynəlxalq Olimpiya hərəkatına fəal qoşulması sayəsində ölkəmiz böyük idman potensialına malik olduğunu nümayiş etdirdi. MOK-un prezidenti İlham Əliyev ölkədə olimpiya hərəkatının genişlənməsi, idmanın və bədən tərbiyəsinin tərəqqisi, daha geniş coğrafi məkanda təbliği, habelə Azərbaycanın dünya idman ailəsinin bərabərhüquqlu üzvünə çevrilməsi üçün ciddi tədbirlər həyata keçirdi. İdmana dövlət qayğısı ilə yanaşı, onun maddi-texniki bazasının möhkəmləndirilməsi yolunda da işlər görüldü. Bu sahəyə göstərilən diqqət və qayğı Azərbaycanın milli genefondunun qorunması, habelə gənclərin vətənpərvər və sağlam ruhda tərbiyə edilməsi məqsədindən irəli gəlirdi. 

2024-cü ildə Azərbaycan idmançıları beynəlxalq yarışlarda 1700-ə yaxın medal qazanıb

İlin idman yekunlarına həsr olunan mərasimdə çıxış edən Azərbaycan Prezidenti, Milli Olimpiya Komitəsinin prezidenti İlham Əliyev idmançıları ötən il qazandıqları uğurlar münasibətilə təbrik edərək bir sıra məqamlara toxunub: “2024-cü il də Azərbaycan idmanı üçün uğurlu olmuşdur. Azərbaycan idmançıları beynəlxalq yarışlarda ölkəmizi ləyaqətlə təmsil etmişlər, 1700-ə yaxın medal qazanılmışdır. Bu, onu göstərir ki, idmanımız inkişaf edir, yeni nəsil idmançılar yetişir və beləliklə, Azərbaycan idman dövləti kimi öz gücünü müxtəlif beynəlxalq yarışlarda təsdiqləyir. Gənc nəslin vətənpərvərlik ruhunda tərbiyə edilməsində idman nə qədər vacibdirsə, bir o qədər də hərbi hazırlıq və fiziki hazırlıq vacibdir. Fiziki güc mənəvi saflığa da yol açır və şadam ki, bizim idmançılarımızın mütləq əksəriyyəti idmanda da, məişətdə də, cəmiyyətdə də nümunədirlər, örnəkdirlər. Onların davranışı, cəmiyyətdəki fəaliyyəti məni və əminəm ki, bütün xalqımızı sevindirir. Azərbaycan gənci məhz belə olmalıdır - vətənpərvər, fiziki cəhətdən güclü, mənəvi cəhətdən saf, öz xalqına, dövlətinə bağlı, heç bir kənar təsirə boyun əyməyən və ləyaqətli Azərbaycan gənci”. 

Prezident qeyd edib ki, bizim bundan sonrakı fəaliyyətimiz idmanın inkişafı ilə bağlı olacaq: “Çünki bütün lazımi qərarlar verilib, bütün müvafiq strukturlar, federasiyalar, klublar, idman cəmiyyətləri, Olimpiya Komitəsi, nazirlik vahid strategiya əsasında fəaliyyət göstərirlər. Uzun illər bütün bölgələrdə idmanla məşğul olmaq üçün dövlət öz fəaliyyətini aparıb. Hazırda bizim bölgələrimizdə 44 Olimpiya İdman Kompleksi fəaliyyət göstərir və bu idman komplekslərinin bundan sonra da inşası nəzərdə tutulur, müxtəlif bölgələrdə, o cümlədən Qarabağ bölgəsində. Bakı şəhərində ən müasir idman infrastrukturumuz vardır”.

Bütün bu deyilənlərin fonunda, idmançı gənclərin beynəlxalq uğurlarında dövlət siyasətinin rolu nədən ibarətdir? 

Dövlətin idmana göstərdiyi qayğı əldə olunan uğurlarda müstəsna rol oynayıb

Sözügedən məsələni “Bakı-Xəbər”ə şərh edən idman sahəsi üzrə ekspert Cavid Səlimovun fikrincə, dövlətin idmana göstərdiyi qayğı əldə olunan uğurlarda müstəsna rol oynayıb: “Bu, danılmaz reallıqdır. Dövlət vəsaiti hesabına idman obyektlərinin maddi-texniki bazasının möhkəmləndirilməsi, paytaxtda və bölgələrdə idman komplekslərinin tikilməsinin bu məsələdə rolu əvəzsizdir. İdman infrastrukturu olmadan bu uğurları əldə etmək olmazdı. Neft gəlirlərinin hələ ölkəyə daxil olmadığı dövrlərdə belə, Azərbaycanda idmana dövlət qayğısı prioritet təşkil edirdi. Baxmayaraq ki, imkanlarımız məhdud idi, amma Azərbaycan 1996-cı ilin 18 iyul–4 avqustda Birləşmiş Ştatların Atlanta şəhərində baş tutan XXVI Yay Olimpiya Oyunlarına qatıldı. Azərbaycan Milli Olimpiya Komandası Atlanta Olimpiadasında 23 idmançı ilə 9 idman növündə təmsil olundu. Ondan sonrakı illərdə həm daha çox idmançılarımız beynəlxalq yarışlara qatıldı, həm də əldə edilən qələbələrin sayı artdı. Dövlət tərəfindən idmançıların əldə etdikləri uğurların yüksək qiymətləndirilməsi, gənclərin idmana olan marağının daha da güclənməsinə təkan verdi. Olimpiya oyunlarının keçirildiyi illərdə göstərilən nəticələr ölkə idmanının inkişaf səviyyəsi barədə daha obyektiv fikir yürütməyə imkan verir. İdmançılarımız 2024-cü ildə Paris Olimpiadasında ikisi qızıl, ikisi gümüş və üçü bürünc olmaqla 7 medal qazanıblar. Nəticədə Azərbaycan ümumi hesabda 30-cu yerdə qərarlaşıb ki, bu da ölkəmizin olimpiadalar tarixində ən yüksək mövqeyidir”.

Vidadi ORDAHALLI
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.