Azərbaycanlıların Ermənistandan kütləvi deportasiyası bu terror qrupunun əli ilə icra olundu...

İstefa verməyə məcbur edilməzdən əvvəl yazdığı məşhur məqalədə Ermənistanın sabiq prezidenti Levon Ter-Petrosyan ölkəsinin Qarabağ münaqişəsində əvvəl-axır güzəştlərə getməli olacağını  demişdi. Məhz həmin məqalə Ter-Petrosyanın istefasına səbəb oldu və məhz həmin məqalə çoxlarında belə bir təsəvvür yaratdı ki, eks-prezident münaqişənin Azərbaycan üçün ən əlverişli surətdə həll edilməsi üçün ən "üzüyola" rəhbər ola bilər. 

Amma Levon Ter-Petrosyanın 31 il öncəki qalmaqallı açıqlamasının üzə çıxması, əslində, erməni faşizminin hər zaman Azərbaycana qarşı olduğunu bir daha təsdiqlədi. Ermənistan rəhbərliyində faşizm ideologiyasından kənarda duran hələ də heç bir şəxs olmayıb. Bura Nikol Paşinyan da daxildir.

Xatırladaq ki, tanınmış videobloqer Albert İsakov özünün “YouTube” kanalında Ermənistanın keçmiş prezidenti Levon Ter-Petrosyanın 1993-cü il iyulun 23-də “Yerkrapa” terror təşkilatının üzvləri ilə görüşünün videosunu yayıb. Burada olan etiraflar maraqlı məqamları üzə çıxarır. Məsələ burasındadır ki, indiyə qədər sabiq prezidentlər  Robert Köçəryan, Serj Sarkisyan və baş nazir Nikol Paşinyanın özü də iddia edirdilər ki, azərbaycanlılar könüllü şəkildə Ermənistanı tərk ediblər. Amma indiki vəziyyətdə Levon Ter-Petrosyanın açıqlamaları tamam fərqli mənzərənin olduğunu üzə çıxarır. Dünya ictimaiyyəti Ermənistanın keçmiş prezidentinin dilindən ermənilərin milli zəmində ayrı-seçkilik yaradaraq etnik təmizləmə siyasətinin aparılmasının etirafını gördü. Belə olan halda Azərbaycan hökuməti və Qərbi Azərbaycan İcması ölkə xaricində Birləşmiş Millətlər Təşkilatı, Avropa Şurası, Haaqa məhkəməsində Ermənistanın etnik təmizləmə siyasəti nəticəsində 300 mindən çox azərbaycanlının öz torpaqlarından didərgin düşməsini söyləyərək rəsmi İrəvandan təzminat istəməlidir. Həmçinin qayıdış hüququ da bərpa edilməlidir. Ümumiyyətlə, Levon Ter-Petrosyanın 1993-cü ildə etdiyi bu çıxış Ermənistanın uzun illər boyu Azərbaycana qarşı həyata keçirdiyi cinayətlərin tarixini bir daha ortaya qoyur. Bu etiraflar Azərbaycanın beynəlxalq ictimaiyyətdən ədalət tələb etməsi üçün güclü hüquqi və mənəvi əsasdır. Açıqlamalardan görünür ki,  Azərbaycana qarşı Ermənistan ərazisində fəaliyyət göstərən silahlı birləşmələr xüsusilə Basarkeçər, Zəngibasar və Amasyada, Zəngəzur mahalında çox fəal olublar. Həmin "Yerkrapa" terror təşkilatı azərbaycanlıları kompakt şəkildə yaşadıqları həmin ərazilərdən amansızlıqla çıxarıb, onları etnik təmizləməyə məruz qoyub. Sonrakı mərhələdə isə Ter-Petrosyan Qarabağ və ətraf rayonları işğal edərək, sülh prosesini yubatmağı hədəfləyib. Yəni onların məqsədi hər zaman vaxt uzatmaq, sülh danışıqları adı altında status-kvonu qoruyub-saxlamaq və müxtəlif güclərin təzyiqi ilə Azərbaycana yaranmış reallığı qəbul etdirmək niyyəti olub. Odur ki, Levon Ter-Petrosyan tərəfindən dilə gətirilən etiraflar, sonrakı mərhələdə Serj Sarqsyanın Xocalı soyqırımı ilə bağlı, Robert Köçəryanın "iki millətin bir yerdə yaşamasının genetik uyğunsuzluğu" ilə bağlı iddiası   eynilik təşkil edir və onların hamısı bir ideologiyanın tərkib hissəsi olaraq yetişdirilən insanlardır.

Rusiyalı politoloq, millətlərarası münaqişələr üzrə mütəxəssis və təhlükəsizlik məsələləri üzrə ekspert Yevgeni Mixaylovun da bu fonda məsələyə münasibəti çox maraqlıdır. O qeyd edir ki, yeni Ermənistan tarixində, Ermənistan dövlətə çevrildikdən sonra bu ölkənin bircə lideri də insanpərvər kimi tanınmayıb və Azərbaycan xalqına qarşı nifrət ifadə etmədən keçinməyib: “Ter-Petrosyan da istisna deyil, baxmayaraq ki, onun haqqında çoxları deyirdi ki, bu, ləyaqətli, dürüst bir insandır və Azərbaycanla sülh və dostluq haqqında razılığa gəlməyə hazırdır – bütün bunlar yalandır”. Ekspert  bildirib ki, əslində, Ter-Petrosyanın "Yerkrapa"  qarşısında çıxışını izlədikdə onun sözlərində nasizmin açıq-aşkar olduğunu söyləmək olar: “Burada Azərbaycan xalqına qarşı nifrət aşkar görünür. Bir çox siyasətçi bir söz deyir, başqa şey edir. Ermənistan siyasətçiləri də istisna deyil. Ter-Petrosyan Ermənistanın xarici torpaqların ələ keçirilməsi, Azərbaycan xalqına qarşı nifrət hissinin alovlandırılması istiqamətində dövlət siyasətinin təməlini qoymuş bir şəxsdir. Ona görə də mən onu guya “ən yaxşı prezident” saymazdım. Bu videoda dedikləri ən azından millətçi ifadələrdir. Erməni azadlıq hərəkatının məqsədi isə başqalarının torpaqlarını zəbt etmək, həmin ərazilərdə yaşayan xalqları ya məhv etmək, ya da qovmaqdır. Təsadüfi deyil ki, biz erməni separatçıların və millətçilərin “dənizdən dənizə Ermənistan” xəritələrini, hətta Rostov vilayətini belə özlərinə daxil etdiklərini görmüşük. Bunlar hamısı genetik olaraq formalaşıb. Erməni xalqı çalışqan, zəhmətkeşdir, lakin erməni xalqının liderləri bu onilliklər ərzində regiondakı qarşıdurmalar zamanı öz xalqının xoşbəxtliyini istədiklərinə şübhə doğururlar. Əgər xoşbəxtlik istəsəydilər, ilk növbədə qonşuları ilə razılığa gəlməyi və problemləri həll etməyi bacarardılar. Amma nəticədə gənc ermənilərin heç bir şey uğrunda həyatını itirdiyi Qarabağ münaqişəsinə səbəb oldular. Bəzi nasist ideyaları naminə. Gec-tez erməni cəmiyyəti Ter-Petrosyan, Köçəryan və s. kimi liderlərə münasibətini yenidən nəzərdən keçirəcək”.   

Ramil QULİYEV